4
Abhʉ́lá-a, ndʉ okpála hana ngadhɵgɵ Ebhe
1 Pɨpɨta-a, ma au engʉ́ koko bhʉ́ ’he maka loto. Ma au bhotɨ ɨnde adʉ baba abhʉ́lá.
Eli ma adje ɨgɨnɨ e kalanʉ mʉgɨto me u ngaꞌu totɨ-e, apa mʉma me: «ꞌɄ ei, amba ma suno engʉ́ ɨnde ngago sidi-e pɨ mʉ.»
2 Kolo me-e, Bu Bhobua abedhe ma. Abhʉ́lá oo, kiti bini na ngámá adʉ oo, kpála bini atsia adʉ pépé. 3 Zɨ kpála ango-o adʉ nasʉ maka oteme*4:3 Oteme: Bhʉ́ eli na giliki-e, u aye limbi oteme bata: djasepe, saladʉane ne emelode. na zɨzɨ. Makɨlɨma asa dengo kiti na ngámá ɨnde anɨ adʉ pɨ́ e ne zɨ e ngbalina. Zɨzɨ adʉ di maka zɨ teme na zɨzɨ. 4 Okiti na ngámá ndjɨkpa bhisi ne ká badha asa dengo kiti na ngámá ango-o ngbalina. Obhelesɨ okpála ndjɨkpa bhisi ne ká badha atsia adʉlʉ pépé. U adyɨdyɨ obubu bongo , u atsia adyɨdyɨ ondata na ngámá ɨnde u amene e lɨ olo-o bhʉ́ ’ndjɨ o. 5 Lɨ bɨlɨ lɨ kiti ango-o adʉ lɨe, ekpɨ́ adʉ andjendjengene, mʉgbálá adʉ asʉsʉla. Oꞌi ’ke mananɨka ɨnde adʉ atsi matsi adʉ kala kiti ango-o. Oꞌi ’ke ango-o, a ko obua mananɨka gba Ebhe-o. 6 Kala kiti ango-o, ma au ’he bini maka ’ngbé ’ngu ɨnde lɨ pɨ́la e adʉ nasʉ má ngɨngɨngɨ maka bitolobi. A adʉ má ngɨlɨlɨ maka teme†4:6 Teme: Bhʉ́ eli na giliki-e, u aye me «Teme na kilisitale.» na zɨzɨ.
Lɨngo kiti na ngámá ango-o, okpála badha na ngangamba‡4:6 Okpála badha na ngangamba: Lɨ bɨlɨ ɨnde-e, u mbɨla de me ne me a ko okpála-kʉtɨ, ne me a ko oandjelu-o de. adʉ oo. (A akʉnda napa me sʉnda kiti na ngámá di ne bɨlɨ lɨ obhelesɨ okpála ndjɨkpa bhisi ne ká badha adʉ lɨe-o.) Djidjila abedhe lɨ bhʉ́la uo di ne lɨ ’ngbʉ uo bedhe. 7 Kpála bhe na bini-e, adʉ maka kingbi. Bhende na bhisi-e, adʉ maka folo bagala na bhobhoko. Bhende na bata-a, bhʉ́la anɨ adʉ maka kpála-kʉtɨ. Bhende na badha-a atsia adʉ maka ndua ɨnde bhʉ́ holo. 8 Ndʉ uo badha hana, u adʉ ne mbumbudha madhɨa madhɨa. Djidjila atsia abedhe tété bedhe bedhe, alɨ ngbʉngbʉ di ne asabusabu. U ngali ’tsi sukpe ne ngbɨkpɨ mandɨ naguo me:
«Ebhe Ngámá Apɨ́ ’Kpɨ́, Bubu, anɨ Bubu, anɨ Bubu.
A ko Kpála ɨnde adʉ nanɨ ʉʉ, ɨnde ʉʉ, ɨnde di ngago!»
9 Ndʉ nedhɨnga hana lɨ okpála badha bhomʉ-o ngali ’tsi ngʉ́ nadhɵgɵ kpála ɨnde adʉ pɨ́ kiti na ngámá, kpála ɨnde la di bhʉ́ mʉkobho dʉdʉma ne dʉdʉma, u ngaha sangu di ne nagie heni pɨ e lɨe, 10 obhelesɨ okpála ndjɨkpa bhisi ne ká badha-a ngatʉtʉ lɨpʉkʉ o kuto kala kpála ango-o. U ngadhɵgɵ kpála ɨnde bhʉ́ mʉkobho dʉdʉma ne dʉdʉma-o. U ngapandja ndata na ngámá gba o-o, u ngabubu kala kiti na ngámá-a ne napa me:
11 «Ebhe Ngámá gba ya, mo otɨ ne napa me okpála toko mʉ, u dhɵgɵ mʉ,
amba mʉ sia sangu kabula ngámá gba mʉ-o.
Padhá de, anga mo obho ndʉ ’he hana ngamʉ.
A atsia amene lɨe,
anga mo okʉnda nanɨ me a amene lɨe moko.»