18
Ikiavɨra Itir God, akam Itiopian kantrin iti
1 Sefanaia 2:12Itiopian kantrin dɨpabar vongɨn itir gumazamiziba, mevzika!
Nguazir kamɨn apizir avɨriba an ikia, mɨgha mangɨn izegh gami.
2 Me uan abuir gumaziba amadima,
me ighuruniba inigha, da ikegha botbar ingarigha, dagh apiagha Nailɨn Fanemɨn uaghiri.
Ia Itiopiabar abuir gumaziba, ia zuamɨra zuir gumaziba,
ia uamategh uan kantrin gavgavimɨn mangɨ, kantrin dɨpar avɨriba itim.
Kantrin kamɨn itir gumazamiziba, me bar ruarigha, mɨkarziba bar dera.
Ezɨ ian kantrin kam, mɨdorozimɨn ziar ekiam iti,
ezɨ kantrin igharaziba bar an atiatingi.
3 Ia gumazamizir nguazir kamɨn ruaghatevim bar an itiba, ia bar oragh.
Ia gantɨ, me ababanitam mɨghsɨabar a kuazaghtɨ, ia deravɨram an gan.
Egh ia oraghtɨ me sɨghatam givitɨ,
ia kuariba arigh deragh a baragh.
4 Ikiavɨra Itir God kamaghɨn na mɨkeme,
“Kɨ uan Nguibamɨn ikiava, gumazamizibar arazibar gara,
puram aghumra ikia men gari.
Egha kɨ me gasɨghasɨghasa navim dɨkavir puvatɨ.
Kɨ me mɨzua pura nɨmɨra iti,
mati aruem nguazim gisirazɨma, an fefem ghuavanadi.
Egha kɨ mati dagheba iniamin dughiam roghɨra izima,
ghuariaba dɨmagaribar iza azenibagh iri moghɨn,
kɨ nɨmɨra ikia me mɨzuavɨra iti.”
5 Guizbangɨra, kantrin kam bar gavgafi,
mati wainɨn ikarɨzim deravɨram otogha, an akɨmariba otivigha irezɨ,
wainɨn ovɨziba kɨran oveghangɨn aniam.
Gumazim anɨngaghegha wainɨn ovɨzir ghuariba itir aguam atuzɨ a irɨzɨ moghɨn,
God kantrin kam gasɨghasɨgham.*Gumazir maba kamagh nɨghnɨsi, vezɨn kam kantri Itiopian mɨgei. Ezɨ gumazir igharaziba ghaze, a kantri Asirian mɨgei.
6 Ikiavɨra Itir God apaniba amadaghtɨ,
me izɨ kantrin kam bar a gasɨghasigham,
eghtɨ kantrin kamɨn mɨdorozir gumazibar kuaba pura tintinibar nguazim gireghɨv ikiam.
Eghtɨ kuarazir isaba ko, ruarimɨn itir asɨzir atiaba izɨ men kuabar amam.
Aruemɨn dughiamɨn, isaba izɨ dar amɨtɨ,
orangtɨzimɨn dughiamɨn, ruarimɨn itir asɨzir atiaba izɨ kuar kabar amam.
7 Dughiar kamɨn, Itiopian kantrin gumazamiziba bizir bar aghuiba inigh mangɨ
Ikiavɨra Itir Godɨn Gavgaviba Bar Itim danɨngam.
A kantrin gavgavim. A kantrin dɨpar bar avɨriba itim.
Kantrin kamɨn itir gumazamiziba bar ruarigha, mɨkarziba bar dera.
Egha kantrin kam, mɨdorozimɨn ziar ekiam iti, ezɨ kantrin igharaziba bar an atiatingi.
Eghtɨ me uan bizir aghuiba inigh izɨ Saionɨn Mɨghsɨamɨn izam.
Ikiavɨra Itir God, ua bagha danganir kam amɨsefe,
eghtɨ gumazamiziba an izɨ, an ziam fam.