55
God uan gumazamiziba deravɨra me damuasa me mɨgei
1 Jon 4:14; 7:37; Akar Mogomem 3:18; 21:6; 22:17Ikiavɨra Itir God kamaghɨn mɨgei,
“O gumazamizir dɨpam bagha kuariba pɨriba,
ia na bagh izɨ dɨpabar amɨ.
Ia gumazir dagɨaba puvatɨziba, ia na bagh izɨ, dagheba inigh dar amɨ.
Ia izɨ wainɨn dɨpaba ko oter eborim inigh, dar iveziba puvatɨ.
2 Manmagh amizɨ, ia ingangarir dafam gamua uan dagɨaba isa pura bizir ian akurvazir puvatɨziba bagha da agefi,
ezɨ mɨtiriaba ian aghavɨra iti?
Ia kuariba arigh deravɨra nan akam baragh, kɨ mɨkemezɨ moghɨn damu,
egh dagher guar aghuir avɨrir kɨ ia ganɨngiziba izɨvagham.
Dagher kaba bar isɨngigh gavgavim ia danɨngam.
3 2 Samuel 7:8; Onger Akaba 89:28; Aposel 13:34Ia nan gumazamiziba, ia izɨ kuariba arigh na baragh,
ian ikɨrɨmɨrim deragham.
Eghtɨ kɨ Atrivim Devit ganɨngizir apangkuvir arazim ia danɨngɨsɨ,
Akar Dɨkɨrɨzir Gavgavim ia ko a damigham,
eghtɨ a gavgavigh ikɨvɨra ikiam.
4 Ia oragh, kɨ Devit gamizɨ,
a gumazir ekiamɨn otogha, Kantrin Igharazibar Gumazamizibagh ativagha men gari.
Anarɨra, nan gavgavim isa gumazamizibar aka.
5 Ia fomɨra kantrin igharazir maba, ia me gɨfozir puvatɨ, ezɨ me uaghan ia gɨfozir puvatɨ.
Eghtɨ ia men dɨmam.
Kɨ Ikiavɨra Itir God, ian God, kɨ Israelian Godɨn Bar Zuezim,
kɨ datɨrɨghɨn ziar ekiam isa ia ganɨngigha gɨfa.
Kamaghɨn amizɨ, ia kantrin kabar amightɨ,
me zuamɨra ivegh ia bagh izegham.”
6 Matyu 5:25; 25:11; Jon 8:21; 2 Korin 6:1-2“Ikiavɨra Itir God bar ian boroghɨra ikia ia mɨzua iti.
Kamaghɨn, ia datɨrɨghɨn a buri izɨ an dɨmɨva, a baghvɨra ikɨ.
7 Onger Akaba 130:7; Jeremaia 3:12; Esekiel 18:27-28Eghtɨ gumazamizir arazir kurabagh amiba uan arazir kuraba ategh,
uam adar amusɨ nɨghnɨghan kogham.
Egh me uamategh Ikiavɨra Itir God, en God, a bagh izɨtɨ,
a men apangkuvigh men arazir kuraba gɨn amangam.”
8 2 Samuel 7:19Ikiavɨra Itir God ghaze,
“Ia gumazamiziba ian nɨghnɨziba, nan nɨghnɨzibar mɨn zuir puvatɨ.
Ezɨ nan araziba, ian arazibar mɨn itir puvatɨ.
9 Onger Akaba 103:11Overiam bar nguazim gafiragha pɨn mar iti moghɨn,
nan araziba ko nɨghnɨziba,
da ian araziba ko nɨghnɨziba bar dagh afira.
10 2 Korin 9:10E fo, amozim overiamɨn ikia izaghira, pura uamategha ghuavanadir puvatɨ.
A dɨpam nguazim ganɨga, daghebagh amima da azenibar aghuima,
gumazamiziba da isa dar maba apava, maba opari.
11 Aisaia 54:9Ezɨ kamaghɨra, nan akam uaghan, pura uamategh na bagh izeghan kogham.
Puvatɨ. A kɨ mɨkemezɨ moghɨra bizibar amutɨ da otivam.
Eghtɨ ingangarir kɨ damuasa ifongeziba,
a adar amutɨ dar dagheba otivam.
12 “Ia kalabus ategh bar akuegh mangam,
eghtɨ kɨ ia inigh izɨtɨ,
ia navir amɨrizim ikɨtɨ, bizir ia damutɨ ia atiatingamin tam, ia damuan kogham.
Mɨghsɨaba, ian damazibar ighiabar amu bar akuegham,
eghtɨ temeba bar akuegh dafaribav sogh ighiabar amuam.
13 Temer kurar dɨkoniba itir danganim, datɨrɨghɨn temer painba a bativ an aghungam.
Eghtɨ temer muziarir bar aghuiba datɨrɨghɨn benir ataghatariba ikezɨ naghɨn ikiam.
Egh temer aghuir kaba zurara danganir kamɨn otivam, eghtɨ bizir kam ababanimɨn mɨn ikiam.
Eghtɨ gumazamiziba zurazurara bizir kamɨn gan,
Ikiavɨra Itir God amizir ingangarir gavgavibagh nɨghnɨgham.”