Hibru
Laulau usino ne sou e Hibru
1
Natune Salemo ei bilii e eitou a inade
1 Lisa Salemo ei vei le eisusune eitou mapapaina na asene sou a profet na matamatana vea seasea. 2 Moni ilala na punuluna malada ie Salemo ei ademuada ane eitou na asene Natuna. Salemo ei matoalesi e Natuna mina gualena golugolu vuso. Me na limane ei Salemo ei mapale a magamaga ma langi tamai. 3 Natuna do ei a muada mina malasana buo mine Salemo, mei tomane moni e Salemo oto. Inade mine ei isa a sagagalina, me na inadena do ei iteale a golugolu vuso ni muina kuba. Ei mapuliosi a pipigona mina taulelena sinusu mine sou a vanunua ma tavivine vuso ne sou palea alaba, seido ei ugu na lima gata mine Salemo, ei a Munugana Mapana ei ino oata oto sele.
Natune Salemo ei vululusi e sou a bineanea
4 Salemo, Tamana ei toe e Natuna ei palea buo mamau lou ane sou a bineanea, tomane moni ei bilii e ei a aisa i buo mamau lou ana aisane sou.
5 Salemo ei vei ane Natuna maido,
“Oo e Natugu.
Seidei eau paleasi e tamamu.”*Laulau na Inala 2:7
Me ei vei lou maido,
“Eau na muigu e tamane ei,
me ei ni muina e natugu.Ӡ2 Samuel 7:14
Moni sei ilala Salemo ei vei a matana inade maido usino ne sei bineanea minei? Boa vuso sele.
6 Moni ilala ei peltase Natuna matalagu usinani na magamaga, Salemo ei vei maido,
“Bineanea vuso mine Salemo ne sou masalalai e ei.”‡Binea 32:43
7 Salemo i damutale sou a bineanea me ei vei maido,
“Salemo toe e sou a bineanea minei a avivili,
me ei toe e sou a vanunua na pipigona minei a niluluna oavi.ӤLaulau na Inala 104:4
8 Moni ei ade e Natuna maido,
“Salemo, o no muimu a mapana taliuliu taliuliu.
Oo iteale a vanunua ma tavivine vuso minio na inigogona i bilesi moni.
9 O kalekale moni a inigogona bilesi, me oo ma kale sape ete a inigogona pagu.
Maido me Salemo minio oto ei singi a wel mina munongena muata ne oo,
na inigogona iedo ei maite maido oo a mapana, me oo vululusi e tamtamaimu vuso.”*Laulau na Inala 45:6-7
10 Laulau mine Salemo ei vei lou maido,
“Bibi Taula, sinokona o mapale a magamaga ieli me ei muina sagali.
Me na limamu oto o mapale a langi tamai.
11 Ne sou buale vuso, moni oo no muimu taliuliu.
Ne sou masisinge tomane a kinainai mumugu.
12 Me oo no vilitatai e sou
tomane a malo, me ne sou sauvuvule tomane a kinainai.
Moni oo no muimu moni simaido taliuliu taliuliu.
Ma ilala minio ei ma mapigogoi ete ni pulu.ӠLaulau na Inala 102:25-27
13 Salemo ei vei le Natuna maido,
“Oo ugu na limagu e gata
mapigogoi eau na tau e sou a butu minio
ne sou matano moni ne oo.”‡Laulau na Inala 110:1
Moni sei ilala Salemo ei vei a matana inade maidolo usino ne sei bineanea minei? Boa vuso sele.
14 Sou a bineanea sou a nunu, me sou goligoli a pipigona mine Salemo. Salemo ei peltatase sou usino mina buloine sou a vanunua ma tavivine ei kale ni gualeliu.