63
Ekiam ivezir kuram isa uan apanibagh anɨdi
1 Aisaia 34:5-17; Jeremaia 49:7-22; Esekiel 25:12-14; 35:1-15; Amos 1:11-12; Obadia 1:1-14; Malakai 1:2-5Ia gan! Mar gumazir manam atrivimɨn mɨn bar deravɨra kurkegha Idomɨn kantrin aven,
Bosran nguibam ategha azenan izi?
Mar gumazir manam uan dapanim aviragha uan gavgavir ekiam sara izi?
Ezɨ an korotiam bar aghevezɨ moghɨn gari.
“Kar kɨ Ekiamra.
Kɨ gumazamizibar akurvazir gavgavim iti, egha kɨ kamaghɨn mɨkɨmasa,
nan arazir aghuimɨn, kɨ men apaniba abɨragha gɨfa!”
2 Nɨn korotiaba tizim bagha bar aghefe?
Da mati gumazim wainɨn dɨpabar ingarasa, wainɨn ovɨziba mɨrmɨramin dagɨar mɨner bar ekiamɨn aven ghugha,
wainɨn ovɨziba dɨkabɨrima, wainɨn dɨpar aghevir avɨrim otozɨ moghɨn aghefe.
3 Akar Mogomem 14:20; 19:13-15“Kɨ uabɨra, kɨ wainɨn ovɨziba dɨkabɨra da mɨrmɨri moghɨn, kantriba dɨkabɨri,
ezɨ kantrin tamɨn gumazitam nan akurazir puvatɨ.
Kɨ men atara bar men anɨngaghe,
egha bar pamtemɨn me dɨkarazɨ,
men ghuziba pura tintinibar asavamaga, nan korotiabagh ira dar poke.
4 Kɨ uan navir averiamɨn aven uan gumazamizibar apaniba ikarvagh, me gasɨghasɨghamin dughiam gɨnɨghnɨghavɨra iti.
Ezɨ datɨrɨghɨn dughiar kɨ ua gumazamiziba iniamim otogha gɨfa.
5 Onger Akaba 44:3; 98:1; Aisaia 59:16Kɨ garima, nan akurvaghamin gumaziba puvatɨ, kamaghɨn amizɨ,
kɨ dɨgavir kuram gami.
Ezɨ nan gavgavim ko nan anɨngagharimra na gamima,
kɨ uan gumazamizibar apaniba abɨra.
6 Nan anɨngagharir bar ekiam na gamima,
kɨ ikɨzir avɨribar gumazamiziba dɨkabɨni.
Kɨ puv me gamua uan anɨngagharim men akazɨ, me a baraki,
mati me nan anɨngagharim itir itarimɨn wainɨn dɨpam ame, egha bar ongani.
Ezɨ kɨ me mɨsogha
men ghuziba isa nguazim ginge.”
Gumazamiziba Ikiavɨra Itir Godɨn arazir aghuim gɨnɨghnɨsi
7 1 Atriviba 8:66; Nehemia 9:25; 9:35; Onger Akaba 92:2Kɨ Ikiavɨra Itir Godɨn apangkuvir ekiamɨn gun mɨkɨmasa.
Egh an arazir aghuim bagh an ziam fam.
E Israelia, God en akurvagha bizir aghuir bar avɨriba isa e ganɨdi.
Egha bar deravɨra e gamizɨ, e an ziam fe.
Guizbangɨra, a bar e gifuegha apangkuvir ekiam en iti.
8 E fo, Ikiavɨra Itir God kamaghɨn mɨkemegha gɨfa,
“Gumazamizir kaba, me nan gumazamizibara.
Egh me nan akaba batogh, na gifaran kogham.”
Kamaghɨn amizɨ, a men osɨmtɨzibar tongɨn men Akurvazir Gumazimɨn oto.
9 Gumazir Dapaniba 10:16; Malakai 3:1; Aposel 9:4; 12:11Egha me mɨzaziba ko osɨmtɨziba aterir dughiamɨn,
Ekiam uaghan me ko mɨzaziba ko osɨmtɨziba ateri.
God uabɨ, ensel o abuir gumazimɨn mɨn otogha ua me ini.
Bar fomɨra an ifongiam ko apangkuvim men ikiavɨra iti,
kamaghɨn amizɨ, a dughiar bar ruarimɨn me atera bar deravɨra men gari.
Bizir kam bagha, a men akurvasi.
10 Guizbangɨra, me a barazir puvatɨghava, an Duam gamima a bar oseme.
Kamaghɨn amizɨ, God uabɨ men apanimɨn mɨn otogha,
me ko mɨsosi.
11 Egha me gɨn God fomɨram amizir bizibagh nɨghnɨsi.
Men nɨghnɨzim uamategha Moses ko an gumazamizibar ghua kamaghɨn mɨgei:
“Ikiavɨra Itir God managh iti?
A fomɨra uan gumazamiziba ko, men gumazir dapaniba inigha izima,
me iza ongarim abigha vongɨn oto.
Ikiavɨra Itir God managh iti?
A fomɨram uan Duam amadazɨ, a men tongɨn iti.
12 Ua Me Ini 14:21-22A uan gavgavir bar ekiam isa Moses ganɨngi.
Ezɨ an ongarim tongɨram an abɨghizɨ, an akuar pumuningɨn otozɨ, an gumazamiziba vongɨn ghue.
Ezɨ arazir kamɨn, a zurara ikiamin ziar ekiam ini.
13 A men faragha zuima, me tuavir ongarir bar konimɨn itimɨn aruava an gɨn zui.
Egha me ghua dɨpaba puvatɨzir danganimɨn itir, hoziar atiabar mɨn
pamtemɨn dɨka ghua daghirezir puvatɨ.
14 Ikiavɨra Itir Godɨn Duam uabɨ, an gumazamiziba avughsazim isa me ganɨngi,
mati bulmakauba ghua danganir zarimɨn ikia ogheba apava, avughsa iti.”
Ikiavɨra Itir God, nɨ kamaghɨn ifonge,
gumazamiziba bar nɨn gavgavim ko ziar ekiam gɨfogham.
Kamaghɨn amizɨ, nɨ uan gumazamizibar akua zui.
Israelia Ikiavɨra Itir God men akurvaghasa, me an azangsɨsi
15 O Ikiavɨra Itir God, nɨ uan Nguibamɨn iti, nguibar kam nɨn gavgavim ko angazangarim a gizɨfa.
Eghtɨ nɨ pɨn ikɨ vazimɨn en gan.
Nɨ tizim bagh dɨkavigh uan arazir e baghavɨra itim ko gavgavir ekiam en akakaghan aghua?
Nɨ ti uamategh uan apangkuvim ko ifongiar uan navir averiamɨn aven itim, en akakaghan aghua.
Nɨ ti uam e gifongezir puvatɨz, o?
16 O Ikiavɨra Itir God, nɨ bar guizbangɨra en Afeziam.
En inazir afeziamning, Abraham ko Jekop,
aning ua e ko itir puvatɨ, egha e gɨfozir puvatɨ.
Ezɨ nɨrara, nɨ fomɨram en Akurvazir Gumazimɨn ikia,
e geghuva deragha en gara iza datɨrɨghɨn tu.
17 O Ikiavɨra Itir God, nɨ manmaghsua e gamizɨ,
e tintinibar ghua nɨn akabar gɨn zuir puvatɨ?
Egha manmaghsua, nɨ en naviba ko nɨghnɨzibagh amizɨ,
e nɨn atiatia nɨn apengan itir puvatɨ?
E nɨn ingangarir gumazir nɨ ua baghavɨra inabaziba,
e nɨn anabamra, egha nɨ baghavɨra iti.
Kamaghɨn amizɨ, nɨ uamategh e ko ikɨ.
18 E nɨn gumazamizibara.
Ezɨ Dɨpenir nɨ ua baghavɨra inabazim, a bar dughiar otevimɨn en agharimɨn iti.
Ezɨ gɨn en apaniba iza nɨn Dɨpenim gasɨghasɨki.
19 Ezɨ e datɨrɨghɨn mati gumazamizir nɨ fomɨra me gativazir puvatɨziba.
Egha mati gumazamizir nɨ uan ziam me gatɨzir puvatɨzibar mɨn iti.
63:1: Aisaia 34:5-17; Jeremaia 49:7-22; Esekiel 25:12-14; 35:1-15; Amos 1:11-12; Obadia 1:1-14; Malakai 1:2-5
63:3: Akar Mogomem 14:20; 19:13-15
63:5: Onger Akaba 44:3; 98:1; Aisaia 59:16
63:7: 1 Atriviba 8:66; Nehemia 9:25; 9:35; Onger Akaba 92:2
63:9: Gumazir Dapaniba 10:16; Malakai 3:1; Aposel 9:4; 12:11
63:12: Ua Me Ini 14:21-22