Neky Diꞌibʉ Yajtuknigajxtʉ Ja Ebreeʉ Ja̱ꞌa̱yʉty
1
Jesukristʉkyʉjxmʉ Dios kyajxy
1 Tim jékyʉp kana̱k ok es kana̱k naxʉ Dios ttukmʉgajxy ja kyuga̱jxpʉty ja nꞌaptʉjkꞌa̱jtʉm, 2 per na̱a̱mnʉm xytyukmʉga̱jxʉm ja ꞌyUꞌunk. Yʉ ꞌyUꞌunk mʉdʉ Dios dyajkojy tʉgekyʉ diꞌibʉ jaaꞌa̱jtp, es tʉ tmoꞌoy tʉgekyʉ éxtʉmʉ kyuma̱ꞌa̱ñ. 3 Ja Diosʉ ꞌyUꞌunk yʉꞌʉ dʉꞌʉn ja̱jp éxtʉmʉ Dios Teety, es yʉꞌʉ dʉꞌʉnʉ Dios nandʉꞌʉn éxtʉmʉ Dios Teety. Tʉgekyʉ diꞌibʉ tsa̱jpótm es ya̱ naxwiiñ yeꞌepy es ꞌyity éxtʉm tꞌaneꞌemy mʉt ja myʉkꞌa̱jtʉn.
Waanʉ mʉj ja Jesús kʉdiinʉm ja ánklʉsʉty
Jesukristʉ yʉꞌʉ tʉ xyajpojpʉnitʉgoꞌoyʉm ʉdsa̱jtʉm naxwíñʉdʉ ja̱ꞌa̱yʉty, es óknʉm ñaxweꞌtsy aga̱ꞌa̱ñdsyoo ma̱ Dios Teety yajkutíky tsa̱jpótm. 4 Pa̱a̱ty tʉ ttukja̱ꞌty ja Jesús tʉmʉdátʉt niꞌigʉ mʉjꞌa̱jtʉn kʉdiinʉmʉ ánklʉsʉty, pes tʉ tꞌaxa̱jʉ éxtʉmʉ kyuma̱ꞌa̱ñ ja xyʉʉ waanʉ mʉj kʉdiinʉmʉ ánklʉsʉty. 5 Mʉt ko Dios ni na̱ꞌa̱ tkaꞌꞌanma̱a̱y ni tuꞌugʉ anklʉs:
Ʉjts mij xyTyeetyꞌa̱jtp.
Tyámʉts ngʉxʉꞌʉgʉt kots mij nꞌUꞌunkꞌáty.
Es nan kyajʉ Dios tꞌanma̱a̱y ni tuꞌugʉ anklʉs:
Ʉjts mij xyTyeetyꞌátʉp,
es mijts nꞌUꞌunkꞌátʉp.
6 Nandʉꞌʉn ko Dios tkaxa̱ꞌa̱ñ ya̱ naxwiiñ ja ꞌYuꞌunk diꞌibʉ ijtp éxtʉmʉ kaꞌaxkópk, dʉꞌʉn jyʉnaꞌañ:
Waꞌanʉ nꞌánklʉsʉts tꞌawdátyʉty.
7 Es ko Dios xytyukꞌixa̱ꞌa̱nʉm wiꞌixʉ dʉꞌʉnʉ ꞌyánklʉsuty, dʉꞌʉn jyʉnaꞌañ:
Dios ñaskajxʉp ja ꞌyanklʉs éxtʉmʉ poj, es éxtʉmʉ jʉnyaꞌangʉn.
8 Per ko Dios tnimadyaꞌaky ja ꞌyUꞌunk, dʉꞌʉn jyʉnaꞌañ:
Mij Dios, winʉ xʉʉ winʉ tiempʉ ja mgutujkʉn ꞌyity,
myajkutúkʉp mʉt ja tʉyꞌa̱jtʉn.
9 Mʉt ko tʉ xytsyeky ja tʉyꞌa̱jtʉn es tʉ xyꞌʉxtijy diꞌibʉ axʉʉk;
pa̱a̱ty tʉ niꞌigʉ nmoꞌoy ja xondakʉn kʉdiinʉmʉ mmʉguꞌuktʉjkʉty.
10 Es nandʉꞌʉn ja Dios tꞌanʉʉmʉ ja ꞌyUꞌunk:
Mij Windsʉ́n, tim jékyʉp xyajtsoneꞌky xyajtsondáky ja naxwíñʉdʉ,
es mij kʉꞌʉm xypyʉjtáky ja tsa̱jp.
11 Yʉꞌʉjʉty tʉgooydyaꞌaydyʉp,
per mij mwʉꞌʉmʉp winʉ xʉʉ winʉ tiempʉ.
Nidʉgekyʉ yʉꞌʉjʉty ꞌyamʉjʉdyaꞌayʉt éxtʉmʉ wit tyiky;
12 es dʉꞌʉn xyꞌadijmúkʉt éxtʉmʉ tuk wit, es xyajtʉgátsʉt,
per mij dʉꞌʉñʉm mꞌity éxtʉm mꞌity,
kyaj mjikyꞌa̱jtʉn kyukʉ́xʉt.
13 Dios ni na̱ꞌa̱ tkaꞌꞌanma̱a̱y ni tuꞌugʉ anklʉs:
Uꞌuñʉ ma̱ts nꞌaga̱ꞌa̱ñdsyoo,
extʉ kots nbʉjta̱ꞌa̱gʉt ja mmʉdsip mdekypyatkʉꞌp.
14 Ja ánklʉsʉty, ja̱ꞌa̱jʉn yʉꞌʉjʉty, es yajkéxy es tpudʉ́kʉdʉt ja diꞌibáty ꞌyaxa̱jʉyándʉp ja nitsokʉn.