1 Ekpɨ́ koko, Yesu alɨ matá bhʉ́ ’tɨ nadje lɨ́lɨ gba Moidje-o . Bhʉ́ ’tɨ oo, kpála bini ɨnde lɨ ’kpa e andɨa adʉ oo. 2 OmʉFalisai adʉ akʉnda naꞌo ’ngʉ́ pɨ́ Yesu. Kaka-a, u aholo atsia anɨ ne kpéke djila, atɨgala anɨ kóbho kpála ɨnde adʉ me ’kpa e nde andɨa-a lɨ ’kpɨ́ naguo . 3 Abhomʉ-o, Yesu atsia apa pɨ kpála ango-o me: «Yie bhʉ́lá, amba mʉ lʉ sɨ bhʉ́ ká djila ndʉ okpála hana.» 4 Pɨpɨta-a, Yesu atsia ayi okpála ɨnde adʉ oo me: «Lɨ ’kpɨ́ naguo gba omaYuda-a, lɨ́lɨ gba nɨ́-e azɨba bhedho: U mene bádha ’ngʉ́ ne me u mene siti ’ngʉ́? U kobho kpála ne me u bhɵlɵ kpála?» Engʉ́ bini, u tsia dʉ ne engʉ́ na gigie de! 5 Anɨ aholo atsia ndʉ uo hana bini ne bini na gʉ́gʉ́. Bua anɨ ake, ka kpéke ’ndjɨ gba uo-o. Abhomʉ-o, anɨ atsia apa pɨ kpála lɨ ’kpa e andɨa me: «Gbele ’kpa mʉ.» Kpála ango-o agbele ’kpa e, ’kpa anɨ atsia akolo matá ndjɨndjɨ. 6 Lɨ omʉFalisai aze lɨe oo, u atsia apo kolo bhʉ́la o ne omaha Elode .*3:6 Okpála gba Elode: A ko okpála ɨnde adʉ́ bhʉ́ dabɨlɨ bini ne Elode. Tsia bhʉ́ Mat 22:16. U atsia adje lɨo me ogɨlɨ kpadjɨ nabhɵlɵ Yesu.

7 Pɨpɨta-a, Yesu ne omʉkpata gba e agbida lɨngo ekpɵ na Galilaya. Kambɨ okpála atsia akpata anɨ. Okpála ango-o ayie nanɨ bhʉ́ ndu doto na Galilaya ne Yudaya, 8 bhʉ́ gʉdhʉ na Yelusalema, bhʉ́ ndu doto na Idumé, bhʉ́ ndu doto ɨnde ayi ’ngu na Djʉlʉdanɨ, bhʉ́ odoto na Tile ne Sidona. Kambɨ okpála ango-o adje nanɨ ngali na ongʉ́ lɨ Yesu adʉ amene e lɨe, u atsia ago abhaka anɨ. 9 Yesu atsia aha lɨ́lɨ pɨ omʉkpata gba e me u ꞌo zabʉ pɨ nɨ bini masɨkpe, amba ɨ dʉ me okpála bhomʉ-o nde asʉlʉ nɨ má wakaka-a, nɨ de ꞌʉ bhʉ́bhʉ́. 10 Padhá de, anga anɨ akobho nanɨ okpála bhelé. Kaka-a, okpála na kuo adʉ agbene lɨo me o bu ’kpa o lɨ anɨ amba o kobho. 11 Lɨ okpála ɨnde lɨ osisiti bua adʉ ato mbolo lɨ o adʉ au anɨ lɨe, u adʉ ago atuko ne ꞌue bhʉ́ li ’dhʉ anɨ me: «Mʉ ne Ndɨlɨ gba Ebhe.» 12 Engʉ́ bini, Yesu adʉ apa pɨ uo na gʉ́gʉ́ me u ambámba ta nɨ pɨ okpála koko de.

13 Pɨpɨta-a, Yesu aꞌʉ apɨ́ ’ta. Anɨ atsia aꞌɨ obhende anɨ adʉ akʉnda o-o. U atsia ago abhaka anɨ. 14 Abhomʉ-o, bhʉ́ ká okpála ango-o, anɨ alo okpála ndjɨkpa ne ká bhisi. Anɨ agisila ’lɨ uo me obhʉlʉ titima . Anɨ aꞌo uo ngʉbula me nɨ dʉ adʉ́ ne uo bhʉ́ dabɨlɨ bini, la di ngʉbula me nɨ tima uo ngʉ́ nakpokpo Ngali gba Ebhe-o. 15 Anɨ aha di pɨ uo angu ngʉ́ napandja osisiti bua bhʉ́ okpála. 16 A ɨnde-e obhe ndjɨkpa ne ká bhisi ɨnde anɨ alo nanɨ o-o: Simo (ɨnde lɨ Yesu agisila nanɨ ’lɨ e me «Piele»), 17 Djakɨ ne ndai e Djaa (ongɨsɨ gba Djebedayo ɨnde lɨ Yesu aha nanɨ ꞌɨlɨ koko pɨ o me «Boaneledjesɨ», a akʉnda napa me «ongɨsɨ gba mʉgbálá»), 18 a la di-e, Andɨlɨ, Filipo, Batelemi, Matié, Tʉma, Djakɨ (ndala Alafayo), Tade, Simo (kpála nakʉnda doto gba e naali), 19 di ne Yuda Ɨsɨkaliote, kpála ɨnde apʉ́ Yesu-o.

20 Abhomʉ-o, Yesu agie matá lɨe lɨ bɨlɨ anɨ adʉ nadʉ lɨ e-o, bhiti okpála atsia ago apo matá bhʉ́la o de anɨ. Kaka-a, Yesu ne omʉkpata gba e sia belegʉ nedhɨnga ngʉ́ nazʉ ’he de. 21 Lɨ okpála na piga gba anɨ adje ngali ango-o lɨe, u akɵ kpadjɨ ngʉ́ nanʉ aholo anɨ. Padhá de, anga u adʉ apa me: «Yesu akolo bhʉlʉ pele!»

22 Abhomʉ-o, omʉsuno na lɨ́lɨ gba Moidje ɨnde ayie nanɨ bhʉ́ Yelusalema adʉ apa me: «A bhʉ́ kpála bhomʉ-o ne Beledjebula!» U adʉ di apa matá me: «A ngaha angu nato holo bhʉ́ ’dhʉ osisiti bua pɨ anɨ ne ngámá gba osisiti bua.» 23 Abhomʉ-o, Yesu atsia aꞌɨ omʉsuno bhomʉ-o. Anɨ atsia apa pɨ uo bhʉ́ gbitaku me: «Lele pɨ Satana tɨ da nato holo lɨe bhʉ́ ’dhʉ Satana-a? 24 Ɨ dʉ me okpála gba ngámá bini nde ngagʉ gbele sʉnda o, kʉtɨ ango-o lʉ́-ʉ de. 25 Ɨ dʉ me okpála na piga bini nde ngagʉ gbele sʉnda o, piga ango-o lʉ́-ʉ de. 26 Ɨ dʉ me Satana nde ngagʉ lɨe ngae makpe, naʉ gba anɨ-e gbógbo bhʉsʉ e. Anɨ tɨ da nabhue de, lɨ ’ngʉ́ gba anɨ-e ndjía.

27 Kpála tɨ da nalɨ bhʉ́ ’tɨ gba kpéke bhoko bini de, anɨ tsia bhá ndʉ ’he gba anɨ-e me anɨ nde gbigbite ngaɨza kpéke bhoko bhomʉ-o kalanʉ de-e de. Engʉ́ bini, anɨ de agbigbite anɨ agbigbite-e, anɨ tsia bhá ndʉ ’he gba anɨ-o. 28 Ma apa pɨ yi na paká me, u tɨ́ da nambu lɨ osisiti ’ngʉ́ gba okpála di ne osobho ɨnde u ngasobho Ebhe ne e hana. 29 Engʉ́ la bini, lɨ kpála sobho Bu Bhobua-a , Ebhe ꞌé siti ’ngʉ́ gba kpála ango-o de. Padhá de, anga anɨ amene bhomʉ-o siti ’ngʉ́ na dʉdʉma. 30 Yesu adʉ apa nanɨ pɨ uo mo-o, anga u adʉ apa me: ‹A bhʉ́ anɨ ne siti bua.›»

31 Pɨpɨta-a, ’hi Yesu ne ondaise anɨ akolo lɨ bɨlɨ anɨ adʉ asuno lɨ e-o. U alʉlʉ akilidjo, u atsia atima kpála bini ngʉ́ naꞌɨ anɨ. 32 Kambɨ okpála adʉlʉ nanɨ de anɨ. U atsia apa pɨ anɨ me: «Tsia nga, ’hi mʉ di ne ondaise mʉ alʉlʉ akilidjo, u ngagɨlɨ mʉ.» 33 Anɨ atsia gie pɨ uo me: «’Hi ma ne ondaise ma ngao dho?» 34 Abhomʉ-o, anɨ atsia bhiti okpála asa dengo anɨ ngbalina-o. Anɨ atsia apa me: «Yi tsitsia nga, ’hi ma ne ondaise ma ngao ɨnde! 35 Ndʉ kpála hana ɨnde ngamene engʉ́ lɨ Ebhe akʉnda e, kpála ango-o, a ko ndai ma na bhobhoko, a ko ndai ma na ɵɵlɵ, a ko la di ’hi ma.»