1 ✡Apa 18:19-21; 19:1Poru me God ano meumawa gumbe Iesu Keriso apasoro meuma anawa, Epesas iyakaisi igiyawa mu Keriso Iesu gumbe anotumat enewa yenan.

2 Mamunwa God ge Ayapan Iesu Keriso gumbo, Ano oraiwa ge yum ye guniyap wakeigimpe.

3 ✡Epe 2:6Ne anoeniwa, iyayapan mu God me Ayapan numawa Iesu Keriso Mamawa waiya wampe. Iesu Keriso gumbe, guwawa waribiyatanwa kwiminauwa undag gumbe, God waribiya nunne. 4-5 ✡Jon 1:12; 15:16Kuiyawa namu God me Iesu gumbe wagomiya nunne, ivi piyu mame wadne. Me imive nu God namive iyakaisi ata sira nu pui den yunumpe igiyawa ata. God me anoano meuma ge baigan gumbe meib atanwa wait anone. Iesu Keriso gumbe nu utampe nu God usitainaven ata. 6 Me iyayapan mu eyawa ano oraiwa me God nonemagawa gumbe nunnewa waiyatan oya. 7 ✡Epe 2:7; 1Ko 1:14Di meuma gumbe nu sira gwiruwad nunne. Me gumbe, kukaeba numa wait anog yankwene. God ano oraiwa koka gumbe mame ane. 8-9 ✡Rom 16:25God ano oraiwa mame nunne noidauwane. Anoano oraiwa ge ano kokavit anoiviwa undag gumbo, ano meuma guwavewa ano nunne. Me yumat meuma me namuiren Keriso danave wadnewa gumbe, matadne. 10 ✡1Ko 1:16,20Kum uwapewa, ano meuma me kum mame oya me aug ape. Dividivi undag kwiminauwa ge piyuwauwa wakeyawa Keriso gumbe undag agoniyape. 11 ✡Rom 8:28-29Keriso gumbe, nu kwan autan igiyawa atu. God oma ane wape yumat meuma undag veniyape. Me anoiviwa gumbe, ano meuma gumbe dividivi mame nunan watavit baraune. 12 Me nu Keriso gumbe owanowan ag onantu igiyawa God eyawa meuma waiyatan oya. 13 Ye gaibu Keriso gumbe anoyana gae natawa me gae oraiwa ye waita yentanwa oya. Sira ye anotumat ayana. Meoya God me irai baraug yenne Guwawa Iyakaisiyapama me agi wanewa gumbe. 14 ✡2Ko 1:22Guwawa Iyakaisiyapama me agi mame wat kiniyaiviwa. Mame me God iyayapan meumawa sira gwiruwattanwa oya, sira mame me God eyawa waiyatan oya.

15-16 Kuiyawa mame gumbe, ne anona anotumat yeuma Ayapan Iesu gumbe sira baigan yeuma iyakaisi igiyawa undag gumbo, meoya ne evedni God gumbe yenanwa oya gaun veni, sira yenanwa oya nun veni. 17 ✡1Ko 1:9Ayapan numa Iesu Keriso God meuma me Mamawa me eyawa danave. Ne anoeniwa, Mamawa mame me Guwawa yempe me anoano oraiwa sira toyau ge toewan yempe God yaug anotan oya. 18 Sira ne anoeniwa, yangewa nonemagewa esipe, sira ye owanowan me God au meuma yempewa me aninin yaug anoya. Sira kwan me iyayapan iyakaisi aupewa me eyawa koka danave wakene me aninin oraimina oya yaug anoya. 19 ✡1Ko 1:11God yusiwa kokavitwa gumbe God me nu anotumat igiyawa gunup nau aivi. Ne anoeniwa, God yusiwa kokavitwa me aninin ye oma ane yaug anomon. 20 ✡Sam 110:1; 2Ko 13:4; 1Ko 2:12God yusiwa kokavitwa meuma Keriso gumbe ane, sira ane Keriso bo igiyawa gumbo sira inaine, sira kwiminau God ane Me naniyutanwa apa wakene. 21 ✡1Ko 1:16; 2:10Yusiwa namuyoiyoi atanwa undag, ano yusiwa undag, yusipamitwa undag, yusiwa kokavitwa undag, sira ivuwa obiren me piyu mame egave sira piyu da matai oniviwa egave God ane Keriso painau baraune wakene. 22 ✡Sam 8:6Sira God me dividivi undag Keriso amawa ankwatave tene. Dividivi undag, Keriso me kuiyawa. God me Keriso siosi wanne. 23 ✡Rom 12:5; Epe 4:10,15; 1Ko 1:18Siosi me Keriso kwapiwa. Keriso me oma ane dividivi undag gumbe dividivi undag ape noidauwape. Siosi undag me gumbe noidauwane.