72
God atrivimɨn akurvaghasa, gumazim a bagha God ko mɨgei
Solomon ighiar kam osiri.
1 O God, nɨ uan arazir aghuiba deravɨra atrivim geghan.
Eghtɨ a kotɨn aven deragh gumazamiziba tuisɨgham.
Nɨn kotiar araziba, da bar guizbangɨra zui,
egh nɨ atrivir kamɨn akuraghtɨ an kotiar araziba guizbangɨra mangɨ.
2 Eghtɨ a nɨn gumazamiziba ko gumazir onganarazibagh amiba,
an arazir aghuimra me gativagh,
guizɨn arazimɨn gɨn mangɨ men araziba tuisɨgham.
3 Nɨ men ingangaribar aven bizir aghuir avɨribar amutɨ,
men dabirabim deragham.
Nɨ gumazamizibar amutɨ,
me arazir aghuibar gɨn mangɨ.
4 Atrivim deragh onganarazibagh amir gumazamizibar akurvagh men osɨmtɨziba akɨram.
A biziba puvatɨzir gumazamizibar akurvagham.
Egh gumazir igharaz darazi gasɨghasɨghasava amiba, a me abɨnam.
5 O God, kɨ kamaghɨn nɨn azai.
Aruem ko iakɨnim isiragh ikɨvɨra ikɨtɨ,
nɨn gumazamiziba zurara nɨn ziam fam.
6 Nɨ atrivim damightɨ a gumazir aghuimɨn mɨn ikɨtɨ,
an arazir aghuiba, amozim azenibagh izi,
dagheba dar aghui moghɨn ikiam.
7 A ikɨvɨra ikiamin dughiar kam, gumazamiziba arazir aghuimra gɨn mangam.
Iakɨnim isiraghavɨra itir dughiamɨn,
dabirabir aghuim otiv mangɨvɨra ikiam.
8 Sekaraia 9:10An atrivimɨn ikɨ ongarimɨn roghɨra itir gumazamiziba ko saghon itiba, a me gativagh men ganam.
Eghtɨ an nguazir oteviba, Yufretisɨn Fanemɨn ikegh mangɨ nguazir kam bar an mangam.
9 Atrivir kamɨn apanir maba dɨpaba puvatɨzir danganimɨn ikɨ a bagh teviba apɨram.
An apaniba an damazimɨn nguazim giregham.
10 Spenɨn kantrin atriviba ko arighatɨzibar atriviba, me bizir aghuiba a danɨngam.
Egh uaghan, Seban kantri ko, Arebian kantrin atriviba, me a bagh takisba inigh izam.
11 Atriviba bar izɨ a bagh teviba apɨram.
Eghtɨ kantriba bar, dar gumazamiziba an ingangaribar amuam.
12 Guizbangɨra, an onganarazibagh amir gumazamizibar dɨmdiaba baragha men akurvasi.
Gumazir onganarazibagh amua akurvaziba men puvatɨziba,
a uabɨ men akurvasi.
13 Gumazamizir onganarazibagh amua gavgaviba puvatɨziba,
a men apangkufi.
Gumazir biziba puvatɨziba a ua me isi.
14 Onger Akaba 116:15Gumazamizir arazir kurabagh amiba, me gasɨghasɨgh me abɨnsɨ damutɨ,
a men akuragh ua me iniam.
An ifongiam bar men ekevezɨ, an arazir kabar me gami.
15 Atrivimɨn ikɨrɨmɨrim a ruaragham.
Eghtɨ Arebian kantrin gumaziba gol a danɨngam.
Gumazamiziba a bagh God ko mɨkɨmtɨ,
God zurara deravɨra a damu an akurvagham.
16 Dagher avɨriba Lebanonɨn kantrin otivi moghɨn, gumazamizibar azenibar otiv.
Eghtɨ gumazamiziba bar avɨrasemegh nguibabar ikɨ,
egh grazibar mɨn danganiba bar dar ikɨ.
17 Jenesis 22:18; Jeremaia 4:2Gumazamiziba, atrivir kamɨn ziam gɨnamangan kogham.
Dughiaba bar, aruem tɨghar maghɨn anangtɨ, gumazamiziba ziar ekiam atrivir kam danɨngam.
Egh gumazamiziba an ziam fam.
God deragha atrivim gamir arazir kam bagh,
me uaghan kamaghɨra deragh uari damusɨ Godɨn azangsɨgham.
18 E Israelian Ikiavɨra Itir Godɨn ziam fam.
A bar uabɨra arazarazir aghuir kabagh amima da otifi.
19 E zurara an ziar aghuir kam fɨvɨra ikiam.
Bar guizbangɨra. An ziar Ekiam nguazir kam bar a gizɨfagh.
20 Kar Jesin otarim Devit,
an azangsɨziba kamaghɨra tu.