1-2 Mazin giye o aburni ageeta zinzeeti ɔrɔɔt ŋaaten igeet, kitoonteyuŋ naaga igeet Timozi ween gɔtɔna ona, ma een gabaren ci Joowo uuwak zɔɔz onin abon o akati Yesu. Maje naaga ɔl ogɛnɛ kacina abon kaavtiya kuture ci kazi Atinas o ŋaato. Kitoontekuŋ zin naaga nɔɔnɔ igeet ka kook kanyek niini zinzeeti ugooc kodoyit, ma adizkekuŋ igeet, ka calaŋ ooŋnu niiga tuwɛn unooŋ giye o agidenu. 3 Anycek zin zinzeeti kodoyit, eeci agayu niiga piryakzɛt akunaket ageet ɔl o tuwento dook. 4 Iitene baal karomɛn ki igeet e, kuduktayuŋ rak naaga igeet kanekuŋ nɛ, “Akunaket tiŋeere piryakzɛt.” Ma agayu niiga didi gi ci inoko agooni noko gi baal kaduwaku e ɛlɛ nɛɛn. 5 Kitoonekuŋ zin Timozi ka kook kicin tuwɛn unooŋ mã ŋaan adɔi, eeci aviryan aneet ziniz, ma kabaaban kazi nɛ, “Coma icinawuŋ Loryenti, ma anyceyu demziin onan ŋaatunooŋ kizi gi ci labak.”

6 Inoko zin abadayet Timozi ageeta ŋaato, ma iiya uduwayet zɔɔz o akati tuwɛn unooŋ been rɛɛzɔnɛt unooŋ. Buk iiya uduwayek niini ageeta gi o aadanetu niiga ageeta tup kiyo buk gɔɔn kabaabanuŋ naaga igeet o. 7-8 Dɔl o yaai tuwento, inoko alalit ageeta zinzeeti ɔrɔɔt ɛlɛ, eeci kiziikta naaga tuwɛn unooŋ. Mayo nuun kanyaka kaal ci meelik apirnanet o, anycetu niiga ageeta talniin. 9 Kanaata zin naaga Jook ɔrɔɔt ɛlɛ giye o anycetu niiga talniin. 10 Kalaya gɔɔn naaga Jook waazin ki baalin ɔrɔɔt ka kimiirtozeyuŋ naaga igeet ka koota kazaaceyuŋ igeet tuwɛn unooŋ zoozowe ogɛn bodo. 11 Abon bai Jooi ween baatinai alye onin been Manyi onai Yesu akɔlaket gɔl ci kavoya ŋaatunooŋ. 12 Abon bai Manyi Jooi anyuŋ igeet ɛlɛ kibeen ɔl dook ɛrɛɛztɔ ɔrɔɔt kiyo buk kareezuŋ naaga igeet o. 13 Ma gole nico anyaku tiŋeere niiga dɔyiz ki bonat ŋume o Jook ween baatina iitene ci abadaan Manyi onai Yesu been ɔl ogin dook e.