8
Yesu ne ’ngbé dimandɵ gba nɨ́-e ngae
1 Engʉ́ na ngbéngbé bhʉ́ ká ongʉ́ ɨnde nɨ́ ngapa e ngae ɨnde: a bhomʉ-o ngua ’ngbé dimandɵ gba Ebhe ɨnde ka nɨ́-o. Anɨ adʉ abhʉ́lá lɨ pápá na kokpa de kiti na ngámá gba Ebhe na angu na ngbéngbé-o. 2 Anɨ ngamene kulu na ’ngbé dimandɵ gba e bhʉ́ tɨna ’tɨ na bubu, a akʉnda napa me bhʉ́ ’tɨ ngbangbalɨ na kʉkʉlʉ. Ayiki ne Ngámá, ayiki ne kpála-kʉtɨ de.
3 U bhʉbhʉ ongbengbe odimandɵ gba Ebhe-e hana ngʉbula natsulu enʉ maka makiso pɨ Ebhe. Kaka-a, a ayo me adʉ di ka ’ngbé dimandɵ gba nɨ́-e ne ehe natsutsulu maka makiso pɨ Ebhe. 4 Ɨ dʉ́ nanɨ me anɨ dʉ́ pɨ́la doto-o, anɨ de ne dimandɵ gba Ebhe-e ade. Padhá de, anga a ne odimandɵ gba Ebhe koko ɨnde ngatsulu ehe maka makiso pɨ Ebhe maka lɨ lɨ́lɨ gba omaYuda apa lɨe-o. 5 Kulu ɨnde lɨ odimandɵ ango-o ngamene e-e, a ko lele kulu ongʉ́ ɨnde ngamene lɨe abhʉ́lá-o. Engʉ́ ango-o viti bini ne ehe ɨnde lɨ Ebhe apana nanɨ e pɨ Moidje-o . Lɨ Moidje adʉ akʉnda nayiki ’tɨ ngbangbalɨ lɨe, Ebhe apa pɨ anɨ me: «Tsia ndjɨndjɨ ngʉbula me mʉ mene ndʉ ’ngʉ́ hana lɨ lele bhende ma asuno e pɨ mʉ apɨ́ ’ta-o.†8:5 Tsia bhʉ́ Ekɨ. 25:40.»
6 Engʉ́ bini, mbɨa ɨnde-e, Yesu asia kulu ɨnde kpi, ane bhende gba odimandɵ koko gba Ebhe-e mane. A ko lʉdʉ sʉnda nɨ́ ne Ebhe bhʉ́ gandja na babadha naali. Gandja ango-o alʉ di pɨ́ oehe na babadha naali ɨnde nɨ́ ngaꞌo ’to nɨ́ ’to e-o.
Ebhe apa me nɨ akódho gandja na mbɨa ne okpála gba nɨ
7 Ɨ dʉ́ nanɨ me gandja na kalanʉ-o mene me okpála kolo ngbingbili kala Ebhe-e, u de yipa ne koko de. 8 Engʉ́ bini, lɨ Ebhe au lɨe me gandja na kalanʉ-o dʉ ndjɨndjɨ hana de-e, anɨ atsia ambembe bhʉ́ ’ndjɨ okpála gba e me:
«Ngámá apa me: oekpɨ́ akólo makolo,
lɨ ’kpɨ́ ma akódho gandja na mbɨa lɨe
bhʉ́ dabɨlɨ bini ne piga gba Ɨsalaele di ne bhende gba Yuda-o.
9 A adʉ́ maka bhende ma akodho nanɨ e ne onguo ogbi uo-o de,
lɨ ’kpɨ́ ɨnde ma agbe uo lɨe bhʉ́ doto na Edjipito-o.
Bhʉ́ gandja ya akodho e ne uo-o, u kpata lɨ́lɨ ango-o de.
Kaka-a, ma adji ’ngbʉ ma lɨ uo, Ngámá apa mo-o.
10 Ngámá atsia apa matá me:
a bhomʉ-o gandja ɨnde ma akódho e ne ongɨsɨ na Ɨsalaele pɨta oekpɨ́ bhomʉ-o.
Ma ató olɨ́lɨ gba ma-a bhʉ́ ɨmbɨlangʉ gba uo-o.
Ma ayé olɨ́lɨ ango-o lɨ bua uo.
Ma adʉ́ ne Ebhe gba uo, u tsia dʉ́ okpála gba ma.
11 Kpála bini bhʉ́ ká uo dʉ́ matá ne gʉmʉ nasuno ’ngʉ́ pɨ ndɨlɨ na kʉtɨ gba e,
di ne pɨ ndai e de me anɨ mbɨla ma-a de-e de.
Padhá de, anga ndʉ okpála hana ambɨ́la ma,
nayie lɨ okpála na padhá nakolo makolo lɨ okpála na kʉkʉlʉ.
12 Ma ambú lɨ ndanda ’ngʉ́ gba uo-o.
Ma abhúndja matá osisiti ’ngʉ́ gba uo-o de.†8:8-12 Tsia bhʉ́ Djlm. 31:31-34.»
13 Lɨ nedhɨnga lɨ Ebhe ngagama ’ngʉ́ lɨe pɨndjɨ gandja na mbɨa-a, anɨ aꞌo bhe na kalanʉ-o me akolo didili. A na paká me, lɨ ehe de akolo didili akolo-o, ɨ dʉ la di me a nde akadha-a, ehe ango-o masɨkpe de nangɨta.