1 मावोर विस्वसिरिर! मीक इंजेक एवनाह वेहतव देवुळता दयाताङ पोल्‍लोन सीता कीसीसि, मीट बाताल कीयना इनजोर मीक अर्जि कीय्ह्‌नन: नावा मनमुळ इंजेके नयेनाह्‌क इले मति देवुळतेनाह्‌के मन्ह्‌ता इनजि, मीवाङ मेंदुस्किन देवुळता सेवातेनाह्‌कु ताना कयदे विळ्सिसीम्ह्‌टु. इद्रमताये मोकि देवुळतुह्‌क विचर वास्ता, इदिने देवुळतुन निटम माळना इनजोर इनदना. 2 इद दुनियातोरा लेह्‌का ताकलाह मीट ऊळमाटु, मति देवुळ मीवाङ विचर्किन मिळ्हचि पूना बुद ईयि. अस्के बेद्रम ताकना इनजि देवुळता विचर मन्ह्‌ता अदिन मीट पुनदकिर. इद्रमता ताकमुळि नेह्‌नलि, ओसो देवुळतुह्‌क विचर वायनदु, बाताले तपलेवद आंदु.

3 देवुळि नाक देय्वा ईस तना बळयि इनजोर निल्पिह कीता, अद अदिकरते मियग्डाह ओर्विन-ओर्विन नना वेहतह्‌नन: नना विस्वसते बेरोनन इनजोर पोमाडेङ कीयनदायो, मति देवुळि नाक बेद्रमता बुदि ईता, अदिना इसबते नना बेद्रमतोग़ विस्वसिनन इनजि बेसतल बुदते विचर कीम्ह्‌टु. 4 बह इतेके, मावा मेंदुदगा कय्कु, काल्‍कु, कोंडाङ बाताङ मन्ह्‌ताङ, अव सबे अलग-अलग कबळ कीस्ताङ. 5 अद्रमे माट विस्वसिरल वने वेल्‍लाटोरल मतेक तेला, किर्स्तुना संगे जोळेम आताह्‌कु, उंदिय मेंदुलता लेह्‌का आतल. अहे माट ओर्विह्‌क-ओर्वोग़ वने तुंडिस मतप लेह्‌का मह्‌नल. 6 देवुळि माक देय्वा ईताह्‌कु, मयगा ओर्वोग़-ओर्वोग़ मन्कह्‌क अलग-अलग रीतता कबळ कीयलाह बुद ईता. अद बुद मतपु माट ताना सेवा कीयना गावले. देवुळि तना कासा कबुरतुन नाक पुन्पिह कीता इनजि नीवा विस्वस मन्ह्‌ता इतेके अद कबुरतुन पोकुर कीम. 7 सेवा-साकुर कीयनद बुद दोर्कतोरिर, गिर्दाते सेवा साकुर कीसोर मन्ह्‌टु. देवुळता पोल्‍लो काग़्हतनद बुद दोर्कतोरिर, बेस-नेह्‌ना काग़्हचोर मन्ह्‌टु. 8 दुस्रोरिह्‌क दीरा ईयनद बुद दोर्कतोरिर, अहे दीरा ईसोर मन्ह्‌टु. दुस्रोरिह्‌क दर्मम कीयनद बुद दोर्कतोरिर, चिव्टम आयवा दर्मम कीसोर मन्ह्‌टु. दुस्रोरा मुक्याल आस ताकिह कीयनद बुद दोर्कतोरिर, पूरा जीवाताहि ओरिन ताकिह कीसोर मन्ह्‌टु. दुस्रोरिन जीवा लोपिस तोळ ईयनद बुद दोर्कतोरिर, मीट गिर्दाते तोळ ईसोर मन्ह्‌टु.

9 दुस्रोर विस्वसिरिन जीवा कीय्ह्‌नोम इनजोर मीट सोङ केमाटु, मति जीवाताहि जीवा कीम्ह्‌टु. लाग्वाङ पोल्‍लोनग्डाह जेक मन्ह्‌टु, नेह्‌नाङ पोल्‍लोन अमेसा पोस मन्ह्‌टु. 10 तमोग़-दादान लेह्‌कान ओर्विह्‌क-ओर्वोग़ जीवा कीम्ह्‌टु. ओर्विह्‌क-ओर्वोग़ उड्ला बुदते मान ईयलाह उसर आम्ह्‌टु. 11 कबळ कीयलाह लंडा आयमाटु, मति पूरा जीवाताहि देवुळता सेवा कीम्ह्‌टु. 12 देवुळि मीक ईतद आसाते गिर्दा आस मन्ह्‌टु. तिपल्क वातस्के, आरेम आयवा निच मन्ह्‌टु. अमेसा पार्तना कीसोर मन्ह्‌टु. 13 देवुळता मन्कलोरिह्‌क गर्ज अरतेक अचोन तोळ ईम्ह्‌टु. बोराय विस्वसिर जेकताहि मीवा लोन वातोर इतेके, ओरिह्‌क गिर्दाते जावा-एग़ कीयलाह अमेसा तयर मन्ह्‌टु.✡12:13 1 पत्रु 4:9

14 मीक तिपल केवालोरिन, “देवुळ मीक सुकमते तासि” इनजोर बर्कतताङ पोल्‍लोङ वळ्ह्‌काटु, सरप एमाटु. 15 गिर्दा केवालोरा संगे मीट वने गिर्दा कीम्ह्‌टु. अळवालोरा संगे मीट वने अळ्म्ह्‌टु. 16 मीवा मुडोरगा उंद एका मन्ह्‌टु. पोमाडेङ कीसोर तिरियमाटु, मति पोहचीतप लेह्‌का मनवालोरा संगे गोत कीम्ह्‌टु.*12:16 “साकुर केवालोर कीयनाङ कबस्कना लेह्‌काडाङ कबस्क कीयलाह लजा आयना आयो,” इद्रम वने अर्तम पेसिह्‌ता. नाक सबे एर्का मन्ह्‌ता, नना बुदतोनन इनजोर इनमाटु.

17-18 सबेटोरिह्‌क बेस ओप्पनव पोल्‍लोना विचर कीसोर ताकाटु, मीवा मेटे बेचोन आया पग़यह्‌ता अचोन, सबेटोरा संगे गूनमते मन्ह्‌टु. बोराय मीवा नुस्कान कीतेके, ओरिन कोदा पोयमाटु. 19 देवुळता सास्त्रमतगा इद्रम रासतद मन्ह्‌ता: “बद्ला एतनद नावा कबळ. लाग्वाङ कबस्क केवालोरा ननाने बद्ला एतकन” इनजि देवुळि इन्ह्‌ता,✡12:19 व्यवस्थाविवरण 32:35 इनजोर रासतद मन्ह्‌ता. अदिनेनाह्‌क नावा गोततोरिर! मीट बद्ला एनमाटु, ओरिन देवुळ ऊळग़ा. 20 मति सास्त्रमते रासतपु: मीवा विरुदतोर कग़्वते मतेके गाटो ईम्ह्‌ट. ओरिह्‌क एग़ उंडा वसतेके एग़ ईम्ह्‌टु. अद्रम कीतेके ओरिह्‌क पका लजा वायग़ा.†12:20बुदताङ पोल्‍लोङ 25:21-22 मोदुल कागिदते “ओरा तलातगा किस तळ्मिङ तासतप आस्ता,” इतेके लाग्वाङ कबस्क कीतोन्क बेसताङ कबस्क कीसीतेक अचोन, लाग्वाङ कबस्क कीतोन्क लजा वास्ता. अद्रम लजा वायनदु तलातगा किस तळ्मिङ तासतप लेह्‌कान आस्ता. 21 इद्रमलेह्‌का मीवा जीवातगा कोंटे बुदि उदमाकि, मति नेह्‌नल कबळ कीसि, अद कोंटे बुदतुन मायपिह कीम्ह्‌टु.