8
To Pagkayabow to Kasabutan no Ogdumayahon ni Jesus
1 Na, ko paulion ta to tibo nahisgutan kud on, seini to igpasabut. Si Jesus no iyan on kinayabawan no magdudumaya to pagtuu ta pigpaingkud on duon dapit to kalintuu no takidingan to Diyus diya to yangit pagpakiyaya to dongog dow katongod din. 2 Aw duon din on ogtumanon to katongdanan din su sikan to tinood no simbahan no pigtukud to Diyus, konad no angod to diya tulda no simbahan to diya karaan no panahon.
3 To otow no nahinang no kinayabawan no magdudumaya to tinuuhan to mgo Hibru, iyan trabahu din to paghalad to mgo mananap no ogtutungon dow to duma no igbogoy to kaotawan diya to Diyus. Na, manno si Jesus on to kinayabawan no magdudumaya to pagtuu ta, kinahangyan no meyduon isab ighalad din. 4 Ko dini da pa sikandin to kalibutan, kona sikandin ogka-magdudumaya su mey on man ogpamanuman to sikan mgo tumanon no insugu to mgo balaod no imbilin ni Moises. 5 Migtuman sikandan to katongdanan dan duon to kalibutanon no simbahan no yambung puli to sikan tinood no simbahan diya to yangit. Su no wada pad tukuda ni Moises to diya tulda no simbahan to diya una, pignongnong sikandin to Diyus no mig-iling, “Siguruha no mahinang nu sikan simbahan no angod to sikan impakita kud ikow kani to bubungan.”*Exodo 25:40 6 Di to pagtuman ni Jesus kuntoon diya to yangit yabow pad duon to pagtuman to diya mgo otow. Aw sikan bag-u no kasabutan no pig-abugaran din agun no madawat ki to Diyus yabow on isab duon to sikan tahan no kasabutan. Su yabow to mgo saad to Diyus no pigsikadan to sikan bag-u.
7 Su ko himpit pa to diya una no kasabutan, wada podom ilisi. 8 Di wada kasaja-i to Diyus to pamatasan to mgo otow no sakup to diya una no kasabutan. Kaling mig-iling sikandin,
“Meyduon panahon no ogtukud a to bag-u no kasabutan duon to tibo mgo kaliwat ni Israel dow ni Juda.
9 Kona sikan ogkaangod to diya una no kasabutan no pigtukud ku duon to mgo kaaw-apuan dan
no payuwason ku sikandan to Ehipto
angod to amoy no ogpikit to anak din.
Su wada kayugoy, migsupak sikandan to diya una no kasabutan ku kandan.
Kaling puli ku sikandan pigpabay-anan, kagi to Ginuu.
10 Na, seini to bag-u no kasabutan no oghinangon ku duon to mgo kaliwat ni Israel:
To mgo sugu ku igbotang ku duon to ginhawa dow hona-hona dan.
Og-angkonon a dan no Diyus dan,
aw og-angkonon ku isab sikandan no kaotawan ku.
11 Kaling konad no kinahangyan no mey pad ogpakiyaya kanay diya to duma,
su to tibo mgo otow, bantugan ko obos, ogkiyaya on kanay.
12 Oggawangon kud to mgo sae dan.
Kona kud ogdomdomon to mgo kayapasan dan.ӠJeremias 31:31-34
13 Na, manno mig-iling to Diyus no mey on bag-u no kasabutan, ogkamaanan ta no wadad pues to diya tahan. Aw kona ogkayugoy, ogkagawang on.