2
To Pagsunud to Pagpaobos ni Jesu-Cristo
1 Namaanan ku no nadasig kow tongod to pagkabogkot now duon ki Cristo aw nalipay kow tongod to gugma din iyu. Mighihilabi kow on duon to Ispiritu Santu, aw mighinigugmaay kow hasta migkinayuujay. 2 Kaling oghangyuon ku sikiyu no sabokahon now to hona-hona dow tuud now, aw hogota isab to paghinigugmaay now. Ko tumanon now sikan, ogkalipay a yagboy. 3 Kona kow oghinang to inggad nokoy tongod to pagkuntisan dow pagpayabow. Nasi no paobos kow aw isipa no yabow iyu to duma. 4 Kona no iyan da ogpayabihon now to iyu no kadojawan, di to kadojawan isab to duma. 5 Iyan sunudon now to batasan ni Cristo Jesus.
6 Diyus yagboy sikandin,
di wada din pangimpuesi sikan pagka-Diyus din.
7 Nasi no migpaobos sikandin
aw kahinang no otow no angod to suguonon.
8 Pagkahinang din on no otow,
migdugang pad to pagpaobos din
aw tumana din to tibo insugu kandin to Diyus
kotob to kamatajon din.
Aw wada ngani sikandin balibad inggad pad to kasikawan to pagyansang kandin duon to krus.
9 Kaling pigpayabow yagboy sikandin to Diyus
aw bogaji to katongod no wada ogpakayabow,
10 agun no tibo ogyuhud ki Jesu-Cristo,
mgo taga-yangit dow taga-pasak hasta inggad sikan nangkamatoy on.
11 Aw kada sobuuk og-iling no Magboboot si Jesu-Cristo to tibo
agun ogkasaja to Diyus no Amoy.
To Ogtang-ow to Seini Kalibutan
12 Kaling mgo hinigugma ku, manno kanunoy kow migsugut to sugu to Diyus no diyan a pad iyu, yabi pad no suguton now sikandin kuntoon no wada ad diyan. Pangimpuesi now yagboy sikan insangkap iyu to Diyus no yuwason kow din, aw tahuda now yagboy sikandin. 13 Su to Diyus iyan ogbogoy iyu to liyag to paghinang to madojow no ogkaliyagan din, aw ogtabangan kow din isab to pagtuman to sikan.
14 Inggad nokoy to oghinangon now, kona kow ogbagutbut dow ogyayalis, 15 agun no wada igkasawoy iyu. Na, ogkamaanan no matarong kow yagboy no mgo anak to Diyus inggad nakapagsakot kow pad to mangkadoot dow balingag no mgo otow kani to pasak. Maangod kow podom to mgo bituon diya to yangit no ogtang-ow kandan 16 pinaagi to pagnawnangon kandan to kagi to Diyus no ogpakabogoy to kinabuhi no wada katapusan. Ko hinangon now sikan, ogpakapamansag a ko mupauli si Jesu-Cristo, su ogkamaanan no migpues yagboy to mgo pagkaunag ku diyan iyu. 17 To pagsalig now ki Jesu-Cristo ogkaangod to inghalad now to Diyus. Aw ko mamatoy a, to yangosa ku kibali ighalad isab no igbu-bu duon to sikan halad now. Ko mailing to sikan, ogkalipay a aw ogpaglipay a iyu tibo. 18 Angay isab no ogpaglipay kow kanay.
Si Timoteo dow si Epafrodito
19 Ko iyan man pagboot ni Jesus no Ginuu ta, konad ogkayugoy ogsuguon kud si Timoteo to pagyouy iyu agun ogkalipay kow. Na, ko makapauli on sikandin, ogkanangonan a din bahin iyu agun no malipay a isab. 20 Sikandin da to duma ku no yagboy ogkaalikaka*Binisaya: nahingawa iyu angod to kanay no pagkaalikaka, 21 su to duma iyan da ogpayabihon dan to kandan kadojawan, kona no iyan ogpayabihon to mgo tuud ni Jesu-Cristo. 22 Di namaanan now no madojow to kinaiya ni Timoteo, su to pagbulig din kanay to pagnawnangon to sikan Madojow no Nawnangonon, angod to anak no ogbulig to amoy. 23 Kaling ogpaandiyaon ku dajun sikandin iyu ko mamaanan kud to ogkadeygan to seini kabotang ku. 24 Migsalig a to Ginuu no kona ogkayugoy ogpakaandiyan a isab.
25 Nahona-hona kud no kinahangyan ogpaulion ku diyan iyu si Epafrodito no suun ku to pagtuu no pigpaandini now to pagtabang kanay. Katimbang ku sikandin to pagtuman to igpahinang to Diyus dow to pagpanalipod to sikan Madojow no Nawnangonon. 26 Hilabi on sikandin pigmingaw iyu hasta nalimuut su nakadinog kow no nasakit sikandin. 27 Tinood iyan no nasakit aw pakamatajon man ngani, di pigkae-atan sikandin to Diyus. Pigkae-atan a din isab su ko namatoy pa si Epafrodito, ogkadugangan to kaguul ku. 28 Kaling ogkaliyag a yagboy no ogpaulion sikandin diyan iyu agun no ogtukhow kow ko kitaon now sikandin. Na ko ogkalipay kow, ogkaminus-minusan to pagkaalikaka†Binisaya: pagkahingawa ku iyu. 29 Ikalipay now yagboy to pagdawat kandin su suun ta man to pagtuu. Tahuda now sikandin dow to duma no angod kandin, 30 su tongod to mgo hinangonon no ki Cristo, ogkamatoy on podom sikandin. Wada din oyoga to kinabuhi din, su sikandin kibali sikiyu no migbulig kanay.