2
1 ✡ Ibr 7:25-26Ne utunaiwa, mame ne yenan teeni, me ye kukaeba den atan oya. Da bira kukaeba apewa, Apan da me Mamunwa namive nunan oya papara vintan gae waiviwa wakene. Me Iesu Keriso oraivitwa. 2 ✡ Jon 1:29; 1Ko 1:20; 1Jn 4:10Apan mame me kukaeba anog yankwetan puyo maeba nu kukaeba numawa oya, sira kukaeba numawa mekut onan piyu mame kukaeba muma undag oya.
3 Nu Gwangwan meuma yumnattuwa, oma ane wata nu God yaug anotu. 4 Apan da mamaib wape, “Ne God yaug anona,” megara me God Gwangwan meuma gumbe den nau aigimpewa, me uga abnawa, natawa me gumbe den wakene. 5 ✡ Jon 14:21,23Megara bira da gae meuma noiwa aupewa, God baigan meuma natawairen me gumbe noidauwape. Mame gumbe nu yaug anotu nu God danave. 6 Bira da me wapewa, “Ne God danave.” Me wakeigimpe Iesu aine mina.
7 ✡ Jon 13:34; 2Jn 5-6Owanaiwa. Ne Gwangwan mataiwa yenan den teeni. Me Gwangwan nunganwa me wait utu namuiren anoyanawa. Gwangwan nunganwa me Gae me ye wait anoyanawa. 8 ✡ Jon 1:9; Rom 13:12Megara gare ne Gwangwan mataiwa mina yenan teeni. Me natawa Keriso gumbe, sira ye guniyap gaibu. Kuiyawa aram sisip uwag aine sira natawa eyawa me wait esine.
9 ✡ 1Jn 4:20Da bira aib wape, “Ne eyawa gumbe wakena.” Megara me tatawa gumbe topai apewa, me ande aram sisip dana wakene. 10 ✡ Rom 14:13Da bira tatawa gumbe baigan aiviwa, me eyawa gumbe wakene, sira den aippe. 11 ✡ Jon 12:35Da bira tatawa gumbe topai aiviwa, me aram sisip danave wakene, sira me aram sisip danave gigivi. Me den yaug anone me ampa aivi, kuiyawa aram sisip me yangawa tobodne.
12 Ne utuntainanwa. Ne yenan gigirum teeni,
kuiyawa kukaeba yeuma Ayapan iviwa gumbe anog yankwene.
13 Mamanaiwa. Ne yenan gigirum teeni,
kuiyawa ye yaug anoyana utupa namuiren wakenewa.
Ud mataiwa. Ne yenan gigirum teeni,
kuiyawa ye kukaeba abnawa gumbe garawa auyana.
Ud usiusi neuma. Ne yenan gigirum teeni, kuiyawa ye Mamunwa yaug anoyana.
14 Mamanaiwa. Ne yenan gigirum tena,
kuiyawa ye Mamunwa yaug anoyana utupa namuiren wakenewa.
Ud mataiwa. Ne yenan gigirum tena, kuiyawa ye yusiyusi ene,
God gae meuma ye guniyap wakeivi, sira ye kukaeba abnawa gumbe garawa auyana.
Piyu Mame Gumbe Baigan Den Aya
15 ✡ Rom 8:7Piyu mame go divi da piyu mame danave wakenewa gumbe baigan den aigimiya. Da bira piyu mame gumbe baigan aigimpewa, me Mamunwa gumbe baigan den wakene. 16 ✡ Rom 13:14Dividivi undag piyu mame danave wakenewa—apan ano kukaeba imive anoiviwa, yangut yanga visive aiviwa, sira inaiinai waiya waiyaeba aivi me aninin wakeiviwa—anoano mame Mamunwa gumbe den onne, me piyu mame apa onne. 17 ✡ Mat 7:21Piyu mame ge anoano meuma matai onanape. Megara bira da God anoano meuma gumbe aiviwa me wakeigimpe yaibobot.
Keriso Anaviyawa
18 ✡ Mat 24:5,24; 2Jn 7Utuntainanwa, kum mame kum oieba. Ye wait anoyana Keriso anaviyawa di onivi. Gare mina Keriso anaviyawa obiren wait uwaya. Mame gumbe nu yaug anotu kum mame kum oieba. 19 ✡ Apa 20:30Mu nu gunup dauwag amiya, go mu numawa da onan di. Mu numawa ipawa, mu nu gunup wakepono. Mu amiyawa me taibe ane, mu undag numawa da onan.
20 ✡ 1Ko 2:15; 2Ko 1:21; 2Jn 2Ye undag ano natawa yaug anoyana, kuiyawa Iyakaisiyapama Abnawa me oira egeyap areriyane. 21 Ne ye guniyap gigirum teeni, kuiyawa ye ano natawa anoyana. Ye den yaug anopono ipawa, den tepopo. Sira gae uga me gae natawa gumbe den onivi. 22 ✡ 1Jn 4:3; 2Jn 7Gae uga abnawa me bira? Uga abnawa me apan bira aib waivi, “Iesu me Keriso onan.” Me gae uyai wane Mamunwa ge Usiwa oya. Mame Keriso anaviyawa di. 23 ✡ Jon 5:23; 1Jn 4:15; 5:1Bira da Usiwa gumbe uyai waiviwa me Mamunwa den aune. Bira da me Usiwa oya taibe wapewa me Mamunwa gaibu aupe.
24 Yaiyai yaug anoya, ande gae namuiren anoyana me ye daneyap barauya wakepe. Meib wakepewa, ye mina meib matai ande wakeya Usiwa ge Mamunwa gumbe. 25 Mame inaiinai yaibobot me Keriso membo agi nunnewa.
26 Ne gigirum mame yenan teeni iyayapan oya, mu yenan namuyoiyoi eme gae uga muma gumbe. 27 ✡ Jon 16:13Sira yenan oya, Keriso oira egamnewa me ye auya, sira me ye daneyap ande wakeivi. Meoya ye imuyap den wakene bira da wag toyau yempe. Kuiyawa oira meumawa me ye wag toyau yempe dividivi undag oya, sira me toyau yennewa me natawa di, me uga onan. Me ye wag toyau yenne mina Keriso gumbe wakeigimiya.
God Usitainawa
28 Sira gare, utuntainanwa, Keriso gumbe yunat aisiya. Matai me uwapewa nu ano yusiyusi ata, sira kum me uwapewa me namive ubmam den ata. 29 ✡ 1Jn 3:10Me oraivitwa me ye yaug anoya ipewa, ye yaug anoya da bira oraiwa aiviwa me gumbe yaine.