1 Ra na kundaa ini ndoꞌo na ñani yo ñuu Colosas, chi xaꞌa ndoꞌo va kuvi ña chikaa ni yu ndiee, ra saa tu xaꞌa na ñani yo na ndee ñuu Laodicea va, ra saa tu xaꞌa sava na kuëe xini yuꞌu va. 2 Ra saa kuvi ña ^xa yu ña vaꞌa ndachikaa yu tuꞌun ndiee ini xiꞌin na, ña vaꞌa iin va na kuu na xiꞌin yo, saa chi kuꞌvi ni ini Tata yo Jesucristo xini ra na. Ra tu saa na sa na, saa ra kuvi va tandiaa na ña kundaa vaꞌa ini na xaꞌa ña kuu kuenda mii Tata yo Ndioxi ña iyoo seꞌé, ra ña iyoo seꞌé kan kuvi Jesucristo va. 3 Saa chi ndaꞌa Tata yo Jesucristo kuvi ña iyoo takundiꞌi va ña kuika ña kuu ña ndichi, xiꞌin ña xinituni, ña kumani nuu yo. 4 Ra ña kaꞌan yu xaꞌa ña yoꞌo xiꞌin ndo, ra ña vaꞌa na sandäꞌvi yuvi ndoꞌo xiꞌin tuꞌun nduvi, ña kuu tuꞌun chiꞌña va kuvi ña. 5 Saa chi vaꞌa ni köo va yu íin xiꞌin ndo, ndi su iyoo va nima yu xiꞌin ndo, iin takundiꞌi kii, ra kusii tu ini yu xiꞌin ndo ña vivii tiaku va ndo, ra ndinuni ni tu ndiaa ini ndo Tata yo Jesucristo va.

6 Ra xaꞌa ña kan ke, ta kuꞌva xa ndo ña kandixa ndo tuꞌun Ndioxi ña kaꞌan xaꞌa Tata yo Jesucristo ña kuu ra ra xaꞌndia chiñu, ke na sa tu ndo, ña sa ndo chiñu ña xaꞌndia ra nuu ndo vichin va. 7 Ra iin ta kuꞌva iyoo ña kutuꞌva ndo ke na sa va ndo, ra iin takundiꞌi kii va na kondiaa ini ndo Tata yo Jesucristo, ra ta kuꞌva kachi tuꞌun ña kutuꞌva ndo ke na kutiaku va ndo, saa chi saa ke kuvi tandiaa ndo kuu ndo yuvi xixa, na xini vaꞌa va, ra iin takundiꞌi kii tu na ndataxi ndo tixaꞌvi ndaꞌa Tata yo Ndioxi va.

8 Ra na kondiaa ni ndo mii ndo nuu yuvi na kuni sandaꞌvi ndoꞌo xiꞌin tuꞌun ña köo yaꞌvi ndiaa. Saa chi na kan, ra süvi vi Cristo kuvi ra ndikun na, chi ña yunaꞌa yuvi ^xa va na va ke ndikun na, ra kandixa tu na tachi ndivaꞌa ña iyoo nuu ña yuuvi yoꞌo va.

9 Ra na kundaa ini ndo, chi takundiꞌi ña kuu mii Tata yo Ndioxi, kuvi tu ña kuu mii Tata yo Jesucristo va, 10 ra ña xa nduu ndo iin xiꞌin Tata yo Jesucristo, ra xa iyoo takundiꞌi tu ña kumani nuu va ndo, saa chi ra kan, kuvi ra xaꞌndia chiñu nuu takundiꞌi va yuvi, ra saa tu nuu takundiꞌi ndiee ña iyoo va. 11 Ra xaꞌa ña xa nduu ndo iin xiꞌin Tata yo Jesucristo kuvi tu ña, xa kuu mii ndo tuni Ndioxi va; ndi su süvi ka iki kuñu ndo kuvi ña ndixaꞌndia na, chi xaꞌa ña sakaku Tata yo Jesucristo ndoꞌo ña sandiꞌi ra xaꞌa kuachi va ndo kuvi ña. Ra ña yoꞌo, ra tuni ña ^taxi Tata yo Jesucristo va kuvi ña. 12 Saa chi ña chichi ndo, ra na ndinduxin va kuvi ndo xiꞌin Tata yo Jesucristo, ra ndatiaku tu ndo xiꞌin va ra, ña ndatiaku ra, saa chi xa ndiaa va ini ndo ndiee Tata yo Ndioxi ña sandatiaku Tata yo Jesucristo. 13 Ra na ndii va ndixiyo ndo nuu Tata yo Ndioxi xaꞌa kuachi ndo ta yachi, ra nii ndixïyo tu tuni ra ndoꞌo va; ndi su vichin, ra xa taxi va ra ña tiaku ndo, xiꞌin Tata yo Jesucristo, ra xa kaꞌnu tu ini ra xaꞌa takundiꞌi kuachi va ndo. 14 Ra xa sandiꞌi tu ra xaꞌa tutu ña kaꞌan xaꞌa yo ña xiniñuꞌu kuvi yo xaꞌa kuachi va yo. Ra ndika cruz va kuvi ña kani ndiaa ra tutu kan, ña sandiꞌi ra xaꞌa ña. 15 Ra ña ndixiꞌi Tata yo Jesucristo ndika cruz va kuvi ña sandiꞌi ra xaꞌa takundiꞌi ndiee, ña xaꞌndia chiñu nuu ña yuuvi yoꞌo, ra kindiaa ra ndiee ña, ra ta ^xa na xiꞌin yuvi na nuꞌni ña kuaꞌan na veꞌe kàà va, kuvi ña xa ra xiꞌin ña, ña xa tiaa ra nuu ña.

16 Ra xaꞌa ña kan ke, na ndäa ndo kuu vi yuvi na kaꞌan kiꞌvi xaꞌa ndo, ña xixi ndo ndia ndia ka ñaꞌa, xiꞌin xaꞌa ndutia ra xiꞌi ndo, ra saa tu xaꞌa ña kuëe ndasakaꞌnu ka ndo ndia ndia ka viko va, ta kuu ta ndakunuu yoo, ra saa tu kii ndakindiee va na. 17 Saa chi takundiꞌi ña yoꞌo, ra ña kaꞌan xaꞌa ña kuu kii ña vaxi va kuvi ña, ndi su mii ña ndaa, ra xaꞌa Tata yo Jesucristo va kuvi ña kaꞌan ña. 18 Ra na tiäa soꞌo ndo ña kaꞌan vi yuvi maña, na kaꞌan xa toꞌo ni Ndioxi, na sandaꞌvi ndoꞌo, ña ndasakaꞌnu ndo na tatun Ndioxi, saa chi tu na sa ndo ña xa na, saa ra, sandoñuꞌu va ndo ñaꞌa ña niꞌi ndo. Ra yuvi na ^xa saa kan, ra ña kaꞌan na ke xini vaꞌa va na Ndioxi, saa chi xa satuvi va ra nuu na, kachi na, ndi su ña kaku xini mii va na kuvi ña, ra tiaa ni tu kutiaa ini va na xiꞌin mii na, ndi su mii ña ndaa, ra köo mii yaꞌvi ndiaa vi ña kutiaa ni ini na xiꞌin mii na. 19 Ra na ^xa saa kan, ra ndïkun vi na Tata yo Jesucristo, ra kuu xini xaꞌndia chiñu nuu na veꞌe ñuꞌu, ra ^sakuxi tu ra na, ña vaꞌa na kuaꞌnu va na, ra kuu na iin iki kuñu va, ta kuꞌva iyoo tuchi ña ndachutaꞌan iki kuñu ña kuu ña iin, ra ta kuꞌva kuni mii Tata yo Ndioxi sakuaꞌnu ra ña ke xaꞌnu ña kuaꞌan va ña.

20 Ra ndoꞌo, ra xa kundaa va ini ndo, chi Tata yo Jesucristo va kuvi ra ndikun ndo, ra ta ndixiꞌi ra, ra ta iyoo na ndixiꞌi ke iyoo tu ndoꞌo va xiꞌin ra. Ra xaꞌa ña kan ke xäꞌndia chiñu ka vi tachi ndivaꞌa nuu ndo vichin. ¿Ra nichuun ke ^taxi tuku ndo ndiayu ña ^ndakaꞌndia chiñu ña nuu ndo? ¿Ra nichuun kuvi tu ña ^kandixa ndo yuvi na kaꞌan ña na sä ndo ndia ndia ka chiñu vaꞌa, ña kuu ña väꞌa nuu na kan, 21 ta kuu ña na tïin ndo ndia ndia ka ñaꞌa ña kuvi tiin ndo, ta kuu ña na käxi ndo ndia ndia ka ñaꞌa ña kuvi kaxi ndo, xiꞌin ta kuu ña na kuyächin ndo nuu ñaꞌa, ña kuvi kuyachin ndo nuu? 22 Saa chi takundiꞌi ndiayu ña kachi saa, ra süvi vi ndiayu Ndioxi kuvi ña, chi chiñu ña xaꞌndia na yuuvi yoꞌo va kuvi ña; ra nuu ñaꞌa ña ndiꞌi xaꞌa va kuvi ña xaꞌndia chiñu ña. 23 Ra chiñu kan, ra ta iyoo ña vaꞌa, iyoo va ña, saa chi ^taxi ña xini yuvi ña na chikaa ni na ndiee ña sa na chiñu vaꞌa ña kaꞌan ña xaꞌa, ra ta xa saxinu na chiñu ña kaꞌan ña, ra vaꞌa ni va iyoo na nuu mii na tuvi na. Ra kaꞌan tu chiñu kan ña na sandoꞌo na iki kuñu va na. Ndi su chiñu kan, ra köo mii yaꞌvi ndiaa vi ña, saa chi küvi vi taxi ña ndiee na ña na sä ka na chiñu kiꞌvi ña kotoo ni kuñu na sa ña.