14
Ikiavɨra Itir God uan gumazamiziba ua me iniam
1 Eghtɨ Ikiavɨra Itir God uamategh Jekopɨn ovavir boribar apangkuvigham. A ua bagh Israelia mɨsevegham. Egh a men aku uamategh men nguazimra mangam. Eghtɨ Kantrin Igharazibar Gumazamiziba izɨ me ko ikɨ, men gumazamizibagh avagham. 2 Guizbangɨra, Kantrin Igharazibar Gumazamiziba, Israelia inigh men aku uamategh Israelian nguazimɨn izam, kar Ikiavɨra Itir Godɨn nguazim. Eghtɨ Israelia, gumazamizir kabar amutɨ, me pura Israelian ingangarir gumazamizir kɨnibar otivigham. Fomɨra Israelia kalabus gatɨzir darasi, me datɨrɨghɨn, Israelian kalabuziabar aven ikiam. Me fomɨra Israelia dɨkabɨragha paza me gami, me datɨrɨghɨn Israelian apengan ikɨtɨ, me me gativagham.
Atrivir bar gavgavir irɨzimɨn ighiam
3 Ia Israelia, Ikiavɨra Itir God ian mɨzazim ko dughiar kuram agɨvaghtɨ, ia deravɨra ikiam. Igharaz darazi ia abɨrima, ia men ingangarir mɨtɨabagh ami, eghtɨ osɨmtɨzir kam, datɨrɨghɨn gɨvagham. 4-5 Eghtɨ Ikiavɨra Itir God kamaghɨn damightɨ, ia Babilonɨn atrivim gɨnɨghnɨgh ighiar dɨbovir akar kam damuam. Ighiar kam kamakɨn:
“Maia! Ia ganigh, atrivir gavgavim irɨgha gɨfa.
Manmaghɨn amizɨ, atrivir puvɨra atara uan ziam fer kaba irɨ?
Ikiavɨra Itir Godra,
paza gumazibagh amir gumazir kurar kabar gavgavim agɨfa.
6 Atrivir kaba pura gumazamizibar anɨngaghegha paza me gami.
Egha me arazir kurabar kantrin igharazibagh amua, me gasɨghasɨghan avughsir puvatɨ.
Me dughiaba bar, kantrin igharazibar atara
osɨmtɨzir kuraba me ganɨga me gatifa.
7 “Ezɨ datɨrɨghɨn nguazir kamɨn ruaghateviba bar, avughsa navir amɨrizimɨn iti.
Dar gumazamiziba bar akuegha ighiabagh ami.
8 “Ezɨ Lebanonɨn kantrin ruarimɨn itir temer painba ko, temer sidaba, oregha fo,
Babilonɨn atrivim aremegha gɨfa.
Kamaghɨn amizɨ, me uaghan bar akonge.
Me ti ghaze, ‘Gumazitam ua izɨva e okan kogham. Bar dera!’
9 “Gumazamizir Oveaghuezibar Nguibamɨn, me nɨ iniasa bar akuegha
biziba akɨra iti.
Danganir kam ti kamaghɨn mɨgɨa ghaze,
Ia gumazir aruaba, dɨkav.
Ezɨ ia atriviba, ia uan atrivir dabirabiba ataghɨragh.
Ia bar izɨ gumazir izir kam batogh.
10 Me bar moghɨra nɨ dɨpov mɨgɨrɨgɨar kamɨn nɨ damuam,
‘Maia, e kamaghɨn nɨghnɨsi,
nɨn gavgavim ti bar en gavgavim gafira.
Ezɨ nɨn gavgavim datɨrɨghɨn bar gɨvazɨ nɨ en mɨn iti.
Nɨ gavgaviba puvatɨ.’
11 “Nɨ fomɨra kurkazir aghuibar uabɨn kurtima, gumazamiziba gitaba mɨsogha,
ighiabagh amua, nɨn ziar ekiam fe.
Ezɨ datɨrɨghɨn, nɨ Gumazamizir Oveaghuezibar Nguibamɨn itima, nguazimɨn apiziba nɨn dakozim gavagham.
Eghtɨ nɨ me gisɨn dakuam.
Eghtɨ kuruzir muziariba blanketɨn inimɨn mɨn nɨ avaragham.
12 Luk 10:18; Akar Mogomem 8:10; 9:1; 12:8-9“Nɨ fomɨra ziar bar ekiam ike.
Gumazamizibar damazimɨn, nɨ mati mɨzarazibar anadir mɨkovezir overiamɨn ikia isimɨn mɨn iti.
Ezɨ noka, nɨ datɨrɨghɨn irɨgha gɨfa.
Nɨ fomɨra mɨdorozir gumazir gavgavim itim.
Nɨ kantrin avɨriba agevir gumazim.
13 Nɨ ti kamaghɨn nɨghnɨsi,
‘Kɨ mɨkovezibagh afiragh, bar pɨn mar overiamɨn mavanabogham.
Egh kɨ uan atrivir dabirabim isɨ,
Godɨn mɨkovezibagh isɨn bar pɨn mar anefagham.
Egh kɨ uaghan izɨ, notɨn amadaghan itir mɨghsɨar aseba iza uari akuvi naghɨn,
a gisɨn bar pɨn mar daperaghɨv ikiam.
14 Kɨ ghuariabagh isɨn bar pɨn mar ghuanabogh,
Godɨn Bar Pɨn Itimɨn mɨn ikiam.’
15 “Ezɨ noka, nɨ irɨgha gɨfa,
nɨ bar vɨn mar magɨrɨ Gumazamizir Oveaghuezibar Nguibamɨn ikɨ,
egh nɨ bar apengan ikiam.
16 Egh nguibar kamɨn, oveaghuezir gumazamiziba nɨn apigh bar dɨgavir kuram damigham.
Egh me dɨkɨravɨra nɨn gan kamaghɨn azaragham,
‘Gumazir kamra ti, nguazim gamizɨ a ivazvazima,
kantrin igharazibar itir atriviba atiatia nɨsi, guisɨ?
17 Gumazir kamra ti, nguibar ekiabagh asɨghasɨghava, nguazim gamima,
a nguazir kɨnimɨn oto?
Gumazir kamra ti, kalabuziam gatɨzir gumazamizibar apangkuvizir puvatɨgha, me ataghizɨ,
me uamategha uan nguibabar ghuzir puvatɨ?
Are, gumazir kamra!’
18 “Atrivir igharaziba over dughiamɨn, gumazamiziba bar deravɨra men kuabagh amua,
mozir bar aghuibar me afi.
19 Ezɨ nɨ puvatɨ.
Nɨn kuam mati, gumazim temer aguam kurasa an anetugha anekunizɨ moghɨn,
me nɨn kuam akunizɨma a mozim giraghu.
Nɨn kuam tuavimɨn gumazir igharazir mɨdorozimɨn ovengezibar kuabar pozimɨn apengan iti.
Ezɨ gumazamiziba a dɨka ivemara mangɨ izegh gami.
Men duaba bar moghɨra,
gumazir ovegha gɨvazibar mozimɨn, bar vɨn mar magɨram.
20 Nɨ uan kantri gasɨghasigha,
uan gumazamiziba mɨsoghezɨ, me ariaghire.
Kamaghɨn amizɨ, me atrivir igharazibar mɨn deravɨra nɨn kuam akɨrigh,
anefaghan kogham.
Atrivir kurar kamɨn boriba,
nguazir kamɨn bar gɨvaghtɨ, bar deragham.
21 Kamaghɨn, an boriba, ia bar da inigh izɨ,
egh men inazir afeziabar arazir kuraba ikarvaghsɨ,
me mɨsoghtɨ me arɨghiregh.
Eghtɨ men tav ua ikian kogh, atrivimɨn otogh, ua kantribar ganan kogham.
Egh ua nguazir kamɨn danganiba bar dar mangɨ
nguibar ekiabar ingaran kogham.”
Ikiavɨra Itir God
Babilonia gasɨghasɨgham
Babilonia gasɨghasɨgham
22 Ikiavɨra Itir Godɨn Gavgaviba Bar Itim kamaghɨn mɨgei:
“Kɨ Ikiavɨra Itir God, kɨ uabɨ dɨkavigh mangɨ Babilonia mɨsoghɨva,
me gasɨghasɨgh bar me agɨvagham.
Kɨ men tav ateghtɨma a ikian kogham.
Bar puvatɨ.
Gumaziba ko, amiziba ko, boriba, bar gɨvagham.
23 Kɨ mati amizim uan bɨzimɨn mɨneziba avi moghɨn,
kɨ uan bɨzim isɨ Babilon bar anevigh anegɨvagham.
Kɨ Babilon damightɨ, mughuriar kuram itir beghneazim bar anevaragham.
Eghtɨ asɨzir atiaba an ikiam.
Kɨ Ikiavɨra Itir Godɨn Gavgaviba Bar Itim,
kɨ mɨkemegha gɨfa.”
Ikiavɨra Itir God,
Asiriabagh asɨghasɨgham
Asiriabagh asɨghasɨgham
24 Aisaia 10:5-34; Nahum 1:1--3:19; Sefanaia 2:13-15Ikiavɨra Itir Godɨn Gavgaviba Bar Itim kamaghɨn akar dɨkɨrɨzir mam gami:
“Bar guizbangɨra, bizir kɨ damuasa nɨghnigha gɨvazim,
kɨ a damuam.
25 Asiriaba nan nguazimɨn iza, nan gumazamizibagh amizɨ,
me osɨmtɨzir bar ekiam ateri.
Asiriaba pamtemɨn Israelia abɨrima, me puvɨra ingari,
mati bulmakaun mam, gumazim ter ararim an tuem gatɨgha, anebɨrima, a ingari.
Eghtɨ Asiriaba, Israelian nguazir mɨghsɨabar ikɨvɨra ikɨtɨ,
kɨ me dɨkabɨn bar me rɨghɨrigham.
Egh osɨmtɨzir ekiar Israelia aterir kam,
kɨ bar anegɨvagham.”
26 Nguazir kamɨn itir kantrin gavgaviba,
Ikiavɨra Itir God arazir kamra me damuasa nɨghnigha gɨfa.
Kamaghɨn amizɨ, a me gasɨghasɨghasa uan agharim ghufegha gara iti.
27 Ikiavɨra Itir Godɨn Gavgaviba Bar Itim, kamaghɨn damuasa nɨghnigha gɨfa,
ezɨ tina an anogoregham?
A uan agharim ghufegha gɨfa,
eghtɨ tav an agharim medagh magɨran iburagham.
Ikiavɨra Itir God
Filistiabagh asɨghasɨgham
Filistiabagh asɨghasɨgham
28 2 Atriviba 16:20; 2 Eghaghaniba 28:27Atrivim Ahas aremezɨ azenimɨn, Ikiavɨra Itir God akar mam anɨngi. Akar kam kamakɨn:
29 Jeremaia 47:1-7; Esekiel 25:15-17; Joel 3:4-8; Amos 1:6-8; Sefanaia 2:4-7; Sekaraia 9:5-7“Ia Filistian gumazamiziba, ia oragh.
Aghorir ian mɨsoghezir kam, a dɨpɨriaghirɨgha gɨfa, eghtɨ ia bizir kam bagh bar akongan markɨ.
Gɨn kuruzitam oveghtɨ, kuruzir kuratam an danganim iniam.
Egh kuruzir kam, a kuruzir bar kuram bateghtɨ,
an avɨziba ikɨ, egh mɨghɨ mangɨ izegh damuam.*Fofozir gumazir maba ghaze, Asirian atrivir mam aremezir dughiamɨn, Godɨn akam inigha izir gumazim Aisaia, ti akar kam akuri. An akar isɨn zuir kamɨn kamaghɨn mɨgei, atrivir igharaziba atrivir kamɨn danganim iniam, eghtɨ men arazir osɨmtɨzim kantrin igharazibagh anɨngamim bar ekevegham, egh atrivir kamɨn arazibagh afiragham.
30 Gumazamizir onganarazibagh amiba, me deravɨra ikiam.
Gumazamizir biziba puvatɨziba, me navir amɨrizim iniam.
Eghtɨ ia Filistiaba, kɨ mɨtɨriba azir dughiar bar ruarim amadaghtɨ, a izam.
Eghtɨ mɨtiriar azir kam, ian ikiavɨra itir varazira damutɨ,
me bar mɨtiriam bangɨn arɨghirɨ bar gevegham.
31 “Ia Filistian nguibar ekiaba ko, gumazamizir men itiba,
ia bar moghɨram atiatingɨva, nɨghɨva akong puv aziva, pamtemɨn dɨm gan,
mɨdorozir gumazir bar bɨzir dafam, notɨn amadaghan ikegha izi.
Me izima, mati avir mɨturim men gɨrakɨrangɨn otifi.
Mɨdorozir gumazir kaba, me mɨdorozir gumazir bar gavgaviba,
ezɨ, men tav uabɨra gɨn izir puvatɨ, me bar moghɨra uari inigha izi.”
32 E Israelia, e gantɨ, Filistian abuir gumaziba izɨ uarir akurvaghsɨ en azangsɨghtɨ,
e manmaghɨn men akam ikarvagham?
E kamaghɨn men akam ikarvagham,
“Ikiavɨra Itir God, Saionɨn nguibamɨn ingarigha a gamizɨ a tugha gavgafi.
Ezɨ an gumazamiziba osɨmtɨzir ekiaba me bativir dughiabar,
me a bagh mangɨ an aven modogh deravɨra ikiam.”
14:12: Luk 10:18; Akar Mogomem 8:10; 9:1; 12:8-9
14:24: Aisaia 10:5-34; Nahum 1:1--3:19; Sefanaia 2:13-15
14:28: 2 Atriviba 16:20; 2 Eghaghaniba 28:27
14:29: Jeremaia 47:1-7; Esekiel 25:15-17; Joel 3:4-8; Amos 1:6-8; Sefanaia 2:4-7; Sekaraia 9:5-7
*14:29: Fofozir gumazir maba ghaze, Asirian atrivir mam aremezir dughiamɨn, Godɨn akam inigha izir gumazim Aisaia, ti akar kam akuri. An akar isɨn zuir kamɨn kamaghɨn mɨgei, atrivir igharaziba atrivir kamɨn danganim iniam, eghtɨ men arazir osɨmtɨzim kantrin igharazibagh anɨngamim bar ekevegham, egh atrivir kamɨn arazibagh afiragham.