1 इंजेके मावा यहुदि मन्कलोरा पेदामुय्तोग़ अब्रहमना पोल्‍लो वेहतकन: अब्रहम मुय्तोन देवुळि बेद्रम सेतेमतोग़ इता? 2 ओनाङ कबस्कने देवुळ ओन सेतेमतोग़ इता इतेके, नना बेरोनन इनजि ओग़ पोंगसोर तिरिय पग़वेग़. (मति देवुळता मुनेह बोग़े अद्रम पोंग पग़वोग़.) 3 देवुळता सास्त्रमते रासतपु, अब्रहम देवुळता पोल्‍लोतुन नमतोग़. ओग़ नमनदिन ऊळिसि देवुळि ओन सेतेमतोग़ इता. ✡4:3 पुटमुळि 15:6 इनजोर रासतद मन्ह्‌ता, इदिन पुतिरे. 4 इंजेके कबळतुह्‌क अनवाह्‌क दोर्कनव कोतानु कूलि इन्ह्‌तोर. दर्मम कोताङ दोर्कताङ इनजोर इनोर; ओग़ कबळ कीताह्‌के अव कोताङ ओन्क दोर्कताङ. 5 अद्रमे बोग़े मन्कल बेसताङ कबस्क कीसि, कमय कीतप लेह्‌का, देवुळता मुनेह सेतेमतोग़ आया पग़वोग़. मति लाग्वोरिन सेतेमतोर कीयनद देवुळतुन नमिस ओन्क ताक पोयतग़ा, अस्केने देवुळि ओन सेतेमतोग़ इन्ह्‌ता. इतेके ओन्क कूलि ईयना लेह्‌का आयो, मति दर्मम कोताङ ईयना लेह्‌का आस्ता. 6 वेल्‍लाय मुने दाविद राजाल वने इद्रमे वेहतोग़, देवुळि बोर मन्कलोराङ कबस्किन ऊळवा, ओरा विस्वसतुह्‌के ओरिन सेतेमतोर इन्ह्‌ता, ओर देय्वातोरु. देवुळताङ पाटानगा दाविद इद्रम रासतोग़:

9-10 बह सिरप डायना रिवज कीतोर यहुदिरिह्‌के अद देय्वा दोर्किह्‌ताया? डायना रिवज केवोरिह्‌क दोर्को? ओसोवने अब्रहम मुय्तोना पोल्‍लो तेहतह्‌नन: अब्रहमना विस्वसतुह्‌के देवुळि ओन सेतेमतोग़ इता, इनजोर माट ऊळतल. इद ऊळाट, देवुळि अब्रहमिन बेस्के सेतेमतोग़ इता? डायना रिवज कीतस्केया, केवस्के? डायना रिवज केवस्केने इता.*4:9-10 अब्रहम डायना रिवज कीतदिह्‌काय 14 वर्साना मुने देवुळि ओन सेतेमतोग़ इता. (पुटमुळि 15-17 अद्यय) 11 ओग़ डायना रिवज केवस्केन देवुळतुन विस्वस कीतोग़. अदिनेनाह्‌क अद ओन सेतेमतोग़ इता. ओना विस्वसते ओग़ देवुळता मुनेह सेतेमतोग़ आतोग़ इनजोर तोहतलाह, देवुळि ओन डायना रिवजता सीना कीया वेहता. इंजेक वने डायना रिवज केवा देवुळतुन विस्वस केवालोर सबेटोरिन अद सेतेमतोर इन्ह्‌ता. अदिनेनाह्‌क विस्वसतेनाह ऊळिसि ओरा वने अब्रहम पेदामुय्तोग़ आस्तोग़. 12 इंजेके अब्रहम डायना रिवज केवस्के बेद्रम विस्वसता अग़दे ताकिंदोग़, अद्रमे डायना रिवज कीतोर यहुदिर वने विस्वसता अग़दे ताकतेक अचोन, विस्वसतेनाह ऊळिसि ओरा वने अब्रहम पेदामुय्तोग़ आस्तोग़.

13 पूरा बूम मीके आयग़ा इनजोर देवुळि अब्रहमिनु, ओना कूळतोरिन, करल कीस मता.✡4:13 पुटमुळि 22:17-18मोसानाङ अडोन अब्रहम माळताह्‌कु अद्रम करल केवो; मति ओग़ विस्वस कीताह्‌कु सेतेमतोग़ आतोग़ अदिह्‌के कीता (अब्रहम इतेक मोसाह्‌काय मुनेता कालमतोग़ आंदोग़). 14-15 देवुळि करल कीसीयनद बर्कततुन मोसानाङ अडोङ माळवालोरे दोर्किह कीस्तोर इतेके, विस्वसता बाताल गर्ज? देवुळता करल वने उगसिन आवालि, बह इतेके मोसानाङ अडोङ वेहतप बोग़े ताक पग़वोग़, अदिह्‌क अविस्किन माळलाह ऊळवालोरिह्‌क देवुळता सिक्साये दोर्किह्‌ता. मति देवुळि अब्रहमिन करल कीतस्के देवुळताङ अडोङ इलवाय मताङ. अदिह्‌क अडोङ देहतनद पोल्‍लो अस्के मुर्तिय पेसो.

16-17 देवुळि बेदिन ईकन इनजि करल कीस मता, अदिन देवुळतुन विस्वस केवालोरे दोर्किह कीस्तोर. अदु देवुळता दयातेने सबे विस्वस केवालोरिह्‌क निटमे दोर्कग़ा. सिरप मोसानाङ अडोन मानेम आयवालोर यहुदि विस्वसिरिह्‌के आयो, मति अब्रहमना लेह्‌का विस्वस केवालोर सबेटोरिह्‌के दोर्कग़ा. देवुळि अब्रहमिन वेहतद पोल्‍लो सास्त्रमतगा इद्रम रासतद मन्ह्‌ता: नना नीक वेल्‍लाङे जातिनोरा पेदामुय्तोग़ कीतन, ✡4:16-17 पुटमुळि 17:5 इनजोर रासतद मन्ह्‌ता. इद्रम विस्वस केवालोर माट सबे जातिनोर मन्कलोरिह्‌क, देवुळता मुनेह अब्रहमे पेदामुय्तोग़ आतोग़.

हातोरिन जीवा अर्हतनदु, लेवविन मनाह कीयनद देवुळतुन अब्रहम विस्वस कीतोग़. 18-19 नीवा जालपिल लेकालेवा आयग़ा, ✡4:18-19 पुटमुळि 15:5इनजोर देवुळि ओन करल कीस मता. अस्के ओना वय्स नूर वर्साङ लेह्‌का आस मता, ओना मेंदुल वने कुलिस मता. ओना मुते साराल वने वंजो मता. इंजेके माक जालपिल आयलाह बाताल आसा मनदग़ा इनजि ओग़ विचर कीतोग़, तेला मति ओग़ विस्वसते कमजोर आयवा देवुळता करलतगा आसा ताससोरेन मंदोग़. 20 देवुळि करल कीतप कीस्ताया, केवो, इनजोर रेंड विचर्क केवोग़, विस्वसतुन विळ्सोग़, मति ओग़ विस्वसते पका मेग़्कसोर अतोग़. अद विस्वसते ओग़ देवुळतुह्‌क मान ईतोग़. 21 देवुळि करल कीतप लेह्‌का कीया पग़यह्‌ता इनजोर देवुळता पोग़ोन ओना पका बर्वस मता. 22 इद पोल्‍लोतेनाह्‌के देवुळि ओन सेतेमतोग़ इता. ✡4:22 पुटमुळि 15:6 23 सास्त्रमते रासतद इद पोल्‍लो सिरप अब्रहमनेनाह्‌के इले, 24-25 मति मयेनाह्‌क वने रासतद मन्ह्‌ता. मावा पापमतेनाह्‌के येसुसामिन हव्कलाह लोकुरा कयदे देवुळ विळ्सिसीता, अदिह्‌क माट ताना मुनेह सेतेमतोरल आतल. ओसो माक सेतेमतोर कीतद पोल्‍लोतुन करल कीयलाहिये अद येसुन हामुरतग्डाह तेग़्किह कीता.†4:25 8:30 ऊळाट मावा येसुसामिन हामुरतग्डाह जीवा अर्हतद देवुळता पोग़ोन माट विस्वस कीतल. अदिनेनाह्‌क माक वने अद सेतेमतोर इंदग़ा.