1 Io a bineanea li ei maite eau a nanu tasa buo, iede a nanu mina biliina maulina, ei muada mamau tomane a kristal. Nanu odo ei sali maino na niugugu a mapana mine Salemo pilu e Natuna Sipsip, me ei sali usino 2 balivua sele na vea buobuo mina aubu buobuo do. Na lili na nanu, mainani me maino, a obu mina biliina maulina ino. Obu odo ei vualale a vuavuana masavulu tasa timana lua na avala tasa. Ei vua na gamegame vuso. Ma laulau na obu odo sou mina toekubena vanunua ma tavivine mina abuna vanunua vuso. 3 A inade na toegegelina ei ni ma muina otosi.

Niugugu a mapana mine Salemo me Natuna Sipsip ei ni muina na aubu buobuo do. Ma vanunua na pipigona mine Salemo ne sou totopatuliale ei, 4 me ne sou ite a lagune ei, ma aisane ei ni muina na palalane sou. 5 Lodo ei ni ma palea otosi, ma muada mina sulu ma muada mina oaso ne sulu ma pipigo otosi. Vuna, Salemo e Bibi Taula, ei ni bilii a muada usino ne sou. Ne sou iteale taliuliu taliuliu tomane a mapana.

6 Bineanea do ei vei le eau maido, “Inade do ei patotona vuso, puiale sou a vanua vuso ne sou silimuli sele ei. Salemo e Bibi Taula, ei mailisi a nunu mine sou a profet mina veipalena inade minei, ei peltase a bineanea minei usinani mina maitena vanua na pipigona minei a golugolu vuso ne sou palea asi.”

7 Iesu ei vei “Mu longe, eau na asu asi usinani ne amutou. Vanunua ma tavivine sou ogomuli a inade mina malongolongona vuso eili na laulau ie, ne sou mongemonge.”

8 Eau e Ioanes, eau longe a inade do me eau ite a golugolu sou odo. Eau longesi mea itesi, io eau totopatulu agavuale a ubuna bineanea ei maite eau a golugolu odo, mea kale na totopatuliale ei. 9 Moni ei vei le eau, “Oo ma goligoli lei maido! Eau tamai eau a maitamaina a pipigona minio pilu e sou e tamtamaimu, ede sou a profet. Me eau a maitamaina mine sou a vanunua sou ogomuli a inade na laulau ieli. Oo no totopatuliale Salemo tasa moni.” 10 Me ei vei lei le eau maido, “Inade mina malongolongona ei eili na laulau ie, iede oo ma bulutole sobesobe lei, vuna matailala i agaviosi. 11 Maido ma vanunua ma tavivine sou goligoli a inigogona pagu, ne sou goli moni a inigogona pagu. Ma vanunua ma tavivine sou goligoli a inigogona mumugu, ne sou goli moni a inigogona mumugu. Ma vanunua ma tavivine sou goligoli a inigogona bilesi, ne sou goli moni a inigogona bilesi. Ma vanunua ma tavivine Salemo ei vileale minei oto me sou ino maolo, ne sou goli moni a inigogona maolo.”

12 Iesu ei vei maido, “Longe. Eau na asu asi usinani. Me eau na maasi a mapa mina biliine sou a vanunua. Eau na maliu a mapa ne sou a vanua tastasa mapigogoi a inigogona sou goli. 13 Eau a Alpa me eau a Omega. Eau a munugana ivu me eau a punuluna sele. Eau a sinokona me eau a punuluna.

14 “Vanunua ma tavivine sou loloi a kinainai mine sou, ne sou mongemonge. Sou mapigogoi ne sou guale a vuavua na obu mina biliina maulina. Me sou mapigogoi ne sou gali ulilo na tematema na aubu buobuo do. 15 Moni a vanunua pagu tomane a busebuse ma vanunua sou goligoli a milolo ma vanunua sou goli a inigogona sualolona ma vanunua sou valiputemate a vanua sea ma vanunua sou totopatuliale sou a salemo auala ma vanunua sou kale a inigogona mina aualana me sou ogomuli, a vanunua sou odo ne sou muine sou sala na aubu buobuo mine Salemo.

16 “Eau e Iesu, eau peltase a bineanea minau usino ne amutou, me ei veipale a inade do usino ne amutou a vanunua ma tavivine mina viepiluna kinaka. Eau moni eau a uusina ei palea le sou a abuna mine Devit, me eau e tubune Devit. Me eau a mataidoido tosese do ei lada mamau na autupola siisii sele.”

17 Maolona Nunu pilu e susune Natuna Sipsip sulu vei, “Oo vele.” Ma vanunua vuso sou longe a inade do sou tamai ne sou vei, “Oo vele.” Me sei bibi ei malou ei ni asu usinani. Bibi ei kale ni inu ei ni asu usinani ni guale a nanu na biliina maulina, ei a niabi sabubu moni.

18 Eau bilii a inade sagali usino na vanunua vuso sou longe a inade na malongolongona eili na laulau ie. Mane a bibi tasa ei adesui a inade tasa na inade li, io Salemo ei ni adesui na bibi iedo a golugolu pagu sele Salemo ei ade i na laulau ie. 19 Mane a bibi tasa ei taulele sanii mine sou a inade na malongolongona eili na laulau ie, io ei ni ma mapigogoi ete ni guale a vuavua na obu mina biliina maulina mei ni ma muina oto na aubu buobuo maolo mine Salemo tomane a laulau ieli ei ade i.

20 Bibi ei veipale a golugolu sou odo ei vei, “Ivu sele, eau na asu asi usinani.”

Ei moliana. Bibi Taula Iesu, oo vele!

21 Dinodo mine Bibi Taula Iesu ei ni muina pilu a vanunua ma tavivine vuso mine Salemo. Moliana.