1 Iesu yebo Galilee okowina torenai bibeyebeyena i dagu meyei ba koroto i rakata saki si ma gwagwari wai i geru ku waka. Kata kamonai i makira ba okowai i karukaruwei ba pipiya wai tore yai si bimsiri. 2 Ba sawara pesarisi maibai i bibeyebeyisi.

3 Ba ana bibeyebeyena kamonai i wonisi, “Koi tainabaenega! Baobao biyina kesana, i kasibau ana pesi ita bao. 4 Saba ana pesi i rubusaga*Jew biyisi kasi kam kaimatanina wai te rau busaga kapurika ba menaga ta rau busaga wai rutaini. maranai wai mutusi si peku ku keta, ba manu si botu wai si kam roboi. 5 Ba mutusi si peku tano ku akiakimina tepana, ba tano kega i rakata saki wai si rutiti yagiyagina. 6 Saba maranai kao i gae wai i poya bunuwana wai, si kwasa, kairavina, warowarowisi kega sibo kikita kabitam. 7 Ba mutusi si peku ku sinamona kamona wai sinamona pesi si wakutawana wai kega si uwa. 8 Saba pesi mutusi si peku ku tano gairena, wai si rutiti kabitam si gae ba si uwa wai mutusi uwasi 30, mutusi 60, ba mutusi 100.” 9 Damanina ba Iesu i wona, “Kotoi wata ere tainam wai, ke nonora kabitam.”

10 Maranai Iesu ikesina i mamana wai ana apostle asi 12 ba ana nonorayauna mutusi yabata si botu kurina, ba si toirubai kata ana maiba basusi wai awaika. 11 Ba Iesu i wonisi, “Komi wai God ana basileiya mama bibuniyina i berimi. Saba kosi mutusi kupunai kairavisi wai, maibai a bisisiya, 12 kata kosi,

13 Kata Iesu i toirubaisi, “Komi niko bimaiba ko kuiri kona kega? Ba kega kona kuiri wai mekabage bimaiba mutusi kona kuira? 14 Baobao biyina wai kona God wonana e bobaoni. 15 Pipiya mutusi wai pesi keta parinai e pekupeku wai nanakasike. Kata Bada wonana te nonori saba Satan e botubotu nuwanuwasi ai e yuyauna taveyei. 16 Ba pipiya mutusi wai nanakasike bage pesi te pekupeku ku tano akiakimina, kata maranai God wonana te nonori wai ere nuwasisirisi te yuyauni. 17 Saba maranai God wonana kairavina ruruba ina botu ina ravisi wai yagiyagina wata sina peku, kairavina warowarowisi kega sibo kikita kabitam. 18 Ba pipiya mutusi wai, nanakasike bage pesi sinamona kamonai si rutiti wai, God wonana te nonori. 19 Saba niko dobu yawasina ba mariyina ebi kwarukwarumisi wai, God wonana e wakuwaku tawani wai kega te uwauwa. 20 Ba pipiya mutusi wai nanakasike bage pesi ku tano gairena e pekupeku, kosi wai God wonana te nonori ba te yuyauni ba uwasi wai mutusi 30, mutusi 60, ba mutusi 100 tepanai.”

21 Iesu i wonisi, “Meyana kotoi kibe e kapukapuni ba kabomai e kasikasi tawani kona aba dudauwa gaburinai e tereterei kona? Kega, ba aba tutaura tepanai e tereterei.*Matthew 5:15; Luke 11:33 22 Ba awaika wata mama bibuneyisi wai sina rudeba, ba awaika wata baidibarai te mamana wai sina ru yasegana.*Matthew 10:26; Luke 12:2 23 Kom kotoi wata ere tainam wai ke nonora kabitam.

24 Ki nuwanotanota kabitam kata awaika ku nonori, mekabage ke rubaruba wai kona rubana kesaninai ina rubaim ba yebo tepanai ina tere tawani.*Matthew 7:2; Luke 6:38 25 Iyabosi wata wonaku si nonori ba si yauni wai tepanai ani rakasi, ba kotoi wata kega i yauni wai awaika yogina gwabinai e mamana wai ana yauna taveyei.”*Matthew 13:12, 25:29; Luke 19:26

26 Ba yebo Iesu i wonisi, “God ana basileiya wai kona nikasike, baobao biyina ana pesi i baoni. 27 Pom ba kao, i dudauwa kona i mamana, ba pesi mekabage i supara ba i rutiti i gae wai kega i kuiri. 28 Tano ikesina pesi e wosewosei e rautiti ba e uwauwa, kainaona dobona e tereterei, ba rurauna ba uwana e tereterei. 29 Ba maranai uwana e matumatura wai yagiyagina wata sebarena wheat e totoi, kairavina boyauna marana i botu.”*Joel 3:13

30 Iesu yebo i wonisi, “Meo bimaiba tana yauni ba God ana basileiya tani sisiyei ba tani beyebeyena? 31 Nanakasike bage mustard†Kona wai yogiyoginaikei nanakasike bage aveya pesina. pesina rutainina, kona wai yogiyoginai kei, ba kuna yauni tano kamonai kuna baoni. 32 Ba ina rutiti ina gae wai pesi ereonowasi bao kamonai ina waku tawanisi, ba ragaragana kaikaposi ina taura wai manu sina botu wakunai sina toga ba kasi nigu sina bowa.”

33 Ba bimaiba pesarisi wai nikona rutainina, Iesu wona kurisi i sisiyei kata pipiya God ana basileiya basuna sita kuira kabitamni. 34 Iesu pipiya ereonowasi kurisi i bisisiya wai i bimaiba, saba maranai kona ba ana nonorayauna wata wai, basusi i wonewonisi.

35 Kona rabisinai, Iesu ana nonorayauna i wonisi, “Tani garubona ku sepina.” 36 Damanina ba koroto si sumarisi ba Iesu waka kamonai i mamana wai yabata si nae. Ba waka mutusi yebo namai si mamana wai yabata. 37 Ba sibe kaikapona i dagui, ba yoyo si rakata saki wai waka yogina ikei ba ita rukwauruba.

38 Saba Iesu waka murinai iru kunuwana ba i dudauwa. Ba ana nonorayauna si rubaunui, ba si wona, “Bibeyebeyena biyim, mekabage ke nosinosi? Ba kota tana rukwauruba!”

39 Ba i bomsiri, sibe i kaotunei ba yoyo i wonei, “Ke ma guguba! Ki raboraobo!” Ba mara kesana sibe ibo yaragi ba niworowa i dauwa. 40 Saba ana nonorayauna i wonisi, “Mekabage wai ko nanaganagara? Ami bitumagana memena?”

41 Ba kosi si nagara saki, ba si wona, “Niko sebare kotoi wai, sibe ba yoyo te bosisiri!”