1 Kao asi 5 murinai priest kaikapona Ananias i gakira ku Caesarea, babada mutusi ba kairuwana kuira biyina kana waba Tertullus yabata. Si nae ba governor naonai si msiri kata Paul siti kunumakei kairavina. 2 Maranai Paul si yorei i riu governor naonai imsiri, wai Tertullus i dagui Paul i bikunumakei. “Felix, kom pipiya kaikapom ba nuwanuwasuyim, am bibadana kamonai niko mara veoromina nuwanubai ka mana ba, am nuwasuya totorisi ba keta gaigairesi ku botuwei niko ku kupura.*Felix ana bibadana maranai kega nuwasisirina. Tertullus Felix i kwaikwairi kata inta wona Paul goyona i wosei. 3 Nikona kairavina kabi kaikaiwa sakiyim mara kau ereonowana. 4 Kega au waina ani tinasisirim wai a bibabaim ki taina baenega ba sisiya yoginaikei ani sisiyei.

5 Niko sebare ka bopanani kata bobotabirina, ba bimagoyowana, ba bikawapata, Jew biyisi dobu ereonowana kamonai e bitupuvi. Ba yebo kona Nazarene biyisi†Nazarene Yove taparoro damsi Iesu te bisununuri wai kosi e b sisiyisi kairavina Iesu Nazareth yai i tupuwa. asi bada kesana. 6 Ba yebo ana waina kata God ana yove iti pudapudai wai ka patumi. 7 ‡Niko kewa kiruma wadubosi mutusi kamosi yai kega e mamana. 8 Abisiri yai kom yebo ikesim, kuna toirubai kata awaika ka bikunumakei wai basuna kuna panani.”

9 Jew biyisi Tertullus si baisi ba Paul si kunumakei si wona, “Awaika ereonowana i sisiyei wai bisuwona.”

10 Maranai governor Paul i rutapiyei iti sisiya wai, i kaobeyei, “A kuiri kata bodu pesarisi niko dobu kamonai kom kui bibuibuiya, kona kairavina nuwasisirai au potu ana ravi. 11 Pipiya kuna toirubaisi wai sina wonim kata karaku kao 12 si kakaba ba a gae ku Jerusalem ata bopepeta. 12 Jew biyisi kega si pananiku kata kesana kotoi, yabata God ana yove kamonai kai kawapata, kona birauwa Jew biyisi asi dugu yovena kamonai a dagui, kona memena meyaga kamonai. 13 Ba yebo kega rubana sini beyim kata karaku nikosi kunumaka wai bisuwona. 14 Nikona a bisuwonim kata wawata asi God a bopepetei ba yauku Keresiyana ketana a bisununuri, saba te wonawona kwaruma. Saba yebo Moses ana kairuwana ba peroperoveta, awaika ereonowana si kirumi wai a bigeruwei. 15 Ba yauku au nota maragasina God karinai nikosi pipiya rutainisi, kata pipiya gairesi ba goyosi asi bomsiri mena kairavina. 16 Nikona kairavina mamanina a wosewosei kata nuwanuwaku ba au wose wai totorisi God matanai ba pipiya kurisi.

17 Bodu biyamo a nesaira murinai a veramaga, ku Jerusalem au pipiya moyamoyakisi ata puyoisi ba ata suwara God kurina.*Acts 21:17-28 18 Nikona God ana yove kamonai kona a wosewose, ba a bobunaga meyiku kata ata bopepeta Moses, ana kairuwana nununai ba si pananiku. Kona maranai wai koroto kega ba reso ba binuwamotom kega. 19 Saba Jew biyisi mutusi Asia kupurinai si botu wai kosi yabata, ikesisi sita botu kurim kata asi bikunumaka sita berim. 20 Nikosi babada sita wonim kata yauku au goyona awaika si panani, maranai Sanhedrin naonai a msiri ba si kasekasemainiku. 21 Memei bage niko kesanaikei kairavina te bikunumakiku, wai naosi yai amsiri ba a parara, ba a wona, ‘God pipiya ereonowasi ina wosisi rabobo kamonai sina bomsiri ba sina yawasa, kona kairavina nina a bimsiri ba ko bibuibuiyiku.’ ”*Acts 23:6

22 Damanina ba Felix Keresiyana ketana i kuira kabitam wai bikunumaka duguna i gudui ba i wona, “Abiya badana Lysias ina botu wai au nota ana berimi.” 23 Felix abiabiyisi asi bada i kaotunei Paul ita bokibukibui kabitamni saba ita boterei, turaturana sina botu sina rugenari ba ana waina awaika, wai sini baisi.

24 Kao biyamo murinai Felix kaowana Drusilla, Jew biyina yabata si botu. Paul ana wara si porai ba bitumagana Iesu Keriso ai kurina i sisiyei wai si tainabaenegei. 25 Ba Paul yawasa totorina ba, bigesa mena, ba bibuibuiya marana ina botu i bisisiyei wai, Felix i nagara ba i wona, “Damanina nina tana boterei ba ke nae ba mara kesana gairena ana panani wai, ana yorim kuna veramaga.” 26 I nosinosoi kata Paul ita gimoni wai mara patepatena i yoreyore yabata si bisisiya.

27 Bodu ruwamo murinai, Porcius Festus ana gawara i yauni i governor saba Felix ana waina Jew biyisi sita kaobigegaini wai Paul patuma yovenai i boterei i mana.§Rome kairuwana i wona kata bodu ruwamo kamonai pipiya sini buibuiyei wai patuma yovenai sini rukasibauei, saba kona maranai Felix, Paul iti rukasibauni saba wose pesarisi i wose kairavina si yagisi saki kurina. Ana waina wose mutuna Jew biyisi kairavisi ita wosei kata asi yagisi iti nubai.