12
Vesin Ge Mae Dragon
1 Kokawa ge ano pipanum irawa kwiminau matadne. Vesin da kum enne, dud me amawa ankwatave, kuiyave kin keretawa me marantun 12 gaibu. 2 ✡Mik 4:10Me bug ane. Me ud barautan oya dawai aug awau wane. 3 ✡Dan 7:7Irawa dawa kwiminau matadne. Yawa. Mae dragon koka burutatae. Me kuiyawa 7, kuiya donawa 10 sira kuiya egave kin keretawa 7 gaibu. 4 ✡Dan 8:10Me viriwa kwimin buwanaeba duwamdesi danave kebayawa desirom ororiyag piyu egave emene. Sira vesin me ud barautan aivi, mae dragon vesin namive yokene. Kuiyawa vesin ud baraunewa mae dragon ud meuma natan oya. 5 ✡Sam 2:9; Ais 7:14; 66:7; Rev 19:15Vesin me ud apan baraune. Ud mame at sinsin igiyawa undag tutu aiyan gumbe wariyawa gumbe amarape. Sira ud mame God ge kin seyaeba gumbe dog aipe. 6 Vesin at inguiwa arawa a aine. At me God menan tamibarip ane, sira me apa oiyat 1,260 danave amara wanigimpe.
7 ✡Jud 9Kwiminau mut pawane. Maikeru ge aneya meumawa mae dragon gaibu mut aya. Mae dragon ge aneya meumawa mut garawa gumbo aya. 8 Megara, yutuwa muma oma den ane. Sira kwiminau at mumawa den wakene. 9 ✡Gen 3:1,14; Ruk 10:18; 22:31; Rev 20:2Mae dragon kokawa me iyayapan airapu kukaeba kokawa go Seitan veme. Me piyu igiyawa undag ugai munne. Sira mokare tayawa me piyu egave aorene aigne. Aneya meumawa gaibu. 10 ✡Job 1:9-11; Jak 3:1Me kumive ne kwiminau noiwa kokavit anona. Me waivi,
“Gare God numa waita meuma, yusiwa meuma, God toimuwawa uwane,
sira God Keriso yusiwa meuma uwane.
Kuiyawa me tatanaiwa pui yuwamivi,
sira oiyat ge aram God numa namive pui yuwameme,
me aorene aigne oya.
11 Tatanaiwa mu Sip Usiwa ganigani meuma oya sira mu taibe veme igiyawa gaiyawa oya me gumbe garawa auya.
Mu inaiinai muma oya baiganeba den anog
bo aeba den aya.
12 ✡Ais 44:23; 49:13Meoya, kwimin ge me danave wakeyawa, ye degadega aya.
Megara piyu ge poeman gumbo kukaeba uwape.
Kuiyawa airapu kukaeba kokawa kum meuma pipi anog danawa piriwane piyu ge poeman gumbo aigne.”
13 Mae dragon me piyu egave aorene aigne yaunewa, vesin me ud apan baraunewa atataine. 14 ✡Dan 7:25; 12:7Vesin me tukwau kokavitwa maviwa duwam wanne. Meoya ingui arawa menan tamibarip anewa oya vereg aine. Meapa me mokare gumbe painau wakeg kum desirom danave, kum dada danave sira kum gambenwa apa amarawanne. 15 Mokare noive vesin daieve yoi upuine. Yoi me yoi kintoivi mina. Mokare me vesin yoi koka gumbe aig ageyau ane. 16 Megara piyu vesin waita wanne. Piyu noiwa watab yoi ipadne. Yoi me mae dragon noive upuine. 17 ✡Rev 11:7Meve mae dragon vesin gumbe danapiri wane. Sira me vesin dam meuma yaig onamiyawa upeba wakeyawa gumbo mut atan dauwag aine. God gwangwan meuma yumnasiya sira Iesu oya taibe vemewa mu gaibu yumnasiya.*Namu tenewa da danave V18 wakene. V18: Meve mae dragon poeman visive yokene.
✡12:2: Mik 4:10
✡12:3: Dan 7:7
✡12:4: Dan 8:10
✡12:5: Sam 2:9; Ais 7:14; 66:7; Rev 19:15
✡12:7: Jud 9
✡12:9: Gen 3:1,14; Ruk 10:18; 22:31; Rev 20:2
✡12:10: Job 1:9-11; Jak 3:1
✡12:12: Ais 44:23; 49:13
✡12:14: Dan 7:25; 12:7
*12:17: Namu tenewa da danave V18 wakene. V18: Meve mae dragon poeman visive yokene.