1 Ma vurta iitene oman enektek ɔl Josev nɛ, “Amɔɔr baatune.” Ooyi ni niini lɔgɔz ogin kazi Manasa been Iviram ka kɔɔt kicinit niigi jijitineeŋ. 2 Mazi azii Jakob iiya ŋɛɛrin Josev, agamun ɛlɛ, ma iŋaaz kaavu jena kerce onin. 3 Ma anek niini ŋɛɛrin Josev nɛ, “Baale ayelzakan Jooi o anyak dɔyiz dook ɛlɛ ŋaao kazi Luz looce o Kanan, ma amayukan. 4 Ma anekan nɛ, Kanyin katin dɔl ci meelik ka dɔlya ci dɔl cugun kiziti boryok ci meelik. Ma kanyi nɔɔgɔ katin looc nico kizi cineeŋ kabaakti niigi kodot.”

5 Ma anek Jakob bodo Josev nɛ, “Ma Iviram kibeen Manasa ceen lɔgɔz cugun aritai Masirɛ waan o ŋaan naana kiiyakɛ Masir e, ɛɛl niigi kiyo dɔlya ogane o. Atobɔ niigi kibeen lɔgɔz ogan kazi Robɛn kibeen Simiyan. 6 Matɛ katin arita niina lɔgɔz oogi bodo, alaŋaan nicaga een cigan. Izi niigi cugun doon. Ŋaan zin akunak nɔɔgɔ mayuwɛnɛt cineeŋ ŋaati Iviram kibeen Manasa. 7 Kagoon kaal nicoko ka kaadai yaatun Recal baal adaai Kananakti ŋaao ajɔŋɔz Evrat iinyaye baal kabadanɛ keronnye o kakunɛ looce o kazi Mesopatamiya e. Zin baale daayizi oninɛ awucnekan aneet ɔrɔɔt.” (Ŋinti kazi Evrat neke utuye inoko bodo zaara ci kazi Bɛzilɛm.)

8-10 Maje waanice Jakob alaŋaan kɛbɛrɛ acinɛ juruŋ, eeci anyat niini ɔrɔɔt. Ma icayan Josev lɔgɔz ogin een ram kojoŋozit Jakob. Ma ajin Jakob Josev anek nɛ, “Lɔgɔz ci ŋɛnɛ nici?”

Ma abɛdɛkɛ Josev nɔɔnɔ anek nɛ, “Lɔgɔz ogan baal anyan Jooi Masirɛ ŋina e nɛɛn.”

Enek ni Jakob nɔɔnɔ nɛ, “Iicayai zin nɔɔgɔ ŋaato kamayuk.”

Anyek ni Josev nɔɔnɔ dɔl, ma atorkot niini nɔɔgɔ, ma acoco ŋalyamɔ.

11 Ma anek Jakob Josev nɛ, “Alaŋ baale kaga kacinin bodo, bar inoko Jooi anyan korok zɛɛ makacin kicinin ineet ki dɔl cugun buk.” 12 Aara ni Josev dɔl baatin anyɔtɔi, ma akat kozoŋtin, ma aloca ɔɔ baatin ŋuma.

13-16 Amayuk ni Jakob ŋɛɛrin Josev anek nɛ, “Abon bai Jooi o jiji Ibrayim kibeen baaba Aizak amayuk lɔgɔz cugun noko. Abon bai Jooi o azuunan aneet, ma ayelekan golok zɛɛ been iiten nico noko amayuk nɔɔgɔ. Abon bai toonnyaiti o Joowo baal ɛɛlanan aneet kaale o gɛr dook amayuk nɔɔgɔ. Abon bai agayi zaara ogane been zaar o jiji Ibrayim kibeen o baaba Aizak ŋaaten lɔgɔz nicoko. Abon bai abitiz niigi looc nico dolene cigeec arita.”

Arek ni Josev ŋɛɛrin o kazi Iviram baatin aziit ci kaŋeto. Aje ŋɛɛrin ceen abuu kazi Manasa o arekɛ baatin aziit ci azo. Bar Jakob abaric azɛɛn, ma arek aziit ci azo o ɔɔ ci Iviram ceen tutur o, ma ataadek aziit ci kaŋeto o ɔɔ ci Manasa ceen abuu o.

17 Mazi acin Josev baatin arek aziit ci azo o ɔɔ ci Iviram ceen tutur o, inyigit niini gi nico. Ma aara niini aziit ci baatin o oowe ci Iviram o, ma arek ɔɔ ci Manasa o. 18 Ma anek niini baatin nɛ, “Alaŋ een nɛɛn baaba. Logo ween abuu nɛɛn ce. Arek aziit cun azo o ɔɔ cin o.”

19 Bar ujura baatinɛ, ma anek nɔɔnɔ nɛ, “Kaga gi ci kagoon o nɔkɔ. Ŋɛdɛt katin Manasa niini baati bor ci meel. Bar zin katin tuturi niini adiŋdiŋ ɔrɔɔt kujuk gɔtɔni. Katin dɔlya ciginɛ een bor ci meel gɛr.”

20 Amayuk ni niini nɔɔgɔ iiten nice anek nɛ, “Ɔl ci Israyil noko katin awo zaar cugooc ŋaati amayuwi niigi ɔl oogi. Azi katin niigi nɛ, Abon bai Jooi anyuŋ otobtɔ kibeen Iviram been Manasa.” Zin giye nico anyewun Jakob Iviram karayɛ kizi ɔɔ ŋaati Manasa.

21 Ma anek Jakob Josev nɛ, “Inoko acinan aneet kadadjai. Ŋaan zin aromenu niina ki Jook, ma ŋaan katin amiirenin niini ineet looce o jijitugun. 22 Kanyin zin ineet looc o abon kazi Cekam baal kɔɔra naana ole o kazi Amorit dilanyaye ogan e. Kanyin ŋinite ineet, alaŋ een gotonogu.”