1 देवुळि सबेटोर मन्कलोरिन नेयम कीतापया, नना पोग़ोटा बूमि पूना आतद ऊळतन. अद्रमे पूना इळ्ता बूमतुन वने ऊळतन. मुने मतद पोग़ोटा बूमि ओसो इळ्ता बूमि मायता. सम्दुर वने इले. 2 पया पोग़ोन देवुळदीपताहि पूना येरुसलेम इनदनद देवुळता सहर, इळ्न रेगनद ऊळतन. मर्म पेकानेनाह्‌क मलियिह कीतद मर्म पिलाता लेह्‌कान अद सहर दिसता. 3 पया राजकुर्सिताहि उंद लेङ जोरते इद्रम इता, “ऊळाट! इंजेके देवुळि मन्कलोरगा जागा आता. अद ओरगान जागा आयग़ा. ओर ताना लोकुर आयनुर. देवुळि कुद ओरा संगे मनदग़ा ओसो ओरा देवुळि आयग़ा. 4 देवुळि ओराङ सबे तिपल्किन जेक कीसि, ओराङ कंड्रिन उम्ह्‌चिसीयग़ा. अद ओरा संगे मनाह्‌कु मुनेता कालम मारिस अता; अदिनेनाह्‌क हामुर मनो आयग़ा, दुकम मनो आयग़ा, अळयनद मनो आयग़ा, तिपल आयनद मनो आयग़ा.” 5 राजकुर्सितगा उदतद नाक इद्रम इता: “ऊळा! नना सबेटविन पूना कीयलाह आतन. नना वेहतनव पोल्‍लोङ बर्वस लायकताङ ओसो निटमता आंदुङ. अदिनेनाह्‌क अविस्‍किन रासा,” इनजोर इता. 6 ओसो वने इता, “सबेटविना मोदुल वने ननाये. सबेटविना कोड वने ननाये.*21:6 हिंदीते: “अल्फा और ओमिगा” सबेटविन सुरु केवानन वने ननाये, सबेटविन मारिह केवानन वने ननाये. एग़ उंडा वसतोरिह्‌क पुनेम एग़ ईकन. अद एग़ु नावा पिसमुळि. अद्रमता एता चुवाताहि अद एग़ पेसिह्‌ता. 7 बोर-बोर लाग्वाङ पोल्‍लोन गेल्सनोर, ओरिह्‌क नना इव सबे ईकन. नना ओरा देवुळि आयकन. ओर नावाङ पिलाङ-पेकोर आयनुर. 8 मति पेग़्कयाम मन्कलोर, विस्वस विळ्सतोर, एग़्ङ वावालोर, हव्कवालोर, साट्याल कबळ केवालोर, ओदेङ पंडवालोर, पेन-बोमान मोळ्कवालोर, सबेटोर जोल वळ्ह्‌कवालोर, नना ईयनविन दोर्किह केवोर. किसु ओसो किसतळ्मिङ मळ्गसोर मनदनद बटि ओरा तूस आयग़ा. इदे दुस्रा हामुर मन्ह्‌ता,” इतोग़. 9 अचोटेने एळुङ कस्लाङ पोयतव देवतुल्क मताङ. अव कस्लानगा आक्रिताङ एळुङ गोसाङ निंदिस मताङ. अव देवतुल्कनग्डाहि उंद नयग वासि इता, “इगा वय! गोरे पिलाता मुते, मर्म पिलातुन नीक तोहतह्‌नन,” इनजोर इता.

10 अचोटेने देवुळता जीवा नावा पोग़ोन वास उदता. अस्के अद देवतुल नाक उंद बेरा मेटता कोकतगा ओता, ओसि देवुळता सहर येरुसलेम, पोग़ोन देवुळतग्डाहि रेगनदिन तोहता. 11 देवुळि तानगा मताह्‌कु, ताना डीसाता वेह्‌चते अद सहर मिळ्सकसोर मता. पकाय मोलाता मिळ्सकनद बंडाता लेह्‌कान ताना वेह्‌च मता. यसब इनदनद बंडाता लेह्‌कान मिळ्सकसोर मता. 12 अद सहरता किले पका बेरा ओसो निल्क मता. अद किलेता गूरेतगा बारा अग़िङ मताङ. बारा अग़िनगा बारा देवतुल्क मताङ. अव उंद-उंद अग़दगाइस्रयेल लोकुरा बारा कूळिनाङ पेदिर्क रासिस मताङ. 13 पोळ्द पेसनद बाजे मूंड अग़िङ मताङ. पोळ्द अरयनद बाजे मूंड अग़िङ मताङ. ओसो उत्तर बाजे मूंड आग़िङ मताङ. दक्सिन बाजे मूंड अग़िङ मताङ. 14 अद सहरता किलेतुन बारा बंडाङ वाटिस जोता दोहचि, गूरेतुन तेहतद मता. बारा बंडानगा गोरे पिलाताङ बारा बळयिराङ पेदिर्क रासिस मताङ.

15 नाक वळ्ह्‌कसोर मतद देवतुलतगा बंगरता कहतनद डुडि मता. अद डुडटे सहरतुन, तानाङ अग़िन, ताना गूरेतुन कहतलाहि तान पोस मता. 16 अद सहर नालुङ पचाङ अर्के उदिस मता. ताना लाटि, नेर्वु बराबर मता. अद देवतुलि अद डुडिटे सहरतुन कहता. ताना लाटि रेंड अजर्क नालुङ नूह्‌क किलोमीटर मता. अद लाटि, नेर्वु, निल्कु बराबर अचोने मता. 17 अद देवतुलि सहरता गूरेतुन कहता. मन्कना कुटाते वने, अद देवतुलता कुटाते वने बराबर मता. नुटा रेंड वीसाङ नालुङ कुटाङ निल्क मता. 18 किलेता गूरे यसब इनदनद बंडाते दोहतद मता. पूरा सहर काच लेह्‌का मिळ्सकनद सिरसिर आतद बंगरते पंडटद मता. 19 सहरता जोता दोहतगा पकाय दाराताङ, दुस्रा-दुस्रा, मिळ्स्कनव बंडाङ वाटिस दोहतद मता. मुनेता जोताता बंडा यसब इनदनद मता. दुस्रा जोताता बंडा नीलमनि इनदनद मता. ओसो मूंड नंबरता जोता बंडा लालडि इनदनद मता. नालुङ नंबरता जोता बंडा मरकत इनदनद मता. 20 एयुङ नंबरता जोता बंडा गोमेदक इनदनद मता. आरुङ नंबरता जोता बंडा मानिक इनदनद मता. एळुङ नंबरता जोता बंडा पीतमनि इनदनद मता, आट नंबरता जोता बंडा पेरोज इनदनद मता. नव नंबरता जोता बंडा पुकराज इनदनद मता. दहा नंबरता जोता बंडा लहसनिये इनदनद मता. अक्रा नंबरता जोता बंडा दुमरकान्त इनदनद मता. बारा नंबरता जोता बंडा ताकूत इनदनद मता.

21 बारा तेल्पिङ बारा मोतिनाङ मताङ. उंद-उंद तेल्पि उंद-उंद मोतिते पंडटद मता. सहरता अग़ि काचता लेह्‌कान सिरसिर आतद बंगरते पंडटद मता. 22 नाक सहरतगा बेदे मंदिर दिसो. बेरा लावता सामि देवुळि ओसो गोरे पिला ताना मंदिर मता. 23 अद सहरतगा वेह्‌च ईयलाह पोळ्दता, नेलाता गर्ज इले, बाराह्‌क इतेके देवुळता वेह्‌चते अगा दीचिह्‌ता. ओसो गोरे पिला ताना चिमलि मन्ह्‌ता. 24 सबे जातिनोर लोकुर इद चिमलिता वेह्‌चते पिसनुर. बूमतग्डोर राजालोर तमाङ बंगर वेंडिङ इद सहरता लोप्पा ततनुर. 25 अगा बेस्केन ईकळ आयो. अदिनेनाह्‌क सहरता तेल्पतुन बेस्केन केहोर. 26 सबे जातिनोरा सोबाता सामनतुन अद सहरता लोप्पा ततनुर.

27 ओसो कळ्वोग़ आतोर मन्कलोर आयिर, माल आयि, अद सहरता लोप्पा ओळिय पग़वो. एग़्ङ वायनद कबळ केवालोर मन्कलोर ओसो जोल वळ्ह्‌कवालोर तानगा ओळिय पग़वोर. मति सिरप गोरे पिलाता, अमेसातुह्‌क पिसवालोरा पुस्तकतगा पेदिर्क रासिस मनवालोरे, अद सहरतगा ओळिय पग़यनुर.