1 नना येसु किर्स्तुना सेवक*1:1 इगा “सेवक” इतेके माल्काना कय इळ्न मनजि कबळ केवाल. पोलुनन आंदन. नावा तोळतोग़ सेवक तिमोति बार इद सीटि, पिलिपि सहरते मनवालोर येसु किर्स्तुन विस्वस कीतोर देवुळता मन्कलोरिह्‌क रासलाह आतोम. मीट विस्वसिरेनाह्‌कु, मीवा मुडगा मनवालोर मुक्यालोरेनाह्‌कु ओसो सेवा केवालोरेनाह्‌कु इद सीटि लोहतलाह आतोम. 2 मावा देवुळबाबानाहि ओसो किर्स्तु येसुसामिनाहि मीक सुकमि, देय्वा दोर्कि.

3-5 मीट बेसता कबुरतुन केंजिसि विस्वस कीतिर, अस्केडाह इतेके इंजेक एवनाह, तान पोकुर कीयनद कबळते मीट नाक तोळ ईसोर वायलाह आतिर. अदिह्‌क बेस्के मीक सीता कीय्ह्‌नन, अस्के मावा देवुळतुन जोहर कीय्ह्‌नन. ओसो मीट सबेटोरेनाह्‌क नना अमेसा देवुळतुन पका गिर्दाते पार्तना कीय्ह्‌नन. 6 देवुळि मियगा इद बेसतल कबळ कीयलाह सुरु कीता, अद कबळतुन कीसोरेन मनदग़ा, अद्रमे येसु किर्स्तु ओसो वायनद दिया एवनाह तान मारिह कीयग़ाये, इद पोल्‍लोतगा नावा पूरा बर्वस मन्ह्‌ता. 7 मीट सबेटोरिन इद्रम सीता कीयनद नाक बेस ओप्पिह्‌ता. बह इतेके नना इगा जेलते मनदह्‌पा मीट सबेटोरिर नावा तोळ आतिर. ओसो किर्स्तुना विरुदतोरिन पोल्‍लो मल्हचि, ओना बेसता कबुर सेतेम मन्ह्‌ता इनजोर करल कीयनद, इद नावा कबळते वने मीट तोळ आतिर. अदिनेनाह्‌क मीक नना जीवा कीय्ह्‌नन. 8 येसु किर्स्तु मीक जीवा कीतपे, नना वने मीक जीवा कीय्ह्‌नन, देवुळिये इद पोल्‍लोता साक्सि मन्ह्‌ता. अदिह्‌क मीक ऊळलाह पका नावा जीवा पर्ह्‌किह्‌ता.

9 मीट ओर्विह्‌क-ओर्वोग़ वीळिसि जीवा कीसोर दायना, देवुळतुन बेस पुनदना, देवुळतुह्‌क विचर वायनव पोल्‍लोङ बेव इनजोर पुनदनद बुद दोर्कना, इनजोर नना पार्तना कीयलाह आतन. 10 इद्रम आतेके, बेसताङ-बेसताङ पोल्‍लोङ बेव इनजोर पुनदा पग़यकिर. इद्रमलेह्‌का किर्स्तु वायनोग़ अस्के, मीट नेह्‌नोरिर ओसो कसुरलेवोरिर मनदकिर. 11 बेद्रम इतेके, येसु किर्स्तु मीक देवुळता मुनेह सेतेमतोर कीताह्‌कु, मीवा ताकमुळतुन ऊळिसि, वेल्‍लाटोर मन्कलोर तान बेरा डीसाता इनजि मान ईस जोहर कीयिर इनजोर, इह वने नना पार्तना कीयलाह आतन.

12 मावोर विस्वसिरिर! नना जेलते मह्‌नन निटमे, मति इद पोल्‍लोतुन पुन्ह्‌टु: नना जेलते मह्‌नन तेला मति नाक इद्रम आताह्‌कु, किर्स्तुना बेसता कबुर इंका नेका पोकुर आयलाह आता. 13 बह आता इतेके, नना किर्स्तुना सेवातेनाह्‌के जेलते मह्‌नन इनजोर बेरोग़ राजानाङ सबे पह्‌रातोर†1:13 राजानाङ वेर पह्‌रातोरा तुंगाते 9000 पह्‌रातोर मतोर. रोम सहरतोर पोलिसिरा तुंगा अलगता मता. ओसो इग्डोर सबेटोर लोकुर पुतोर. 14 अद्रमे नना जेलते मनाह्‌कु, वेल्‍लाटोर विस्वसिर सामिनेनाह्‌क दीरा कीतोर. कीसि मुर्तिय रेयवालेवा दीराते देवुळता पोल्‍लोतुन बेस पोकुर कीस्तोर. 15-17 उच्वुर बार नाक कुळ्सा आसि, नावा जीवातुन कर्विह कीयलाहि किर्स्तुना पोल्‍लोतुन पोकुर कीस्तोर. निटम पोकुर आयि इनजोर पोकुर केवोर, मति तमेनाह्‌क कदर पर्ह्‌कलाहि पोकुर कीस्तोर. नना जेलते मनेके, नावा जीवातुन नोयपिह कीयलाहि ओर अह कीस्तोर. उच्वुर बार बेसतल बुदते पोकुर कीस्तोर. बेसता कबुरतुन वेहतलाहि देवुळि नाक निल्पिह कीता इनजोर ओरिह्‌क एर्का आता. अदिनेनाह्‌क ओर नाक जीवा कीसि, बेसता कबुरतुन पोकुर कीस्तोर. 18 बहे आयि. सोङते आयि, सेतेमते आयि! बह तेला किर्स्तुना पोल्‍लो पोकुर आयलाह आता इनजोर नना पका गिर्दा आय्ह्‌नन.

इद ओसो उंद पोल्‍लोते नना गिर्दा आयकन: 19 मीट नयेनाह्‌क पार्तना कीयलाह आतिर. ओसो येसु किर्स्तुना जीवा नाक पका तोळ ईस्ता, अदिह्‌क देवुळि नावा सेतेमतुन तोहतग़ाये इनजोर पुतन. 20 अद दिया नावा सेवाते बेदे लजाता पोल्‍लो दिसो आयग़ा इनजोर नावा पूरा आसा मन्ह्‌ता. बह इतेके इचानाह बेद्रम नना दीराते किर्स्तुना सेवा कीतन, अद्रमे इंजेकवने कीयलाह आतन. नना हातेकाय, पिसतेकाय नावा सेवाते किर्स्तुना पेदिर बेरा आयग़ा. 21 बाराह्‌क इतेके, नावा विचरते पिसना इतेके किर्स्तुने मान ईस पिसना, हायना इतेक बार ओनेकेन दायना, इद नावा पाय्दाये आयग़ा. 22 इंजेके नना इद मेंदुलते जीवात मतेकेने किर्स्तुनेनाह्‌क बेस-नेह्‌ना कबळ केमुळ आस्ता. अदिनेनाह्‌क पिसलाह विचर कीकना बार डोललाह विचर कीकन, वेहता पुनोन. 23 नडुम एग़्कतप लेह्‌का आतन. नाक इतेके इद मेंदुलतुन विळ्सिस किर्स्तुनके दायना, इदे पका विचर वास्ता. 24 मति इंजेके नावा सेवाता मीक गर्ज अरयह्‌ता, अदिह्‌क नना इद मेंदुलते जीवात मनदनदे बेसु. 25 इदिन पुनजि, मीट मीवा विस्वसते बेर्सिसि पका गिर्दा आसोर दायना इनजि नना पिसकने, इद पोल्‍लोतगा नावा पूरा बर्वस मन्ह्‌ता. 26 अदिनेनाह्‌क नना मियगा बेस्के वायकन, अस्के किर्स्तु येसुना देय्वाते पोलु पिह्‌ट अरतोग़ इनजोर मीट किर्स्तु येसुह्‌कु पका मान ईकिर.

27 उंद पोल्‍लो मात्रम सीता कीम्ह्‌टु: किर्स्तुना बेसता कबुर वेहतपे मीट ताकाटु. अस्के मीट विस्वसते मेग़्किसि उंदि विचरते निच मह्‌निर इनजोर, नना मियगा वातेकाय, वावेकाय केंजकन. अहे बोग़े अद विस्वसतुन विळ्सनाह कीयनद आयो इनजि, मीट उंदि एकाते कह्‌टेम कीय्ह्‌निर इनजोर इदिन वने नना केंजकन. 28 अह कीनेके बेदे पोल्‍लोतेनाह्‌कु मीट मीवा विरुदतोरिन ऊळिसि रेयमाटु. मीट रेयवालेवा मतेके, देवुळ मीक पिसिह कीयग़ा, मति ओरिन निटमे बूळे कीयग़ा इनजोर अदे पोल्‍लो ओरिह्‌क सीना मन्ह्‌ता. इद सीना देवुळतग्डाहिये वाता. 29 बह इतेके देवुळि मीक देय्वा ईता, सिरप किर्स्तुन विस्वस कीयलाहिये आयो, मति ओनेनाह्‌क तिपल आयलाह वने देय्वा ईता. 30 किर्स्तुनेनाह्‌क इंजेके माट ऐंगे लळेम आयलाह आतल. मुने वने नना इद्रम तिपल आयनदिन ऊळतिर.✡1:30 बळयिर 16:14-40 इंजेक वने नना बेद्रम तिपलते मह्‌नन इनजोर केंजलाह आतिर.