1 Ba karaku kao ruwamo wata te mamana, ba Baisaubona Kamna ba Bread Kega Yeast Yabata Poragina kairavina.*Exodus 12:1-27 Kata priest kaikaiwabosi ba kairuwana bibeyebeyena biyisi keta si nuvenuveni kata mekabage Iesu sita patumi ba sita kasibunui. 2 Saba kosi si wona, “Kega poraga maranai kairavina pipiya sina kokona.”

3 Ba maranai Iesu Bethany yai, Simon, kona lepa biyina ana yove kamonai si kamkam, ba wasike bane maisana, i rakata saki kibubuna akimai si wosei wai, kamonai. Kona banena wai keyama kana waba nard, warowarovinai si wosei wai, i kabari i botu. Ba kibubuna i kasigaowori ba banena Iesu gayamina i sewai. 4 Saba pipiya mutusi nai si mamana wai si kaoboneyana si wona, “Awaika kairavina niko bane i yakwarei? 5 Niko bane siti gimonei bodu kesana maisana rubana ba manena moyamoyakisi sita berisi.”*Niko bane siti gimonei bodu kesana bimaisa rubana.

6 Saba Iesu i wona, “Wasike ko boterei awaika kairavina ko bisinikaini? Kona sawara gairena i wosei kuriku. 7 Moyamoyakisi mamanina yabata kona mana wai, tamarai koni baisisi. Saba yauku wai kega mamanina yabata tana mana. 8 Kona i kuiri awaika ita wosei wai i wosei. Kata kona bane i sewai ku siniku wai kona mara damonai au rabobona kairavina i bobunagei. 9 Ba yauku bisuwonai a wonewonimi kata niko wasike awaika i wosei wai dobu tomtom pipininai wonaku sina rumamarei wai sini sisiyei, kona aba nuwa raupairina.”

10 Saba Judas Iscariot, nonorayauna asi 12 kesana i nae priest kaikaiwabosi kurisi kata Iesu ita berena. 11 Ba kosi awaika si nonori wai si nuwagaire, kata si kaobiyoyobani kata mane sita berei. Kata Judas keta i nuwenuweni mekabage Iesu ku yarosi ita terei.

12 Kao dagudagunai Bread Kega Yeast Yabata Poragina maranai asi dudura kata sheep sebare wotuna Baisaubona Kamna maranai sina puyobunuwa. Iesu ana nonorayauna si toirubai, “Memena Baisaubona kamna kairavim kana bobunagi?”

13 Ba ana nonorayauna ruwamo i poraisi ba i wonisi, “Ko nae ku meyaga kaikapona, ba sebare okowa kiubuna e kabakabari wai ina vera poteimi wai ko kibi. 14 Ba ina riuriu wai yovena badana ko wonei, ‘Bada i baba: Kata ana wagawaga yovena memei, kata yauku ba au nonorayauna yabata Baisaubona Kamna kana kani?’ 15 Kata gawara kaikapona tepanai, si wose damanei wai ini beyeimi. Ba namai kairavita ko bobunaga.” 16 Ba nonorayauna sisu taveyana, kata si riu ku meyaga kaikapona wai Iesu sawara i wonisi wai si panani. Kata kosi Baisaubona Kamna nai si bobunagei.

17 Ba maranai i rabisi wai Iesu ana nonorayauna asi 12 yabata si verakasibau. 18 Kata maranai kosi kam gawarinai si makira si kamkam wai, Iesu i wona, “Yauku a bisuwonimi kata komi kesana ta kam yabata wai ina berena taveyiku.”*Psalms 41:9

19 Saba kosi si nuwapoya, kata kesakesasike kosi si wona, “Yauku kona?”

20 Ba i kaobeya i wona, “Komi ami 12 kesana, kotoi kona ba yauku bread kana kutuba ku kaboma wai kona. 21 Saba God Natuna kairavina nanakasike i kirumi kata kurina ina tupuwa. Ba saba, kapore, nao sebare kotoi God Natuna i berena wai! Kona pipiyina i gaire kata kega ita tupuwa.”

22 Ba maranai kosi si kamkam wai, Iesu bread i yauni ba i kaikaiwa ba i botomni, ba ana nonorayauna i berisi i wona, “Ko yauni; nikona yauku tupuviku.”

23 Yebo vedu i yauni, ba i kakaiwa ba i berisi, ba kosi konai si toma. 24 “Nikona Yauku taraku i tamo sewa bidamanina maragasina pesarimi kairavimi i tamosewa.”*Exodus 24:8; Jeremiah 31:31-34 Ba yebo kurisi i wona, 25 “Saba yauku a bisuwonimi, Yauku wine uwana kega meyana ana toma mena yepo kona kaonai, God ana basileiya kamonai wauna ana tomani.”

26 Ba maranai tabora si tabori i kakaba wai kosi si kasibau si nae ku Olive koyana.

27 Kata Iesu i wonisi, “Ereonowami koni kasibuburanimi, kairavina buka i kirumi i wona,

29 Ba Peter i kaobeyana i wona, “Memei bage ereonowasi sina vera robo, saba yauku kega!”

30 Saba Iesu i kaobeya i wona, “Yauku a bisuwonim kata karaku pomai muri yai kokorereko ina tou mara ruwamo wai, kom ikesim mara tonu kuna kaosairiku.”

31 Ba Peter ere maragasina i kaotupena i wona, “Abisiri yai tana rabobo yabata! Saba kega meyana ana wona kata kega a kuirim.” Ba ereonowasi sisiyina kesanina si sisiyei.

32 Kata kosi si botu ku kupura te yoreyorei Gethsemane wai, Iesu ana nonorayauna i wonisi, “Nina ko makira ba ana rupari.” 33 Peter, James ba John i urabaisi ba yabata si nae, ba i dagui i binuwapoya sini nomosa nuwa yarana i bobunui. 34 Kata i wona, “Pipiyiku yapoya e bobunui matapa rabobo wata, ba nina ko mana ba koni bikinana.”

35 Saba kona i nae yogina ikei ba i peku ku tano ba i rupari kata rubarubana niko sini nomosa orana kega ita riuni. 36 Ba i wona, “Aeee Tama, tamaku awaika ereonowana wai i tapeyana saki kurim. A bibabaim niko vedu kariku ai ke yauna taveyei. Saba kega yauku au waina ba kom am waina.”

37 Damanina ba Iesu i veramaga ana nonorayauna kurisi wai, i pananisi kata si dudauwa, wai Peter kurina i wona, “Simon kom ke dudauwa kona, ora kesanaikei kuti koyakoyaga kona kega? 38 Koi koyakoyaga ba ko rupari kata kega ku baisakari mena kona riu. Kanumimi ana waina ba saba tupuwimi wai te bomesumesu.”

39 Ba i sumarisi i nae wai parina kesaninai i rupari. 40 Maranai i veramaga mena wai yebo i pananisi si dudauwa, kairavina matasi si bita, ba kega si kuiri awaika sita wonei.

41 Mara bitonuina i veramaga mena wai kurisi i wona, “Komi karakuwata ko dudauwa ba ko biyakam kona? Kata damanina ora i botu! Ko kinani, Sebare Natuna piragagoyo pipiyisi ku nimasi si terei. 42 Ko bomsiri! Tana nae! Ba berena sebarena nina e botubotu!”

43 Kata Iesu karakuwata i bisisiya ba Judas, kona 12 kesana, i kasibau, kona yabata wai, abiabiyisi korotosi ere asi seri ba beyana. Kosi wai priest babadisi, kairuwana bibeyebeyena biyisi, babada si poraisi. 44 Kata berena biyina matapa ketai matakira i beyisi, “Kata mekona ina yaoni wai damanina kona, ko patumi ba koi naovei ku patuma yovena.” 45 Ba maranai Judas i nae Iesu kurina wai i wona, “Bibeyebeyena biyina!” ba i yaoni.

46 Kata mutusi Iesu si botawani ba si patumi. 47 Saba kosi Iesu parinai yabata sibimsiri wai sebare kesana ana seri i taina kasibauwei ba priest kaikapona ana saibisaibirina i tarai wai tainana i kasiyaragi.

48 Ba Iesu i wona, “Kata Yauku kawakasekasesi a binaovisi wai komi seri yai ba kepatai ko botu kona patumiku? 49 Yauku komi yabata kao patepatena God ana yove taparoro kamonai a bibeyebeyena ba kega ko patumiku.*Luke 19:47, 21:37 Saba nikosi wose te tuputupuwa kata kiruma katamanina kairaviku i sisiyei wai nanakasike ina tupuwa.”

50 Ba ana nonorayauna ereonowasi si sumarei ba nagarina si vera. 51 Saba sebare yarakina tarasowo poepoena wata i kotekotei, ba Iesu i bisununuri, wai kosi abiabiyisi asi waina sita rausi, 52 saba i vera wai kana gara wata si botawani.

53 Ba Iesu si yauni si nae priest kaikapona kurina wai priest kaikaiwabosi ba babada ba kairuwana bibeyebeyena biyisi ereonowasi si botu si kesanisi. 54 Saba Peter Iesu yogina rabarabai i bisununuri yepo, i riu priest kaikapona ana ku yove. Ba namai ana aba potapota biyisi yabata si makira ba keyamai si birarana. 55 Ba priest kaikaiwabosi ba Sanhedrin tupasi Iesu ana goyona si nuwenuweni kata sita kasibunui, saba kosi kega kesana sisiya si panani. 56 Ba sisiya kwaruma pesarisi yai Iesu si gepotei, saba ereonowasi asi sisiya wai kega i bipoponi. 57 Ba mutusi si bomsiri si kwaruma, 58 “Yakai ka nonori i wona, kata God ana yove pipiya si bowai wai ana rikai, ba kesana kega pipiya si wosei wai, kao tonu murinai ana bowai.”*John 2:19 59 Saba asi sisiya wai kega i damaninei.

60 Ba priest kaikapona kosi naosi yai i bomsiri ba Iesu i toirubai i wona, “Kom kuna kaobeyana kona kega, am goyona awaika wai nikosi dam te kaobigoyonim?” 61 Saba Iesu i ma guguba, ba kega i kaobeyei. Ba yebo priest kaikapona i toiruba meyei, “Ba kom Keriso Bibigairenina Natuna kona?”

62 Ba Iesu i wona, “Yauku, wai natuna kona kinani Sebare Natuna Maragata Sakina kasounai ina makimakira, ba sapamai guba tepanai ina botubotu.”*Daniel 7:13

63 Ba priest kaikapona kana gara i rusika ba i toiruba, “Awaika kairavina pipiya mutusi tana toirubaisi? 64 Komi ana bigigima ko nonori, wai mekabage ko nosinosi?”

Saba kosi ereonowasi si wona, “Ko kasibunui.”

65 Saba mutusi si dagui si bokanukanui, ba matana si kau potai ba nimasi yai si ravi ba si wona, “Ki peroveta wona kurikai!” Ba bikoyakoyaga biyisi si yauni ba si ravi ba si yauni si nae.

66 Ba maranai Peter priest kaikapona ana yove gaburinai i mamana, wai ana saibisaibirina wasike kesana i veraibira. 67 Ba maranai Peter i kinani i birarana wai i kita bikuikuiri ba i wonei, “Kom Iesu Nazareth biyina yabata?”

68 Saba Peter i kaosairei, i wona, “Yauku kega a kuiri kom awaika ke bisisiyei,” ba matam keta i kasibau taveyei.

69 Ba maranai wasikena Peter nai i kinani wai, iyabosi nai si msi bibiri wai kurisi i wona mena, “Niko sebare wai kona kesana.” 70 Saba Peter i kase mena.

Ba kega rabarabana, kosi nai parinai si bimsiri wai Peter kurina si wona, “Bisuwona kom kona kesana, kairavina kom wai Galilee sebare.”

71 Kata Peter i dagui ikesina i kaonawa meyei, ba i wonisi i wona, “A bisuwonimi, niko sebare ko bisisiyei wai kega a kuiri.”

72 Ba mara kesana kokoereko i tou i ruwai. Kata Peter i nosi mekabage Iesu i sisiya kurina, “Muri yai kokoereko ina tou mara ruwamo, wai kom mara tonu kuna wona kega ku kuiriku.” Nuwanuwana i tupagudai wai i tou nokanoka.