‘Eau isa a nunu padilua mine Salemo me eau lapitole a mataidoido padilua do. Eau muada a inigogona vuso oo goli, oo lagu mauli, moni boa, oo matesi. 2 Oo no lutu mo ilisi. Golu ieli saboa mate, moni i agaviosi ni mate, iede oo no masagali. Vuna saboa eau ite a inigogona minio i bilesi vuso na matane Salemo minau. 3 A malongolongona kubaana lisa oo longe mo guale do, iede no damutaleliu lei. Me oo no ogomuli iiti me oo sauvule a lilomu. Mane oo ma lutu oto a ngunolo, io ma tabaa oto eau na asuale oo tomane a bibi na paaalina. Oo ma mapigogoi ete no muada sei ilala eau na asu usinani.

4 Moni oo isa a vanunua ma tavivine sanii ino ne Sadis sou ma toemumugi ete a kinainai mine sou. A inigogona mine sou ei bilesi, mapigogoi ne sou kai a kinainai keakea me sou asu pilu e eau. 5 Mane a bibi ei vululusi a maubina, io eau na makai ei a matana kinainai keakea, me eau na ma saveitase ete a aisane ei na laulau mina maulina. Eau na veipale a aisane ei na lagune Euma me sou a bineanea minei. 6 Io a bibi ei isa a tagilana ei ni longe kube a inade a Maolona Nunu ei malongo ane sou a viepiluna kinaka.’ ”

‘Eau maolo, ma inigogona vuso minau i patotona. Eau lapitole a ki mine Devit. Ma golu eau pee, a bibi tasa i ma mapigogoi ete ni kapi, ma golu eau kapi, a bibi tasa i ma mapigogoi ete ni pee. 8 Eau muadasi a inigogona vuso oo goli. Io oite. Na lagune oo, eau peesi a tema, ma bibi tasa i ma mapigogoi ete ni kapi. Eau muada i maido a sagagalina minio ma buo oto, moni oo ogomuli a inadegu, me oo ma lametase ete a aisagu. 9 Oo muada e sou a abuna mine Satan, sou vei ve, sou a abuna mine Iuda, moni boa. Sou a vanunua na aualana. Io longe. Eau na toe sou a vanua ie ne sou asu me sou totopatulu agavuale a ubumu me ne sou muada i, eau kale mamai sele oo. 10 Oo ogomuli iiti a inadegu, me oo magili sagali na mavaana vuso ei palea le oo. Maido me eau na iteale oo na ilala tinovo do ei kale ni palea mei tove sou a vanunua ma tavivine na aveavena vuso na magamaga.

11 Eau na asu asi usino minio. Golu oo lapitole, iede oo no lapitole obi, dae a bibi tasa ei ni guale a kele minio. 12 Mane a bibi ei vululusi a maubina, eau na mamagili e ei tomane a baobao na toesagalina luma mine Salemo minau, me ei ni ma ilisitase ete a luma mine Salemo. Boa vuso sele. Eau na niage a aisane Salemo minau muata ne ei me eau na niage a aisana aubu buobuo mine Salemo minau, ei e Ierusalem alaba i asu maino ne Salemo minau mei ilisitase a langi mei sivo utano. Ma aisagu alaba do, iede tamai eau na niage muata ne ei. 13 Io a bibi ei isa a tagilana, ei ni longe kube a inade do a Maolona Nunu ei malongo ane sou a viepiluna kinaka.’ ”

‘Eau a bibi sou tole e “Amen,” me eau ogomuli sagali sele a inade vuso mine Salemo. Me taliuliu eau veipale a inade patotona moni. Eau a vuna golugolu vuso Salemo ei mapale. 15 Eau muadasi a inigogona vuso oo goli. Eau muada, oo ma maigi oto me oo ma tivula oto. Eau kale oo no maigi ue oo no tivula, 16 moni boa. Oo tivula bisii moni. Oo ma tivula vauta oto me oo ma maigi vauta oto. Maido me eau na luetaselele oo na asegu. 17 Oo adeade maido, “Eau isa a vatu makuba, me eau isa a golugolu makuba i doana. Eau ma boto oto a golu tasa.” Moni boa. Oo ugu gegelu sele, mapigogoi ne sou a vanua ne sou lilomuli e oo. Oo kapelabe sele me oo mata ego me oo magili aimu moni. Me oo oto o ma muada oto a golu ie. 18 Maido me eau ade sagali ane oo. No oli a gol minau, iede a oavi ei tuni mei taulele sele a golugolu pagu ne ei. Maidolo oo no palea vuvuti. Me puiale oo no oli a kinainai keakea mina kaisobena vovomu, me sou a vanua ma mapigogoi ete ne sou ite oo magili aimu moni me oo maela i. Me puiale oo no oli a bunu mo no tau na matamu, me oo no gemu kuba.

19 A vanua sanii eau kale, io eau ade papai ane sou mea toebilelesi a inigogona mine sou. Maido me oo no sagali a toebilelesina inigogomu, me oo no sauvule a lilomu. 20 Longe, eau magili na tema mea lalaba. Mane a bibi tasa ei longe eau mei pee a tema, io eau na gali ulilo mea na aani pilu e ei, me ei ni aani pilu e eau.

21 Mane a bibi ei vululusi a maubina, eau na longo ei ni ugu pilu e eau na niugugu a mapana minau tomane lisa eau vululusi a maubina, mea ugu pilu e Euma na niugugu a mapana minei. 22 Io a bibi ei isa a tagilana ei ni longe kube a inade ieli a Maolona Nunu ei malongo ane sou a viepiluna kinaka.’ ”