8
Iesu ei a mapana prist mine eitou
1 Io a inade eitou kale neitou vei, ei maido. Eitou isa a matana mapana prist, ei uguosi na lima gata na Munugana Mapana na langi. 2 Ei goligoli a pipigona mina prist na luma bale maolo mine Salemo. A luma bale do a vanunua sou ma mamagili ete, Bibi Taula oto ei mamagili.
3 A mapana prist vuso sou isa a pipigona mina biliina niabi me niabina taulelena sinusu usino ne Salemo. Maido me Iesu a mapana prist tamai ei ni bilii a niabi. 4 Moni mane ei muina moni na magamaga, ei ni ma mapigogoi ete ni palea a prist. Vuna maido, sou a prist sou inosi me sou biliilii a matamatana niabi usino ne Salemo, tomane a binea ei vei. 5 Sou lapitole a pipigona a prist na luma bale maolo mine Salemo na magamaga. Luma bale maolo do ei tomane a nunu ma malivovona moni mina luma mine Salemo ivu ino na langi. Na ilala Moses ei kale ni mamagili a luma bale maolo, Salemo ei vei maido, “Ilala o goli a golugolu vuso mina luma iede, o no ogomuli bilesi a nunune ei eau maite e oo na loena.”*Gualeliuna 25:40 6 Moni seidei Iesu ei gualesi a pipigona mina prist, ma pipigona do ei vululusi sele a pipigona mine sou a prist. Vuna ei muina a balivuana bibi mina toesagalina magilipiluna alaba Salemo ei adegatunasobe ni iabi, ma magilipiluna do ei vululusi sele a magilipiluna lisa.
A magilipiluna alaba ei vululusi a magilipiluna lisa
7 Mane a munugana magilipiluna ei doana sele, io Salemo ei ma goli ete ni mapale a magilipiluna sea lou. 8 Moni e Salemo ei pogesi a inigogona pagu mina vanunua ma tavivine vuso me ei vei maido,
“Bibi Taula ei vei, ‘Longe. Eau vilealesi a ilala tasa
me eau na goli a magilipiluna alaba pilu e sou a abuna mine Israel me sou a abuna mine Iuda.’
9 Salemo ei vei lou maido, ‘Magilipiluna do ei ni ma tomane ete a magilipiluna lisa eau goli pilu e sou e eisusune sou na ilala eau maasi e sou maino ne Isip.
Ilala do eau lapitole a limane sou, me eau maasi e sou usino.
Moni sou ma ogomuli ete a inade mina magilipiluna minau,
maidolo me eau e Bibi Taula, eau lametase sou.’
10 Me Salemo ei vei lou maido, ‘Mulimuli a magilipiluna alaba eau kale na mamagili pilu e sou a abuna mine Israel,
ei maido.
Eau na tau a binea vuso minau na damutatalana mine sou,
me eau na niage a inade minau na lilone sou.
Eau na muigu e Salemo mine sou,
me sou ne sou muina a vanunua ma tavivine minau.
11 Na ilala iedo sou ne sou ma matetengi ete a vanua sou malu agavuale ma tatasine sou maido,
“Ne amutou muada e Bibi Taula.”
Vuna sou vuso ne sou muada e eau,
golu tasa boa mane sou a vanua sabubu ue sou isa a aisa buo.
12 Eau na lilotase a sinusu mine sou
me eau na ma damutaleliu ete lei a inigogona pagu mine sou.’ ”†Ieremaia 31:31-34
13 Salemo ei ade i “A magilipiluna alaba,” na inade ieli ei maite i maido, a munugana magilipiluna ei palea lisasi ni pulu, ei ni muina sapa bisii moni, me ei ni buale vuso.