किर्स्तुना बळयि पोलु रोम सहरतोर विस्वसिरिह्‌क लोहतद सीटि
येसु डोलिसि ओसो जीवा अरतापया 57-58 इव वर्साना कालमते, येसु किर्स्तुना बेसता कबुरतुन सबेटोर लोकुरिह्‌क वेहतलाहि मुचाकेपाते तिरियतापया, पोलु कुरिंत सहरते मतोग़. अग्डाहि तना मुने बेस्केन अनवद रोम सहरते दायलाह विचर कीस मतोग़.
पोलु इद सीटटुन रोम सहरतोरिह्‌क बाराह्‌क रासतोग़ इतेके, पोलु मतद कुरिंत सहरता बाजेताङ नाह्‌कनके सेवाता कबळ मारिह कीतोग़, ओसो वेल्‍लाङे वर्सानाहि रोम सहरते दायलाह विचर कींदोग़. अदिनेनाह्‌क रोम सहरता अबरता बाजेता इस्पानिया देसेम दायह्‌पा रोम सहरतोर विस्वसिरिन कलियिस रेंड-मूंड दियाङ ओरा संगे मनदना मता, पया ओग़ अग्डाह दायह्‌पा पय्नमतुह्‌क गर्ज अरयनद ओर ईयनुर इनजोर पोलुना आसा मता. अदिह्‌के पोलु इद सीटटुन रोम सहरतोरिह्‌क रासतोग़. ओसो इद सीटटे देवुळि बेद्रम लोकुरिन पिसिह कीस्ता इनजि पोलु बेस-नेह्‌ना वेहतह्‌तोग़. देवुळता सेतेमि इव एयुङ पोल्‍लोनगा दिसिह्‌ता: (1) मन्कलोरा पापमता नेयम कीयनदिनगा (1:18-3:23); (2) पापि मन्कलोरिन किर्स्तुना मेटे सेतेमतोर कीयनदिनगा (3:23-5:21); (3) मन्कलोरिन तमा पापमताहि विळ्सिह कीयनदिनगा (6-8); (4) तनाय विचरते मन्कलोरिन आचनदिनगा (9-11); (5) विस्वसिरा बद्लेम आतद ताकमुळतगा (12-15). इव ओसो देवुळता सेतेमता लोप्पाडाङ पोल्‍लोङ काग़्हतलाह पोलु इद सीटटुन रासतोग़.
1
मुनेता पोल्‍लो
नना पोलु, येसु किर्स्तुना सेवकनन; ओना बळयि आयलाह देवुळि नाक आचता. तना बेसता कबुर वेहतलाह नाक एग़िह कीता. अद कबुर निटम आयग़ा इनजि देवुळि वेल्‍लाय मुने तना कबुरतोरा मेटे करल कीस मता, अद माकु पवित्र सास्त्रमतगा दोर्किह्‌ता.* 1:2 पोलु वेहतव इव पोल्‍लोङ पूरा सीटटे पया दोर्किह्‌ताङ. 3-4 अद बेसता कबुर इतेके, निटम देवुळता मग़ि, मावा सामि येसु किर्स्तुना पोल्‍लो आंदु. मन्कलोर इतेके ओनु दाविद राजाना कूळते पुट वातोग़ इनजोर इन्ह्‌तोर. मति देवुळता पवित्र जीवा बार तना लावते ओन हामुरतग्डाहि जीवा अर्हता, अह कीसि ओग़ देवुळता मग़ि आंदोग़ इनजि तोहता. सबे जातिनोर ओना पोल्‍लोतुन विस्वस कीसि ओनाङ केंजिर, अह कीसि ओना पेदिरतुन मान ईयिर इनजोर, देवुळि येसुना मेटे नाक ओना बळयि आयलाहि देय्वा ईता. इव सबे पोल्‍लोङ मीट इतेके पुह्‌निरे. 6-7  रोम सहरतगा मनवालोर विस्वसिरिर! येसु किर्स्तुना पवित्र मन्कलोर आयलाहि देवुळि सबे जातिनाहि लोकुरिन केयता. अहे अद मुडगा देवुळि मीक वने जीवा कीसि कलियिह कीता. मावा देवुळबाबानाहि ओसो किर्स्तु येसुसामिनाहि मीक सुकमि, देय्वा दोर्कि.
रोम सहरतोर विस्वसिरिन ऊळलाह पोलु पका विचर कीस्तोग़
नना इद वेहतलाह आतन: मीट येसुन विस्वस कीतद पोल्‍लोतुन पूरा दुनियामेटोर लोकुर केंजतोर. अदिह्‌क मीट येसु किर्स्तुना लोकुर आतिर इनजोरे मावा देवुळतुन जोहर कीय्ह्‌नन. 9-10 देवुळता मग़ना बेसता कबुरतुन पोकुर कीसोरे नना पूरा जीवाताहि ताना सेवा कीय्ह्‌नन. नना देवुळतुन पार्तना कीयह्‌पा, ऊक-ऊके मीवा सीता कीय्ह्‌नन इनजोर देवुळिये साक्सि मन्ह्‌ता. ओसो “ए देवुळबाबा, नीवा विचर मतेके रोम सहरतोर विस्वसिरगा दायलाह इद मल्का तेला नाक अग़ दोर्कि” इनजोर इह वने पार्तना कीय्ह्‌नन. 11 बाराह्‌क इतेके, नावा सेवाता मेटे मीकु देवुळता जीवाताहि बुद दोर्किसि, मीवा विस्वस बेस मेग़्कना इनजि नना मियगा वायलाह ऊळिह्‌नन. 12 इतेके नना मीवा संगे मनदकन अस्के मीवा विस्वसतुन ऊळिस नना गिर्दा आयकन, अहे नावा विस्वसतुन ऊळिस मीट वने गिर्दा आयकिर. इद्रम माट ऐंगेने गिर्दा आयकल.
13  यहुदि आयवोरिन बेसता कबुरतुन वेहचि उय्तुरिन विस्वसते ततन. अद्रमे मियग्डोर उय्तुर मन्कलोरिन वने विस्वसते ततकन इनजोर मियगा ऊक-ऊके वायलाह ऊळिंदन; मति इचानाह बेदाय अडम आसोर मता. इद पोल्‍लोतुन मीट पुनदना इनजोर नना वेहतलाह आतन. 14 सर्कर मन्कलोर आयिर, गेळा-माळातोर आयिर, कग़यतोर आयिर, कग़यवोर आयिर, सबेटोरिह्‌क किर्स्तुना बेसता कबुरतुन एवसिह कीयनद मोता नावा पोग़ोन मन्ह्‌ता. 15 अदिनेनाह्‌क मीक रोम सहरतोरिह्‌क वने बेसता कबुरतुन वेहतलाह नावा गिर्दा मन्ह्‌ता.
16 मुने यहुदिरिन, पया यहुदि आयवोरिन, किर्स्तुन विस्वस केवालोर सबेटोरिन पिसिह कीयलाहि, इद कबुरतगा देवुळता लाव मन्ह्‌ता. अदिनेनाह्‌क नना दीराते इदिन वेहतलाह पेग़्के-मुने आयोन. 17 देवुळि बेद्रम मन्कलोरिन तना लेह्‌का सेतेमतोर कीसीस्ता इनजोर इद कबुर वेहतह्‌ता. सुरुताहि मारेङा एवनाह, अद पोल्‍लो विस्वसता लोप्पाडाये! देवुळता सास्त्रमते वेहतपु: बोर देवुळतुन विस्वस कीसि सेतेमतोर आयलाह ऊळिह्‌तोर, ओरे पिसनुर, 1:17 हबक्‍कूक 2:4 इनजोर रासतद मन्ह्‌ता.
पापम केवालोरिन देवुळ ओङ कीस्ता
18 किर्स्तुना बेसता कबुर सबेटोरिह्‌के गर्ज मन्ह्‌ता. बह इतेके देवुळतुन सीता केवोरु, लाग्वोरु बह कीस्तोर, तमा लाग्वा बुदते सेतेमतुन मिसिह्‌तोर. अद्रमतोरा पोग़ोन देवुळि पका ओङ आसि देवुळदीपताह ताना सिक्सा अर्हचीयग़ा, इनजि तोहतलाह आता. 19 बाराह्‌क इतेके देवुळता लोप्पाडाङ पोल्‍लोङ ओरिह्‌क पोळ्क्ने दिसिह्‌ताङ. देवुळिये ओरिह्‌क इव पोल्‍लोङ बेस-नेह्‌ना पुन्पिह कीता. 20 देवुळ पंडटव सबे, बूम पुटटस्केडाहि लोकुरिह्‌क दिसिह्‌ताङ. देवुळता बेस्केन मारवद लावु, ताना बुदि, इद मन्कलोरिह्‌क दिसवेक तेला, देवुळ पंडटविन ऊळतेके, इव पोल्‍लोङ ओरिह्‌क बेस-नेह्‌ना पुनदनाह आस्ताङ. अदिनेनाह्‌क देवुळतुन पुनोम इनजोर ओर इंजेक इनदा पग़वोर. 21-22 ओर तान पुतोर निटमे, मति अद देवुळि इनजोर मानेम आयोर, ओसो देवुळ माक बेस ऊळिह्‌ता इनजोर तान जोहर वने केवोर. मति देवुळि इद्रमता, अद्रमता इनजोर उगसताङ विचर्क कीयलाह आतोर. माट बुदतोरोम, तेल्वतोरोम इन्ह्‌तोर, मति बुदलेवोर आतोर. ओर बुदलेवोरा जीवातगा गंगा पोयतप लेह्‌का आता. 23 अमेसा मनदनद देवुळतुन, निमान बेरा डीसातोनिन इनजोर मोळ्कना वाटो, रेंड दियाङ मनवालोर मन्कलोरा, पिटेना, जन्वर्कना, तरस्कना लेह्‌काडाङ बोमाङ पंडटोर ओसो अविस्किन पेन्ह्‌क इनजोर मोळ्किह्‌तोर. 24-26 देवुळिये अमेसा-अमेसातुह्‌क जोहर कीयना लायकता मन्ह्‌ता, इंगो निटमे! मति ओर सबेटविन पंडटद देवुळतुन माळवा, देवुळ पुटिह कीतविन माळिह्‌तोर. अह कीसि देवुळता सेतेमता अग़दुन विळ्सिसि, जोलता अग़दुन पोयतोर.
अदिनेनाह्‌क ओर ओर्विह्‌क-ओर्वोग़ तमाङ मेंदुस्कने लजालेवा करबताङ कबस्क कीयिर, ओर्विह्‌क-ओर्वोग़ साट्यालोरा लेह्‌का आसि, विचर वातप लेह्‌का कीयिर इनजोर देवुळि ओरिन विळ्सिसीता. बह इतेके वेल्‍लाङे आस्क वने, आळ इर्वुर उंजतप लेह्‌का, दुस्राङ आस्कना संगे उंजिह्‌ताङ. 27 अद्रमे वेल्‍लाटोर कोय्तोर वने, मुतेस्क ततना विळ्सिसि, आळ इर्वुर उंजतप लेह्‌का, लजालेवा दुस्रोर कोय्तोरा संगे उंजिह्‌तोर. इद्रमतोर आस्क-कोय्तोर तमा कीतव लाग्वाङ कबस्कना इसबते देवुळ ईयनद सिक्सातुन दोर्किह कीस्तोर.
28 ओरिह्‌क देवुळतुन सीता कीयलाह मुर्तिय विचर वावो, अदिनेनाह्‌क ओरा बुद करबता मनि, ओप्पवव कबस्क कीयिर इनजोर देवुळि ओरिन विळ्सिसीता. 29-30 अदिनेनाह्‌क ओरु अमेसा सबे लाग्वाङ कबस्क कीस्तोर, कोटुल कीस्तोर, दुस्रोरिन कोंडा कीस्तोर, हव्किह्‌तोर, कूदिङ दास्तोर, नाळेह कीस्तोर, जग्ळम्क पुटिह कीस्तोर, देवुळता अडम मन्ह्‌तोर, पका पोंगिह्‌तोर, लाग्वाङ आय्डाङ पुटिह कीसोरेन मन्ह्‌तोर, तलोग़-तपेराङ पोल्‍लोङ केंजोर. ओराङ जीवाङ लालुस, मोर्दोप, पोमाडेङ, कुळ्सा, इविस्कने निंदिस मन्ह्‌ताङ. 31 ओर बुदलेवोरु, नाळेह केवालोरु, जीवा केवोरु, जीवा लोपवोरु. 32 देवुळता अडो मतपु इद्रमतोर हामुरता सिक्साता लायक मन्ह्‌तोर इनजोर वेर तमा पुतोर. पुंजाय मति तमाये अद्रम ताकिह्‌तोर, ओसो अद्रम ताकवालोरिन बेसतोर इनजोर वने गिर्दा आस्तोर.

*1:2 1:2 पोलु वेहतव इव पोल्‍लोङ पूरा सीटटे पया दोर्किह्‌ताङ.

1:17 1:17 हबक्‍कूक 2:4