11
Dela ngü te Yesu mala fü wü kpara ka-ye nzükpa de füh ye ꞌbasu ne. Fü engu ayia atima ewü, teka anü amala ngari Me fü wü kpara gbü nga nzö sü ka *Galïlaya la ꞌburu, kpah da eküwa wü mürü keke.
Fütanga wü ngü la, fü Yesu ayia anü andoro gbü wü kötï ka Galïlaya ꞌburu, teka arï wü kpara de to ngari Me.
Dene ngü te Yesu mala teka Yüwane Mürü Babatïza
Luka 7:18-35
Gbü wü sïkpï la, *Yüwane Mürü Babatïza ka-ye fï la bü agbü ku. Fü ah ayia aje nga wü ngü te Yesu ngbü emere la. Yüwane, fü mü ayia atima wü gara kpara ka-mü kpaka Yesu.
Fü wü kpara ka Yüwane la anü akoro kpaka Yesu, ayi-tata, gü ba, “Mere kpara ka-ani tima ani me-ye, teka ayi-ta ye, gü ba, ‘Ye ngbürü de Ye Me, ta te Me mala nganga, gü ba, ni ena atima füh kotö ne? Anga ah le de ani di la fï bü ecï nganga?’ ” Fü Yesu amala ngü fü ewü, gü ba, “Yi du edu, yi mala nga wü ngü, de te ma ngbü emere gbü jia yi ne, ꞌburu fü Yüwane, gü ba, ‘Wü kpara te jia ewü ni ani, wüh kpo eyi eceka kpï. Wü kpara de lö wü walawala, wüh kpo eyi enü nü. Küte wü mürü *jiakö reke kpah eyi. Wü kpara te güje ewü do ado, wüh kpo eyi eje ngü. Wü kövö kpo eyi ezükü gbü kpi. Wü mürü cïnga kpo eyi eje ngari Me. Wü ngü la ꞌburu ngbü eyi emere te-wü, ba e ta te wü *mürü dofo ba gbü Ngari Me ne.’* 11:5 Mü ena amaka ngü la gbü buku ka Yïsaya 35:5-6. Te di bala, yi mala fü Yüwane, gü ba, ‘Mene kpara te ena alala fï bü eküte ra, Me ena aceka engu ba züka kpara ka-ye, fü ah angbü de mere tadu te gara.’ ” Fü wü kpara la ayia adu kpaka Yüwane, mere kpara ka-wü.
Fü Yesu adu afü te-ye, akpo angbü emala nga Yüwane fü mere bi wü kpara la, gü ba, “Yi ngbü efï teka Yüwane, egü neh fe? Ta te yi ngbü enü kpa etü gü, da eje ngü gömö Yüwane ne, yi nü kpala neh teka ne? Yi ngbü ta efï ngü teka Yüwane, gü ba, engu de töndö kpara, de maguma ye ꞌbasu ꞌbasu, te ngbü emere ngü baka gala, te wege ngbü efe me-ye ne? Aꞌa, ah bala de! Anga fïngangü ka-yi gü ba, engu de mere miri, te to züka bongo eküte ye? Aꞌa, ah bala kpah de, angü wü kpara te ewü ngbü eto züka bongo eküte wü, wüh ngbü etü gü nda-wü de! Wüh engbü ka-wü gbü mere kötï, anga gba wü miri. Amba ma wu eyi, gü ba, yi nü ta kpaka Yüwane kükürü de, angü engu de mürü dofo ka Me fanü. Te di bala, ah le de yi wu awu, gü ba, ngü ka Yüwane fa nda wü gara wü mürü dofo ka Me ꞌburu ka. 10 Angü Yüwane me-ye de kpara, ta te wüh ba ngü kaka-na gbü *Ngari Me, gü ba dene, ‘Me mala ngü fü Ye ye, gü ba, “Ni ena atima mürü tima ka-ni kpa engagira nü, teka areke kaje fü ye.” ’ ” 11:10 Mü ena amaka ngü la gbü buku ka Malakï 3:1.
11 Fü Yesu adu kpah amala gara ngü fü ewü, gü ba, “Ma ngbü emala fü yi dene zu ngü. Esüka wü mürü dofo, de wü diri wü kpara ka Me ta gügü ne ꞌburu, gbü jia Me, kpara te ngü kaka fa nda *Yüwane Mürü Babatïza, nda ma. Amba mene kpara te to maguma ye fere ꞌburu, ngü kaka ena afa nda Yüwane ka, angü *Nzïla Wazi Me ngbü eto wazi fefe me-ye.
12 Ah kpo gbü sïkpï ta te Yüwane kpo de tima ka-ye, zalü akoro di dene, ngü ka Me ngbü eyi ega esüka wü kpara, angü mere bi wü kpara ngbü eyi eto te-wü, da elala gbü ngü ka Me. Amba siti wü kpara, te ewü di vügü ka ngü ka Me ne, ngbü kpah eyi egïrï kaje, teka atïrï tima ka Me la de wazi. 13 *Müse de wü gara wü mürü dofo ka Me ta gügü ne, wüh ngbü ꞌburu emala nga ngü, de te ngbü emere te-ye gbü wü sïkpï ne. Gina mürü dofo la de Müse, adudu na de Yüwane Mürü Babatïza, te mala nga kokoro ka-ra ne. 14 Ma emala fü yi dene zu ngü, gü ba, Me tima Yüwane Mürü Babatïza me-ye, teka amala ngari ye fü wü kpara, kpah baka e te engu tima mürü dofo *Ïlïya ta gügü ne. 15 Te güje yi ladü la, ah le de yi da güje yi, aje ngü ka-ra la areke areke.”
16 Fü Yesu adu kpah amala gara ngü fü wü kpara la, gü ba, “Wü kpara te ewü le ngü ka-ra de ne, ma ena amala teka ewü, agü neh fe? Wüh neh baka wü da? Angü ma reke ewü eyi ma! Wüh le züka ngü nda-wü de. Wüh baka wü jaji te ewü ngbü ega yïkï de wü bu wü. Angü gara wü bu ewü ngbü ta emala ngü fü ewü, gü ba, 17 ‘Ani reke wü ma! Wü le züka ngü nda-wü de! Angü ani ngbü emï kuꞌdu fü wü, wü le alo bï de. Ani ngbü ebï ci gba fü wü, wü le aku gba kpah de!’
18 Wü di enga wüna, yi ceka la! Baka ta te *Yüwane Mürü Babatïza koro ngbü esüka yi sene ne, ah zü e fa sü de, ah nzö fï kpah de. Te di bala, wü gara kpara ngbü ta efala engu, gü ba, ‘Engu de *siti wü di enga me guvu ye!’ 19 Amba de-ra, te ma koro esüka yi sene, ma ngbü ezü e, kpah da enzö e, fü wü kpara angbü kpah efala ra, gü ba, ‘Ma de mürü kü. Ma ngbü kpah eküya. Ma kpah de awuba ka siti wü kpara.’ Wü kpara te ewü ngbü efala ngü ka-ra ne, ngbü efï nda-wü, gü ba, ani wu ngü fa sü. Amba wüh wu ngü nda-wü kü de. Ah ena adi bü nzö mene wü kpara te ewü le ngü ka-ra eyi ne, wüh ena angbü ewu si-ngü la me-wü.”
Dela ngü ta te Yesu mala fü wü kpara, teka ngü ka Yüwane Mürü Babatïza.
Dene ngü ka wü kpara, te ewü le ngü ka Yesu de
Luka 10:13-15
20 Fütanga wü ngü la, fü Yesu akpo da emala ngü fü wü kpara gbü wü kötï, te engu ngbü endoro gbügbü na ne. Angü engu mere bi wü kpeke lara ngü gbü jia wü kpara gbü wü kötï engu la ma, amba wüh le afü maguma wü nda-wü de. Teka ngü la, fü Yesu amala ngü fü wü kpara la kpekpeke, gü ba, 21 “De-yi wü kpara ka Korazïna, bete wü kpara ka Betesayïda, Me ena ato mere kuru te yi te gara, angü yi le ngü ka-ra de. Kükürü de, angü wü mere kpeke ngü, de te ma ngbü emere gbü wü sü ka-yi ne, te ma ena angbü emere ta bala fü wü *ganzi kpara, baka wü kpara ka Tera ake Sïdona la, de bane wüh ngbü ta eyi de mere cïnga te wü, teka *siti ngü ka-wü. Wüh ena angbü ta kpah eto kala bongo eküte wü, eza kpah mbï ebu gbü nzö wü, da endaꞌba te-wü fü Me, gü ba, ‘Ani le eyi afü maguma ani!’ 22 Teka ngü la, gbü *adu sïkpï te Me ena akolo ngü ka wü kpara tete, ah ena ato mere kuru te yi, wü kpara ka Korazïna ake Betesayïda, afa nda wü kpara ka Tera bete Sïdona ka.
23 Kpah bala, de-yi, wü kpara ka Kaparanama, yi fï nda-yi, gü ba, ngü ka-ani ena areke gbü jia Me, fü ani akoro agbü kpï? Aꞌa! Ah bala de! Ngü ka-yi ena asiti gbü jia Me asiti, fü yi anü agbü du ka wa, angü yi le ngü ka-ra de. Kükürü de, angü wü mere kpeke ngü, de te ma ngbü emere gbü wü sü ka-yi ne, te ma ena angbü emere ta bala fü wü siti kpara ka *Sodomo la, de bane wüh fü ta maguma wü eyi. Me tï ta acuru ewü de. 11:23 Mü ena amaka ngü ka Sodomo gbü Gina Ngü 19:24. 24 Ma emala fü yi dene zu ngü. Gbü *adu sïkpï te Me ena akolo ngü ka wü kpara tete, Me ena ato mere siti kuru gbü nzö yi, afa nda wü kpara ka Sodomo ka, angü yi le ngü ka-ra de.”
Dene gba ka Yesu fü Me
Luka 10:21
25 Sidi nga ngü la, fü Yesu ayia agbo nga ïrï Me, gü ba, “Wayi, Wüba Me, mü de Miri agbü kpï, mü kpah de Miri gbü nzö wü kpara füh kotö ne ꞌburu. Ma ngbü egbo nga ïrï mü, angü mü to wazi eyi fü wü kpara ka-ra, teka aje to ngari mü ne. Kükürü de, angü wüh o fïngangü ka-wü eyi ꞌburu, teka adi eje ngü la ba wü vürü jaji. Amba teka wü cögbörö kpara, te ewü le aje ngü ka-mü de ne, wüh tï awu si-ngü ka-mü de, angü wüh gü ba, ani wu ngü fa sü. 26 Wayi bala Wüba, ngü la reke cu te mü, angü mü le me-mü, de wü kpara ka-ra je si-ngü ka-mü.”
Dene ngü te Yesu mala fü wü kpara ka-ye
Luka 10:22
27 Fü Yesu adu amala ngü fü wü kpara ka-ye, gü ba, “Wüba Me to wazi ka wü ngü eyi ꞌburu esaka ra, teka de ma koro, ma sere ngü ka-ni la fü yi. Kpara biringbö te wu ngü ka-ra mbi mbi mbi nda ma, ꞌduwa Wüba Me, te engu wu ngü ka-ra me-ye. Kpah bala, kpara biringbö, te wu ngü ka Wüba Me, nda ma. Ma wu ngü kaka duu me-ra, be kpah te wü kpara te ma gü tamu ngü ka Me fü ewü ne.
28 De-yi wü kpara, te yi ndïrï eyi, ka wü tiri ngü ka-yi ne, yi le ngü ka-ra, de yi nü kpaka ra kpakine. Ma ena aza wü tiri ngü la gbü nzö yi asidi, fü yi afe te-yi. 29 Yi to maguma yi fere, de yi ce te-yi ꞌburu, adi eje rïrï ka-ra. Angü ma de mürü *züka maguma, te ma ngbü ewu cïnga wü kpara. Te yi le ngü ka-ra la, ma ena agu maguma yi kpina, fü yi afe te-yi. 30 Angü rïrï te ma ena ato fü yi ne, ah kpekpeke nda de. Rïrï la ena ato kpah wazi fü yi, fü ah ale ta-ngü te yi.”
Dela ngü ta te Yesu mala fü wü kpara ka-ye.

*11:5 11:5 Mü ena amaka ngü la gbü buku ka Yïsaya 35:5-6.

11:10 11:10 Mü ena amaka ngü la gbü buku ka Malakï 3:1.

11:23 11:23 Mü ena amaka ngü ka Sodomo gbü Gina Ngü 19:24.