23
Daayiz o Sara
1-2 Mazi akɔ een Sara irkitowa eet tɔrkɔnɔm ki tiin torgɛrɛm (127), adaak niini ŋaao kazi Ebiron looce o kazi Kanan. Ma iinon Ibrayim daayiz ci Sara o, ma aluwek nɔɔnɔ.
3 Ma vurta itiŋa niini ŋaati ona aluwi noko, ma akɔ ole o kazi Ititaz raa, ma akɔ anek nɔɔgɔ nɛ, 4 “Inoko kabaai naana ŋinaanto keen modɛn ci rɛŋ. Akɔmnan tɔdɔ cigan ŋina. Karooŋnyuŋ zin ataaleyaŋ tɔdɔwaye cugooc noko ŋintimiliny ka kadawi ŋaa can adaai noko.”
5 Abɛdɛkɛ ɔl ci Ititaz noko Ibrayim anek nɛ, 6 “Manygɔn, ziiyet di. Kacinin naaga ineet een eet ci adiŋdiŋ ɔrɔɔt ŋaatinaaŋ. Da ŋaa cun o boote ci olla ajowa niina abon bootwane cigaacak o. Akɔm ŋaatinaaŋ dook eet ci ajurakin ineet bɔɔt ŋaati adawɛ ŋaa cun o.”
7 Itiŋa ni Ibrayim, ma aloca ɔɔ nɔɔgɔ kɔrgɛna, 8-9 ma anek nɛ, “Mã iziikteyaŋ niiga ka kada ŋaa can o ŋina o, ijinteyaŋ Evron ween ŋɛɛrti Zowar ka kataaleyan bɔɔt o abil mane onin ŋaao kazi Makvila. Ijinteyan nɔɔnɔ ka kataaleyan ŋinite guruce ci aganɔ, ka gɔɔn kizi ŋintan dawiinto.”
10-11 Aje Evron aavi buk tɔ ŋinaante. Ma abɛdɛkɛ niini Ibrayim ɔl dook kɔrgɛna anek nɛ, “Manygɔn, ziiyan di. Inoko kanyin ineet bɔɔt nice kibeen mana buk kɔkɔm guruc ci aruwekan. Kanyin ineet ɔl dook kɔrgɛna ŋina ka dawi ŋaa cun o.”
12 Itiŋa ni Ibrayim ɔl kɔrgɛna, ma aloca ɔɔ. 13 Ma anek Evron nɛ, “Inoko karuwekin guruc ci mano. Gama ŋaatan guruc nicoko ka kada ŋaa can o ŋinaante.”
14 Abɛdɛkɛ Evron nɔɔnɔ anek nɛ, 15 “Manygɔn, adak mana nici guruc ceen eet tur lak wec (400). Zin giye ci akanin ineet guruca nici ŋaatan kaal ci labak. Inoko bitɔ da ŋaa cuno ŋinaante labak.” 16 Agama ni Ibrayim zɔɔz ci Evron o, ma akɛɛbak nɔɔnɔ guruc ci ona aduwa niini eet eet tur lak wec (400) o, ma anyek nɔɔnɔ ɔl dook kɔrgɛna ŋina.
17 Gɔl zin ci ajowan Ibrayim mana ci Evron o nɛɛn. Abil mana nici ŋaao kazi Makvila ajɔŋɔz ŋin o kazi Mamra. Zin kaala o anyak mana nica dook izi ci Ibrayim. 18 Agawozek zin ŋinita Ibrayim ole o kazi Ititaz dook.
19 Adawun ni Ibrayim ŋaa onin kazi Sara boote o abil mane nice looce o kazi Kanan. 20 Zin mana baal een mana ci ɔl o kazi Ititaz e, ki bɔɔt o abil mana izi ci Ibrayim ka gɔɔn kadayɔi ɔl oginɛ.