Hɔrɔya
Nabi Musa Ka Alla la Kuma Mɛn Sɛbɛ
Tawureta Musa yɔrɔ filana le ten. A ye Isirayɛlikailu jɔnya ni ii hɔrɔya le la ko ɲabɔla Misiran jamana. Alla ka ii hɔrɔya kosa ii ye bɔ Misiran jamana. Ale ka ii kunka, wo le rɔ, ka ii kɛ a ta ri, ka a sariyailu di ii ma. Alla mɛn ka Isirayɛli jama kunka a kaninteya rɔ, wo le a fɔni jama yɛ ko ii ye ii la kaninteya yiraka a la a sariyailu mira la.
Isirayɛlikailu ban kɔrɔ sii diya sɔrɔnna Misiran dɔ, san siyaman taminni, ii kɛra jama ba ri. Kɔni ii kɛra Misiran mansa jɔnilu ri. Alla tɛ a kɔnkɔ donna Isirayɛlikailu jɔnya tɔrɔya, a ka cɛɛ do suwandi ii yɛ mɛn tɔɔ le ko Musa kosa a ye lɔ ii ɲɛfɛ. Alla ka Misirankailu diyagboya a fanka la kosa ii ye hɔrɔya di Isirayɛlikailu ma, ka ii bila ka wa. Musa ka a lɔ ii ɲakɔrɔ, ka wa ii ri Sinayi koyinkɛ ma wula kɔndɔ. Alla ka Isirayɛli kɛ a jama ri, ka teriya sidi ii tɛma Sinayi koyinkɛ kan. A ka a sariyailu fɔ ii yɛ. Musa ka koyinkɛ kan sariyailu laban diya waati mɛn ma, ka bɛn yɔrɔ sɛnimanni lɔ ko ma. Kitabu yɔrɔ ɲin banni yɔrɔ sɛnimanni lɔ ko le ma, Alla nara a jɛrɛ lɛnkɛnɛmayala yɔrɔ mɛn.
1
Isirayɛlika siyayara Misiran jamana rɔ
1 Nba, Yakuba mɛn tɔɔ fanan ko Isirayɛli, wo wa mɛn kɛni Misiran jamana rɔ, a ni a dencɛilu wara, bɛɛ ni a la denbaya. A dencɛilu tɔɔ le ɲin di: 2 Rubɛn, Simeyɔn, Lebi, Yahuda, 3 Isakari, Sabulɔn, Bɛniyaminu, 4 Daan, Nafitali, Kadi a ni Asɛri. 5 Yakuba la mɔɔilu bɛɛ ladɛnnin kɛra mɔɔ biwɔrɔnwula le ri. A dencɛ Yusufu kelen de tɛrɛ ye Misiran.
6 Nba, Yusufu a ni a dɔɔcɛ ni a kɔrɔcɛilu, a ni mɛnilu tɛrɛ ye a tɔrɔfɛ waati wo rɔ, woilu bɛɛ kɔrɔra ka sa. 7 Isirayɛlika jirira ka siyaya kosɛbɛ ii ka ban ka fanka ba sɔrɔn ka jamana lafa ii la mɔɔilu la.
Tɔrɔya damira waati Misiran
8 Nba, waati jan taminni kɔ rɔ, mansa kura do siira Misiran jamana kun na, mɛn tun ma foyi lɔn Yusufu la ko rɔ. 9 Mansa wo ka a fɔ a la mɔɔilu yɛ ko: «Ai ma a yen? Isirayɛlika ka siya an di. Ii la jama ka bon an na jama ri, a ni ii la fanka ka bon an na fanka ri. 10 Wo rɔ, an ye ɲaɲinin ii la ko ma. Ni wo tɛ, ii ri to siyayala. Ni kɛlɛ nara lon mɛn na, ii ri la an juuilu kan ka an kɛlɛ, ka ban ka bɔ an na jamana rɔ.» 11 Wo le rɔ, ii ka baara kuntiilu lasii Isirayɛlika kun na, ka ii tɔrɔ baara gbɛlɛn na. Wo bolo ma, Isirayɛlika ka Pitɔn so ni Ramɛsisi so lɔ. So woilu kɛra Ferawuna*Misirankailu ka ii la mansa bɛɛ tɔɔ kilili ko Ferawuna la fen namara dinkirailu ri. 12 Misirankailu ka Isirayɛlika tɔrɔ kojuuya, kɔni Isirayɛlika tora siyayala ka jɛnsɛn. Wo le kɛra sababu ri, Isirayɛlika la ko jiitɔya donda Misirankailu la kojuuya. 13 Ii ka Isirayɛlika mira karagbɛlɛya la ka ii bila baara gbɛlɛn na. 14 Ii ka ii tɔrɔ fɔɔ ka a dan natamin, ka ii bila baara gbɛlɛn bailu la. Ii ka ii lɔ diyagboya biriki gbasila, a ni bɔɔ bɔrɔnna, ka ii lɔ diyagboya sɛnɛ baara su bɛɛ kɛla. Ii ka ii lɔ diyagboya baara mɛnilu kɛla, woilu bɛɛ kɛra baara gbɛlɛn de ri.
Misiran mansa ka mɛn natɛɛ Isirayɛlika kanma
15 Nba, lon do rɔ, Misiran mansa kumara Heburuilu la tinkɔrɔsila fila yɛ. Wo kelen tɔɔ le ko Sifira, do wo tɔɔ ko Puwa. 16 A ka a fɔ woilu yɛ ko: «Ai wa wa Heburu musoilu dɛmɛn den sɔrɔn diya tuma tuma, ai ye den dagbɛ. Ni a kɛra cɛɛ ri, ai ye a faa. Ni a kɛra muso ri, ai ye a kɛndɛ to.» 17 Tinkɔrɔsilailu kɔnin silanda Alla yɛ. Misiran mansa ka mɛn fɔ, ii ma sɔn wo kɛla. Ii ka den cɛman kɛndɛ to. 18 Misiran mansa ka tinkɔrɔsilailu kili ka ii maɲininka ko: «Nfenna ai ka wo kɛ? Nfenna ai ra Heburuilu den cɛman to ye?»
19 Tinkɔrɔsilailu ka a fɔ ko: «Heburu musoilu tɛ ikomin Misiran musoilu. Ii kaliman moyila. Sani an ye don ii kan, wo ri a tɛrɛn ii ra ban moyila.»
20 Awa, Isirayɛlika tora siyayala. Fanka ba kɛra ii la. Alla ka ɲumaya kɛ tinkɔrɔsila woilu yɛ. 21 A ka denbaya di woilu fanan ma, ka a masɔrɔn ii silanda a yɛ.
22 Misiran mansa ka a la mɔɔ bɛɛ jamari ko: «Heburu musoilu wa den cɛmanta mɛnilu sɔrɔn, ai ye wo bɛɛ mira ka ii lafili Nili Ba ji rɔ, kɔni ai ye den musomanta kɛndɛ to.»