Balʉa gba Polo
pɨ omabhuka na gʉdhʉ na
Efeso
Eli na kalanʉ
Balʉa ɨnde lɨ Polo aye e pɨ omabhuka na Efeso-o, ngatsia ngaɨza kalanʉ engʉ́ ɨnde pɨndjɨ mabhundja gba Ebhe, ngʉbula napo bhʉ́la ndʉ oehe hana ɨnde anɨ abho e, ohe ɨnde na abhʉ́lá ne bhe na pɨ́la doto bhʉ́ dabɨlɨ bini ne Kilisito maka ndjɨndjɨ-o (1:10). Anɨ ngaꞌɨ okpála gba Ebhe me u dʉ akobho lɨ lele mabhundja na ngbéngbé bhomʉ ɨnde pɨ ndʉ okpála hana bhʉ́ nakpɵtsɵ lɨo ne Kilisito.
Bhʉ́ balʉa ɨnde ane okulu oehe bhelé ɨnde ngasuno me, okpála gba Ebhe ngadʉ bini bhʉ́ makpɵtsɵ bhʉ́ dabɨlɨ bini ne Kilisito: Piga gba Ebhe maka kʉte kpála ɨnde lɨ Kilisito nde ne ’ndjɨ e. A di maka etɨ ɨnde lɨ Kilisito nde ne nepanda na e-o. A la matá di maka ɵlɵ ɨnde lɨ Kilisito nde maka ko e-o. Bhʉ́ nagama ongʉ́ gba Polo pɨndjɨ mabhundja na bádha bhʉ́ ’bu gba Ebhe ɨnde bhʉ́ Kilisito-o, a ne oeli bhende ngatʉ kpála, a la di ne oeli ɨnde ngaꞌe bua kpála abhʉ́lá má gba! Ndʉ ’ngʉ́ bhomʉ-o hana ngau lɨe lɨ zɨ ’kpɨ́ na mʉkʉnda gba Kilisito, bhʉ́ makiso, bhʉ́ mambu, bhʉ́ bádha bhʉ́ ’bu, a la di-e bhʉ́ navʉlʉ lɨo.
Ongbengbe ongʉ́ ɨnde bhʉ́ bhuku ɨnde-e ngae ɨnde:
Eli na kalanʉ 1:1-2
Kilisito a la di-e Dadjua gba Ebhe 1:3 – 3:21
Mʉkobho na mbɨa bhʉ́ Kilisito 4:1 – 6:20
Eli na soso 6:21-24
1
Polo yi omabhuka na Efeso mayi
Ngama Polo, ma ne bhʉlʉ titima gba YesuKilisito , anga Ebhe akʉnda mo-o. Ma aye balʉa ɨnde-e pɨ okpála na bububu gba Ebhe ɨnde bhʉ́ gʉdhʉ na Efeso, ɨnde abhuka la di Yesu Kilisito-o. A ayo me Ebhe ’Dyɨ nɨ́, ne Ngámá gba nɨ́ Yesu Kilisito, suno bádha bhʉ́ ’bu gba o-o pɨ yi, amba u ha di guo ’ngʉ́ pɨ yi.
Ebhe atuko bisagu pɨ́ nɨ́ bhʉ́ makpɵtsɵ gba nɨ́ ne Yesu Kilisito
Nɨ́ dhɵgɵ Ebhe, ’Dyɨ Ngámá gba nɨ́ Yesu Kilisito-o! Anɨ atuko bisagu pɨ́ nɨ́ bhʉ́ nakpɵtsɵ lɨnɨ́ ne Yesu Kilisito, anga anɨ aha ndʉ bisagu hana na bhobua na abhʉ́lá-a pɨ nɨ́. Kala me Ebhe bho doto-o, anɨ abhʉ nanɨ nɨ́ bhʉtode ngʉbula me nɨ́ dʉ ne okpála gba nɨ lɨ pápá gba Kilisito, amba nɨ́ dʉ ne okpála ɨnde bubu, u tɨ da nau siti ’ngʉ́ napapa lɨ o de. Padhá de, anga anɨ akʉnda nɨ́. Kaka, nayie nanɨ bhʉtode naali-e, anɨ amene me nɨ́ kolo ongɨsɨ gba nɨ lɨ pápá gba Yesu Kilisito. A bhomʉ-o engʉ́ ɨnde anɨ amene e pɨ nɨ́ bhʉ́ bádha bhʉ́ ’bu gba e-o. Nɨ́ toko sangu gba Ebhe ngʉbula bádha ’ngʉ́ ɨnde anɨ amene e pɨ nɨ́ ne bádha bua gba e, anga anɨ akʉnda me amene lɨe mo-o bhʉ́ Ndɨlɨ gba e na mʉkʉnda-o.
Padhá de, anga bhʉ́ nakpɵtsɵ lɨnɨ́ ne Yesu-o, Ebhe agbegbe nɨ́ bhʉ́ siti ’ngʉ́ ka ngʉte anɨ. Anɨ atsia ambu lɨ siti ’ngʉ́ gba nɨ́-o. Ebhe asuno pɨ nɨ́ bhomʉ-o tɨa ɨnde bhʉ́ bádha bhʉ́ ’bu gba e, ɨnde anɨ aha e me a nde abedhe bedhe-o. Anɨ atsia aha di ndʉ ɨmbɨlangʉ hana pɨ nɨ́. Anɨ asuno engʉ́ gba e ɨnde awo lɨe mawo-o pɨ nɨ́. Engʉ́ ɨnde bhʉ́ bádha bhʉ́ ’bu gba e ɨnde anɨ apa nanɨ bhʉtode me nɨ améne e bhʉ́ Kilisito-o. 10 Engʉ́ ɨnde anɨ apa me nɨ améne e lɨ nedhɨnga anɨ aꞌo e-e, a ko nakpɵtsɵ ndʉ ’ngʉ́ hana ɨnde abhʉ́lá, ne bhende pɨ́la doto-o sa koli Ngámá bini, Kilisito.
11 Bhʉ́ nakpɵtsɵ lɨnɨ́ ne Kilisito-o, nɨ́ asia ehe ɨnde lɨ Ebhe apa nanɨ me nɨ ahá e pɨ nɨ́-o. Padhá de, anga Ebhe alo nanɨ nɨ́ kalanʉ didili naali maka anɨ akʉnda lɨe-o. La di-e, anɨ ngamene ndʉ ’ngʉ́ hana maka anɨ akʉnda nanɨ lɨe, di ne maka anɨ apa lɨe-o. 12 Kaka-a, a ayo me nɨ́ toko sangu gba Ebhe, nganɨ́ okpála ɨnde aꞌo ’to o nanɨ bhʉtode bhʉ́ Kilisito-o.
13 Ngayi di-e, lɨ yi adje ngali na kʉkʉlʉ ’ngʉ́-o lɨe, Bádha Ngali ɨnde aha mʉkobho pɨ yi-e, yi atsia abhuka Kilisito. Abhomʉ-o, Ebhe atsia atʉ kasé ɨnde ngasuno me yi ne ongɨsɨ gba nɨ-e lɨ kʉte yi, lɨ anɨ aha Bu Bhobua ɨnde anɨ apa nanɨ me nɨ ahá e pɨ yi-e lɨe-o. 14 Bu Bhobua ango-o ne ehe na kalanʉ bhʉ́ ka obabadha ’ngʉ́ ɨnde lɨ Ebhe aleke e pɨ omaha e-o. Anɨ ngapa pɨ nɨ́ me nɨ́ asía ongʉ́ ango-o masia lɨ nedhɨnga lɨ Ebhe agbégbe nɨ́ lɨe bhʉ́ siti ’ngʉ́ gba nɨ́ hana-o. Kaka-a, ayo me nɨ́ toko sangu gba Ebhe.
Polo ayo Ebhe ngʉ́ omabhuka
15 Kaka-a, mbɨa ɨnde-e, lɨ ma adje lɨe me yi abhuka Ngámá Yesu-o, di ne me yi ne mʉkʉnda pɨ ndʉ omabhuka hana-a, 16 maꞌo nagie heni pɨ Ebhe lɨ ’ngʉ́ gba yi-e de. Ma ngabhundja yi bhʉ́ omayo gba ma-o. 17 Ma ngayo ka Ebhe gba Ngámá gba nɨ́ Yesu Kilisito, ’Dyɨ nɨ́ na asasaua me anɨ ha bua na ɨmbɨlangʉ pɨ yi. Bua ango-o asúno Ebhe pɨ yi mbámbá, anɨ tsia méne di me yi mbɨla anɨ na paká paká. 18 Ma ngayo me anɨ bhulu ɨmbɨlangʉ gba yi ngʉ́ nambɨla obabadha ’ngʉ́ ɨnde anɨ apa me nɨ ahá e pɨ okpála bhende anɨ aꞌɨ o-o. Ma la di ngakʉnda me yi mbɨla tɨa di ne sangu ɨnde bhʉ́ obabadha ’ngʉ́ ɨnde anɨ aleke e pɨ okpála gba e-o.
19 Kaka-a, yi ambɨ́la angu na kuo kuo ɨnde anɨ nde ne e pɨ nɨ́ omabhuka-o. Angu ango-o, a ko bhende lɨ Ebhe asuno e na paká paká, 20 nedhɨnga lɨ anɨ azuku Yesu Kilisito lɨe, anɨ atsia aꞌo anɨ lɨ pá ’kpa e na kokpa abhʉ́lá-o. 21 Oo, anɨ aꞌo Kilisito pɨ́ ’ndjɨ ndʉ obua hana, pɨ́ ’ndjɨ ndʉ obua hana na angu, pɨ́ ’ndjɨ ndʉ obua hana na kpekpeke ne pɨ́ ’ndjɨ ndʉ oꞌɨlɨ hana ɨnde u tɨ da naꞌɨ e bha bini nakɨ de, engʉ́ bini, ɨnde u tɨ da di naꞌɨ e bhʉ́ oekpɨ́ ɨnde ngago ko. 22 Ebhe aꞌo ndʉ ’he hana sa ’dhʉ Kilisito. Anɨ atsia aꞌo anɨ Ngámá pɨ́ ’ndjɨ ndʉ ’he hana di ne pɨ́ ’ndjɨ Dadjua gba e-o. 23 Piga gba Ebhe-e, a ko kʉte Yesu Kilisito. Angu gba anɨ-e ngadʉ bhʉ́ Dadjua ango-o, ngaanɨ-e, anɨ ne ndʉ bɨlɨ hana.