8
Ja Jesús xkuga̱jpxɨndɨp Dios Teety wyɨngujkp
1 ¿Midiꞌibɨts ɨdøꞌøn tsojkɨp yikxon ja̱ꞌgyukɨ? Jaꞌ ɨdøꞌøn ku adøm ja møjteetywɨndsøn nmøøtꞌa̱jtyɨm jøts ja jam tø yꞌɨxa̱ꞌa̱ky Dios Teety yꞌaga̱ꞌngyøjøꞌøm yikutujkpɨ, 2 jøts ja jam tyeetyꞌaty tsa̱ptøjkjotp midi ja Dios Teety køꞌøm tø tkøjy, kaꞌap ja ja̱a̱ꞌy ja tø ttukyikøjy. 3 Wɨndsøꞌøkꞌa̱jtɨn, tamayꞌa̱jtɨn, jaꞌ ɨdøꞌøn ja teety tyundɨp, paty ɨdøꞌøn nayɨdeꞌen ja nwɨndsønꞌa̱jtɨm Jesucristo kuwa̱nɨ pya̱a̱tꞌatyɨ jøts ja wɨndsøꞌøkꞌa̱jtɨn tmoꞌot ja Dios Teety. 4 Ku ja nay ya̱ jeexyɨp chøønɨ na̱xwiiñ, kaꞌap ja yjeexyɨp tyeetyꞌaty, pø jaaxɨ teety ya̱ pøn jadeꞌen ttundɨp sa̱mɨ ja Moisés wya̱ꞌa̱ñ. 5 Nugo agojna̱xts ja abikpyɨ teetytɨ myɨdundɨp, tum jaꞌ yꞌagojna̱x midi jam tsa̱jpjotp. Jaꞌagøjxp ja jadeꞌen yiknɨja̱wɨ ku Moisés ja Dios ñɨma̱a̱jyɨ, ku døꞌøn ja wyɨnaty tuꞌuk ja tsa̱ptøjk tyikꞌøyɨwya̱ꞌa̱ñ, ku yɨdeꞌen yiknɨma̱a̱y: “Yikxonɨm xꞌext, jøts nayɨdeꞌen pyɨdsøꞌømt sa̱m tø ndukꞌixy kojpkøjxp.” 6 Ja øyꞌa̱jtɨn, ja tɨyꞌa̱jtɨnts adøm ja nmøjteetywɨndsøn myɨdumpy, jaꞌagøjxp ku ja tkugajpxy tkudanɨ ja øyꞌa̱jtɨn, midi adøm ja Dios Teety køꞌøm tø xamɨdsøjkyɨm.
7 Kuk ɨdøꞌøn jeexyɨp nɨsa̱ kyaꞌejxɨ ja jawyeen kutujk midi ja Moisés ja Dios tuka̱jpxna̱jxøø, kaꞌats jeexyɨp jaduꞌuk chøkyɨ sa̱m ja Cristo yjaꞌ tø tna̱nkyꞌijxyɨ. 8 Ja kuxɨ ja Dios tkakaꞌpxyja̱wɨ ja jawyeen kutujk sa̱m ja køꞌøm wya̱ꞌa̱ñ jap nøkyijxpy:
Yɨdeꞌen ja Dios Teety wya̱ꞌa̱ñ: Meꞌemp ja xøøw ja jumøjt
ku øts ja Israelɨt ja̱a̱ꞌy jøts ja Judajɨt ja̱a̱ꞌy nmoꞌodɨt jaduꞌuk ja kutujk pønɨ kyupøjktɨp.
9 Kaꞌap ja jadeꞌen tꞌext sa̱m jaꞌ midi tø njatumɨ møøt ja myɨguga̱jp, midi jekyɨp tsɨnaadyøø,
ku øts ja nwa̱a̱pɨdsømdɨ Egipto yꞌetjotp;
kumɨ kaꞌap ja tpadundɨ, paty øts ja nmajtstuttøø.
10 Yɨdeꞌen yja̱a̱kwa̱ꞌa̱ñ ja Dios Teety, yɨdeꞌents ɨdøꞌøn ja yꞌett, midi øts ɨdøꞌøn ndunwa̱jnɨp ja Israelɨt ka̱jp:
Ndukja̱ꞌgyukɨp øts ja øgyutujk jaꞌadɨ,
jøts øts ja yꞌanmɨja̱ꞌwɨngøjxp nbɨkta̱a̱jkɨdɨt.
Jaꞌats øts ɨdøꞌøn nɨDiosꞌa̱ttɨp,
jøts øts ja nga̱jpꞌa̱ttɨt.
11 Kaꞌ døꞌøn pøn wyɨnaty ja myɨguꞌuk nɨti tkadukyikyujtɨ pønɨ ti døꞌøn ja tyuꞌump;
jaꞌagøjxp ku øts ja wyɨnaty ja møj ja mutsk tø nduknɨja̱wɨdɨ jøts øts ja nɨdukɨꞌɨyɨ xꞌejxka̱ptɨt.
12 Nmaaꞌkxɨdɨp øts jaꞌ ja kyaꞌøchɨna̱a̱ꞌyɨn, jøts nɨjuunɨ øts ja pyøky ja ngaꞌukja̱ꞌmyajtsnɨyɨdɨt.
13 Ku døꞌøn ja Dios Teety ja jemy ayuujk ja jemy wɨnma̱a̱ꞌñ tnɨgajpxy, mɨja̱a̱ꞌyɨnɨp ɨdøꞌøn ja myɨjawyeembɨ kutujk; kuts ja tø myɨja̱a̱ꞌyɨnɨ, pojɨn ja kyudɨgøøñɨt.