35
God Jacob ana Rakaraka yabata i Poraisi ku Bethel
9 Jacob Mesopotamia kupurinai i veramaga murinai God i rerematara mena kurina ba i gaireni. 10 Ba God kurina i wona, “Kam waba wai Jacob, saba kega muri yai sina yorim Jacob, kam waba wai kona Israel.” Kata kana waba i binei Israel.
11 Ba God kurina i wona,
“Yauku God Maragata Sakiku;
ke uwa pesara ba uwam ina pesara
ba dam ba dam pesarisi
ba taupauma pesarisi kom kamomi yai sina botu.*Genesis 17:4-6
12 Tano Abraham ba Isaac a berisi wai
yebo kom a bereberim,
ba am rakaraka muri yai te botubotu wai ana berisi.”
13 Damanina ba memena yabata si sisiya wai God gawarina i sumarei ba i gae.
14 Jacob memena God yabata si sisiya wai gawarinai, akima i totori ba i beyena wai wine i sewai ku tepana kata aba tomatoma suwarina ba yebo olive wairoronai i boroi. 15 Jacob gawarina i yorei Bethel. Kairavina namai God yabata si sisiya.*Genesis 28:18,19
Rachel ana Rabobona
16 Jacob ana rakaraka yabata Bethel si sumarei ba si bowagawaga ku Ephrat. Ba matapa si veraverakasibau, ba Rachel bituwa siniyarana damina i yauni saba ana bituwa wai i piropiro saki. 17 Maranai ana siniyara i rakarakata wai bibowabowa wasikena Rachel kurina i wona, “Kega kuna nagara, sebare kesana yebo ku terei.” 18 Saba i matapa raobo wata, ba ana yasibe i kakaba wai natuna sebare kana waba i berei Benoni, saba tamana kana waba i yorei Benjamin*Benoni basuna wai au siniyara sebare ba Benjamin basuna wai sebare kaimatanina.a 19 Kata Rachel i rabobo ba keta e nenae ku Ephrat wai parinai si dogui (karaku gawarina wai Bethlehem). 20 Rachel kana karawaga tepanai Jacob akima i totori wai karaku patana e mamana.
Jacob Kaokaowana ba Natunatuna
Jacob natunatuna sebasebare wai asi 12.
23 Leah natunatuna wai
Reuben (Jacob natuna iyarokona)
ba Simeon, Levi, Judah, Issachar ba Zebulun.
24 Rachel natunatuna wai
Joseph ba Benjamin.
25 Rachel kana bosaibisaibira Bilha natunatuna wai,
Dan ba Naphtali.
26 Leah kana bosaibisaibira Zilpa natunatuna wai,
Gad ba Asha. Nikosi natunatuna sebasebare wai Mesopotamia meyaginai si tupuwa.
Isaac i Rabobo
27 Jacob i nae ku Mamre Hebron gwabinai tamana Isaac kurina. Abraham ba Isaac si mamana wai nakai.*Genesis 13:18 28 Isaac kana bodu 180 rubana. 29 I morapa saki ba i rabobo ba natunatuna sebasebare Esau ba Jacob si dogui.