1 Wo le rɔ, nakelenɲɔɔmailu, n kanintenilu n lɔɔ ye mɛnilu la, mɛnilu kɛni sɛwa ni kunnafulen di n yɛ, ai ye to Maari rɔ gben gben ɲa mɛn ma, n kanintenilu.

2 Ewodi ni Sintiki, n ye ai madiyala, ai bɛn ai ɲɔɔn ma Maari rɔ. 3 Ile, n baaraɲɔɔ, landaya mɔɔ, n da i madiya, i ye wo musoilu dɛmɛn ka a masɔrɔn ii ra baara bakɛ n tɔrɔfɛ Isa la ko Kibaro Ɲuma la ko rɔ, wo ni Kelementi ni n duɲɔɔilu bɛɛ mɛnilu tɔɔilu sɛbɛni harijeene don kitabu kɔndɔ.

4 Ai ye sɛwa Maari la ko rɔ waati bɛɛ. N ye a fɔ fanan, ai ye sɛwa. 5 Mɔɔ bɛɛ ye a lɔn ko ai sabarini. Maari natɔla le sisen! 6 Ai kana hamin foyi la, kɔni ai ye ai makoilu fɔ Alla matara diya a ni baraka bila rɔ fen bɛɛ rɔ waati bɛɛ. 7 Nba, Alla ye jususuma mɛn dila, hankili foyi ti se a famunna, wo ri ai jusu ni ai miriya lakandan Ɲenematɔmɔnin Isa rɔ.

8 Nba, tɔɔla, nakelenɲɔɔmailu, ko mɛn di kɛ tuɲa ri, ko bɛrɛ, telen, sɛninya, ladiyaɲɛ, gbiliya ye ko mɛn dɔ, ni sɔn ɲuma le a ri, mɛn ka kan ka tandoli sɔrɔn, woilu ye kɛ ai miriyailu ri. 9 Ai ra karan mɛnilu sɔrɔn n na, ai ra mɛn namɛn n na wala ka a yen n kɛwaliilu rɔ, ai ye woilu kɛ. Wo rɔ, Alla la jususuma ri to ai fɛ.

10 N sɛwani Maari la ko rɔ kosɛbɛ baa ai ra ai janto n dɔ ikɔ tuun. Ai hamini tɛrɛ ye n yɛ yati kɔni ai ma fɛrɛ sɔrɔn ai ye a yiraka n na. 11 N tɛ ɲin fɔla ai yɛ n mako la ko rɔ, baa n da karan ka wasa kɛɲa su bɛɛ ma. 12 N da bolokolonya lɔn, n da dabundɛ lɔn. N da gbundu sɔrɔn ka wasa yɔrɔ bɛɛ ni waati bɛɛ, ni n fani wala ni n dɛsɛni, ni fen siyaman ye n bolo wala dɔɔni, baa 13 n di se ko bɛɛ kɛla Isa baraka rɔ mɛn ye fanka dila n ma.

14 Kɔni hali wo, ai ra koɲuma kɛ ka n dɛmɛn n na tɔrɔyailu rɔ. 15 Aile Filipikailu fanan jɛrɛ ka a lɔn, ai ka Isa la ko Kibaro Ɲuma ko mɛn waati mɛn na, n bɔtɔla Masedoni, aile le dɔrɔn ka sanba lana n ma lemɛniya jamailu tɛma. 16 Fanan, n tɛrɛ ye Tesaloniki so kɔndɔ waati mɛn na, siɲa fila, ai ka sanbailu lana n ma n mako tɛrɛ ye mɛnilu la. 17 N tɛ sanbali ɲininna n jɛrɛ yɛ, kɔni n ye a fɛ le ai ri ai kɔndɔn sɔrɔn. 18 Ai ka fen mɛnilu bɛɛ don Epaforodite bolo, n da ii bɛɛ masɔrɔn, woilu ra n makoilu bɛɛ ɲa, ka n wasa. A kɛni de ikomin wusulan mɛn ye janinna saraka ɲuma ri, mɛn ka Alla hɛnɛ. 19 Wo rɔ, n na Alla ri ai dɛmɛn ai mako bɛɛ rɔ a la dabundɛ rɔ Ɲenematɔmɔnin Isa baraka rɔ. 20 An ye gbiliya di an Fa Alla ma habadan haan habadan. Amina.

21 Ai ye jama sɛniman bɛɛ tuwa mɛnilu ye Isa Ɲenematɔmɔnin dɔ. An nakelenɲɔɔ mɛnilu ye n tɔrɔfɛ yan, woilu fanan ye ai tuwala. 22 Jama sɛniman mɛn bɛɛ ye yan, woilu ye ai tuwala, katarabi Rɔmu Mansaba wara mɔɔilu ma.

23 Maari Isa Ɲenematɔmɔnin na hina ye to ai la.