Dene köcökpa te Pawülü ba fü wü kpara ka Yesu agbü Galatïya
Galatïya
Masere si-ngü
Kpara te ba köcökpa ne, ah de Pawülü. Ah ba ta ngü la fü wü *kpara ka Yesu agbü sü de ïrï ye Galatïya. Wü kpara ka Galatïya la je ngü ka Yesu gömö wü Pawülü ake Baranaba, gbü wü kötï de ïrï ye Atïyokïya, Ïkoniyo, Lïsïtera bete Derebe. Angü wü Pawülü nü mala ta ngü ka Yesu gbü wü kötï la gbü gina ndoro ka-wü. (Mü ena amaka ngü la gbü buku ka Wü Mürü Tima ka Yesu 13:13–14:23.)
Dene si-ngü te Pawülü ba köcökpa ne tete, angü ah je, gü ba, sidi nga ani, wü gara kpara koro kpaka wü kpara ka Yesu gbü wü sü la. Fü ewü akpo da esiti fïngangü ka wü kpara ka Yesu la, de gara rïrï kpikpi ye, gü ba, dela rïrï ka Me. Ngü ka Yesu te Pawülü rï ewü di, gü ba, “Te mü le ngü ka Yesu de maguma mü biringbö la, Me ena aboro wü *siti ngü ka-mü la asidi, teka ngü ka Yesu, angü Yesu kpi teka aküwa nih.” Nda wü gara kpara la, wüh gü ba, “Te mü le akoro kpara ka Yesu la, ah le de mü fü te-mü baka enga *Yïsarayele feke. Mü ena amere wü gele ka wü di enga Yïsarayele ꞌburu, baka matï esa *basa, gele ka zü-e, gele ka mazürü kpa, de wü gara mere bi wü gele ka-ewü ꞌburu. Te mü mere bala de la, mü tï aküwa de.” Amba Pawülü le ngü la kpo de! Teka ngü la, fü ah aba köcökpa ne, atima fü wü kpara ka Yesu agbü Galatïya kpala, gü ba, “Wü mere e ale ngü la de. Angü ngü ka Me ka-ye kü ngbee biringbö, ah bü ngü ka Yesu ta te ewü je gömö ani ne. Gara ngü te mü ena amere, fü ah aküwa mü ne, nda ma. Ah le de mü to bü duu maguma mü fü Yesu Kurisito.” Te di bala, ah le kpah de nih de enatikine ne, nih to maguma nih fü Yesu, fü nih aküwa.
Wü ngü te mü ena amaka gbü köcökpa ka wü Galatïya ne, wüh dene.
Sapïta 1–2 Si-ngü te Yesu Kurisito fe Pawülü mürü tima ka-ye tete
Sapïta 3–4 Gele tï aküwa kpara de.
Wü kpara ngbü eküwa bü duu teka ngü ka Yesu
Sapïta 5–6 Ah le de nih di emere wü ngü te ena areke gbü jia Me
de wazi ka Nzïla Wazi Me
1
Dene mandï ka Pawülü fü wü kpara
ka Yesu agbü Galatïya
1-2 De-yi wü *kpara ka Yesu Kurisito, te yi di agbü Galatïya, ma ba köcökpa ne fü yi me-ra. De-ra Pawülü, te ma di de *mürü tima ka Yesu Kurisito ne. Gara kpara te tima ra nda ma, ꞌduwa Yesu *Kurisito, ake Wö ye, Me, te zükü engu gbü kpi ne, wüh tima ra me-wü, teka amala ngü ka-wü fü wü kpara.
Wü gara wü di enga ni yi, wü kpara ka Yesu, te a di de ewü sene, to mandï fü yi fala de.
3 Wö nih Me ake Miri ka-nih Yesu Kurisito di de yi, da eto gu ngü fü yi de *züka maguma wü. 4 Angü Yesu Kurisito to te-ye akpi, teka aküwa nih gbü wü *siti ngü ka-nih, de te nih ngbü emere, kpah baka wü kpara füh kotö, de wü siti fïngangü ka-ewü ne. Yesu Kurisito mere ngü la bala, angü ah de ngü te Wö nih, Me, le me-ye. 5 Ah le fü nih adi egbo nga ïrï Me teka ngü la fï mere badi. Ah di bala.
Dene ngü ka ngari Me, te di ka-ye ngbee biringbö
6 Ma je gara ngü ka-yi tïtïne, fü ngü la akolo maguma ra afa sü. Angü Me fe yi, ao yi ba züka wü kpara ka-ye teka ngü ka Yesu Kurisito. Te di bala, ah mere neh baye, te yi yia bü kere, ce ngü kaka, adu ale gara rïrï te di kpikpi ye ne? Dela ne ngü ne? 7 Ma ngbü emala fü yi dene zu ngü fanü fanü, gü ba, gara ngari Me nda ma. Ngü ka Me ka-ye ngbee biringbö. Ah de ngü ka Yesu, ta te ma mala fü yi ne. Ma mala bala kükürü de, angü ma wu eyi, gü ba, gara wü kpara koro eyi kpaka yi, teka afiti yi, asiti fïngangü ka-yi. Angü wüh le afü ngü ka Yesu Kurisito, ao kpikpi ye. 8 Amba, ma ngbü emala fü yi kpekpeke, gü ba, te gara kpara koro kpaka yi, da eto gara rïrï fü yi, te ngü la tï kpini de ngü, ta te a mala fü yi ne, nda de la, ah ka-ye de wu! Anga te ah cu de-a, anga *malayïka ka Me, anga neh da, yi mere e aje ngü kaka de! Ah tï fü kïna ka Me angbü gbü nzö kpara la, de ah kpi, anü agbü wa fï mere badi. 9 A mala ngü la fü yi ta eyi, amba tïtïne ma du ngbü kpah emala fü yi toto, gü ba, te gara kpara koro kpaka yi, emala ngari Me fü yi, te ngü kaka tï kpini de mene ngü, ta te yi je gömö a ne, de la, ah ka-ye de wu! Ah tï fü kïna ka Me angbü gbü nzö kpara la.
10 Yi ngbü efï, gü ba, ma ba ngü la fü yi bala, angü ma ele de wü kpara gbo nga ra? Aꞌa, ah bala de! Ma ele nda-ra fü Me agbo nga ra me-ye. Yi efï, gü ba, ma le fü ngü ka-ra areke gbü jia wü kpara? Aꞌa, te ma ngbü emere bü ngü te ena areke gbü jia wü kpara la, ngü ka-ra tï areke gbü jia Yesu Kurisito nda de.
Dene si-ngü te Yesu Kurisito fe ra mürü tima ka-ye tete
11-12 Wü di enga wüna, ma ngbü emala ngü ne fü yi, gü ba, ngü ka Yesu, de te ma ngbü emala fü wü kpara ne, ah de kpeke ngü. Angü ma je ngü la gömö kpara füh kotö ne nda-ra de. Yesu Kurisito gü tamu ngü la fere cu me-ye.
13-14 Gbü jia ra, yi je nga ra tane eyi, o ra ngbü la emere gele ka wü kundu ra, wü di enga *Yïsarayele tete ne. Angü, ma to ta te-ra teka adi emere gele ka wü kundu a la, fa nda gara wü di enga Yïsarayele ꞌburu. Fü ra angbü ta eto cïnga te wü *kpara ka Yesu cu de wazi ra ꞌburu, da egïrï kaje teka amörö ewü ta ꞌburu asidi. 15-16 Amba, Me de mürü *züka maguma. Gbü sïkpï ta te Me le afü ngü ka-ra tete, fü engu ayia asere Ye ye, Yesu Kurisito, fere.*1:15-16 Mü ena amaka ngü la gbü Mürü Tima 9:1-16. Angü ah fe ra ta nda eyi gügü, o wüh bï ra la de. Fü ah aï ra teka de ma mere tima ka-ni, adi emala ngü ka Yesu fü wü *ganzi kpara, te ewü wu ngü ka Me la de ne. Gbü sïkpï ta te Me to tima la fere, ma nü ta teka ayi-ta gara kpara nda-ra de. 17 Ma nü agbü Yerüsalema, teka ayi-ta gina wü *mürü tima ka Yesu, kpah de. Ma yia ka-ra bü ꞌduwa, nü agbü tö ka wü Arabï, gbü mene sü te wü kpara di tete ma. Fü ra angbü kpala, da eku gba fü Me. Fü Me ayia asere ngü ka-ye fere. Fü ra adu anü angbü agbü Damaseke.
18 Fütanga re bata, fü ra ayia anü agbü Yerüsalema teka aceka Petero. Fü ra angbü kpakaka kpala teka sïkpï ngbee nzükpa de füh ye ꞌburuve. 19 Ma wu ta gara wü mürü tima ka Yesu kpala nda-ra de. Amba, ma wu bü *Yakobo, enga ni ye Miri Yesu. 20 Ngü de te ma ba fü yi ne, ah de zu ngü te mere te-ye fere bala fanü, Me wu ngü la kpo. Wu gbügbü ma!
21 Fütanga ngü la, fü ra ayia anü andoro agbü tö ka wü Sïrïya, bete nda Sïlïsïya. 22 Ta gbü wü re la ꞌburu, bi wü kpara ka Yesu agbü tö ka Yudaya, wu ra mbi mbi nda-wü de. 23 Wüh ngbü eje nga ra bü gömö gara wü kpara, te ewü ngbü emala, gü ba, “Komoko, ta te ngbü eto cïnga te ani ne, ah du fü te-ye eyi. Ah kpo eyi da emala ngü ka Yesu fü wü kpara tïne cu me-ye.” 24 Fü ewü angbü egbo nga ïrï Me teka ngü ka-ra la efa sü.
*1:15-16 1:15-16 Mü ena amaka ngü la gbü Mürü Tima 9:1-16.