2
A bibi na maubina doana mine Krais Iesu
1 De, natugu, taliuliu oo no toe a dinodo mine Krais Iesu ni masagali e oo. 2 Ma inade vuso oo longe eau veimuade na matana vanunua vuso, ielili oo no bilii e sou a vanunua vuso, ne sou lapitole sagali a inade mine Salemo i mapigogoi ne sou matetengi e sou sea tamai.
3 Oo no guale a davutina pilu e eau tomane a bibi doana na maubina mine Krais Iesu. 4 Oo muada a vanua na maubina sou ma lapitole ete a pipigona sea lou. Boa. Sou lapitoletole a pipigona mina maubina moni, vuna bibi ei itealale sou ei kale sou ne sou goligoli a pipigona mina maubina moni. 5 A bibi ei vele a mailabana ei ni ogomuli a binea mina mailabana. Mane boa, ei ni ma guale ete a kele na vululusina. 6 A bibi na pipigona mauma ei ni guale pale a avena gona inani mina mauma ane sou sanii. 7 O no damutaletale a inade eau vei ie, maido me Bibi Taula ei ni toe e oo no muada a vuna inade vuso ie.
8 Oo no damutaletale Iesu Krais, ei ilisiliu na minate, me ei a bibi mina abuna mine Devit tomane a malongolongona kubaana eau veipale. 9 Sou papale eau a sen tomane a bibi ei pagu sele, me sou bilii e eau a matamatana mavaana, vuna maido eau malongo a malongolongona kubaana, moni a inade mine Salemo ei ma tomane ete a sen sou papaletole. 10 Maido me eau toesagali a lilogu, mea tabule a mavaana vuso li mina buloine sou a vanunua ma tavivine Salemo ei vilealesi minei oto, ne sou tamai guale a maulina ino ne Krais Iesu iedo, me ne sou ugu kuba iiti sele pilu e ei taliuliu taliuliu.
11 Ieli a inade patotona,
“Mane eitou mate pilu e ei,
de neitou mauli tamai pilu e ei.
12 Mane eitou ugu sagali a muine eitou me eitou tabule a mavaana sou ie,
de neitou muina a mapana tamai pilu e ei.
Mane eitou lametase ei,
de ei tamai ni lametase e eitou.
13 Eitou ma ogomuli sele ete a inade minei,
moni Bibi Taula ei taliuliu ogomulimuli a inade ei veiosi.
Vuna ei ni ma mapigogoi ete ni sauvule a inade minei.”
A bibi na pipigona ivu mine Salemo
14 Na matane Salemo, oo no vei sagali ane sou ne sou ma adesinoanoa lou a golugolu banini sabubu. Matana inade maido, ei ma mapigogoi ete ni buloi a bibi tasa. Boa. Ei toegegeligeli moni a maulina mine sou a vanunua sou longe. 15 Oo no pipigo sagali no palea a bibi na pipigona ivu, me ne Salemo ni kale a pipigona minio. Maido me oo no veimuade bilesi a inade ivu mine Salemo, me oo no ma isa oto a maelana na matane ei. 16 Bulagetase sou a vautautana inade sabubu, vuna matana inade ei ni maasi a vanunua ma tavivine ne sou bulagetase Salemo. 17 Matana matetengina maido, ei tomane a tuutuu pagu mina toegegelina bibi, me ei ni palea buo sele. Tau lua ne sou sulu goligoli a matana inade simaido, ede Himeneus pilu e Piletus. 18 Sulu veletasesi a vea na adepatotona, vuna sulu adeade maido, “Ilisiliuna ei lisasi, maido me mulimuli neitou ma mapigogoi ete neitou ilisiliu lou.” Na inade ieli sou toegegeligeli a silimulina mina vanunua ma tavivine sanii. 19 Moni Salemo ei mamagiliosi a bao sagali mina tinigena viepiluna kinaka minei, ma baobao iedo sou magili sagali a muine sou. Me na bao do, ei niage a inade maido, “Bibi Taula ei muada kuba a vanunua ma tavivine minei oto.” Me ei niage tamai a inade ie, “Vanunua vuso sou veipale a aisane Bibi Taula, ne sou lametase a inigogona pagu.”*Savuluna 16:5; Aisaia 52:11
20 Na luma buo tasa, a matamatana taogo ino sou goli a gol ma silva, sanii sou goli a obu, me sanii sou goli a magamaga. Sanii ei mina pipigona doana, me sanii mina pipigona maisaba. 21 Maido me mane a bibi tasa ei taulele a matamatana inigogona pagupagu ie me ei palea maolo na matane Salemo, io ei ni muina tomane a taogo mina pipigona doana sele. Ei ni muina a bibi ivu mine Salemo, me ei mapigogoi ni pipigo ane Bibi Taula minei. Ei ni masusulu a matamatana pipigona vuso i doana.
22 Maido me taliuliu oo no lametase a masagana pagupagu, ei ino na lilone sou a vanunua alalaba. Me oo no ogomuli a inigogona bilesi, ma inigogona silimuline Salemo, ma inigogona kinale sele usino ne sou sanii, ma inigogona lilomeana pilu e sou a vanunua sou ino maolo sele na matane Salemo me sou kaka na aisane Bibi Taula. 23 Me oo no ma belibeli lei a tagilamu usino na vautautana inade ma inade maisabasabana mine sou a vanua sou ma isa oto a damutatalana doana. O muada, a matana inade maido, ei mapalele a adesinoana moni. 24 Ma bibi na pipigona mine Bibi Taula ei ni ma adesinoanoa lou. Boa. Ei ni goli moni a inigogona doana usino na vanunua vuso. Mane a vanua sou ma longemuli ete ei, ei ni vale moni usino ne sou mei ni matetengi e sou a inigogona lilomeana. 25 Ei ni vale moni, me ei ni toebilelesi a damutatalana mine sou a vanunua na longetasena inade. Mane ei goli maido, io nane Salemo ei ni sauvule a lilone sou, me ne sou guale a muadana doa mina inade ivu. 26 Io damutatalana mine sou ni palea muada lou, me ne sou veletase a mai mine Satan, ei palebubuli e sou ne sou ogomuli a inigogona ei kale.