18
Natɨ ka gʉdhʉ na Babilona
1 Pɨpɨta-a, ma au andjelu koko ayie abhʉ́lá ngakɵ kuto. A adʉ bhʉ́ anɨ ne angu na ngbéngbé. Abhomʉ-o zɨ anɨ abha doto libhomu. 2 Anɨ asʉla kpekpeke me:
«’Ngbé Babilona atɨ-e ngae! ’Ngbé Babilona atɨ-e ngae!
A akolo ɨbili bɨlɨ lɨ odjabʉlʉ ngadʉlʉ lɨ e,
bɨlɨ ɨnde lɨ ndʉ osisiti bua hana ngadʉlʉ lɨ e.
A bhomʉ-o bɨlɨ lɨ odhu ne onʉ ɨnde kala Ebhe sisiti-e ngadʉlʉ lɨ e-o.
3 Padhá de, anga ndʉ okpála na doto hana andjɨ siti zabhe gba anɨ-e
maka okpála andjɨndjɨ vino lɨe-o.
Ongbengbe ongámásɨ na doto amene zabhe ne anɨ,
obhʉlʉ natsɨndjɨ ’he na pɨ́la doto atsia akpo di lɨ angu na bhiti tɨa gba anɨ-o.»
4 Pɨpɨta-a, ma adje eli koko ayie abhʉ́lá. A adʉ apa me:
«Ngayi okpála gba ma-a, yi ze bhʉ́ Babilona zeze,
amba yi améne siti ’ngʉ́ bhʉ́ dabɨlɨ bini ne anɨ de,
ngʉ́ napa me yi asía olɨkabhu ɨnde abháka anɨ-e bhʉ́ dabɨlɨ bini ne anɨ de.
5 Padhá de, anga osisiti ’ngʉ́ gba anɨ-e apo ’ta e akolo makolo abhʉ́lá.
Ebhe atsia abhundja osisiti ’ngʉ́ gba anɨ-o.
6 Yi mene anɨ maka anɨ amene okpála koko lɨe-o.
Yi gie siti ’ngʉ́ anɨ amene e pɨ anɨ bhʉtsibhʉtsi bhisi.
Yi ha pandɨ ɨnde ane bhe gba anɨ-e ne kpéke bhʉtsibhʉtsi bhisi-e pɨ anɨ
bhʉ́ kópo ɨnde anɨ adʉ aꞌo pandɨ gba e bhʉ́ ’bhɵ okpála ne e ko.
7 Anɨ adʉ akpi ndjɨlɨ naali bhʉ́ asasaua na tɨa gba e-o.
Kaka-a, yi gie di lɨkabhu ne mʉlopolo pɨ anɨ lɨ lelele.
Padhá de, anga anɨ ngapa lɨ bua e me:
‹Ma adʉ pɨ́ kiti na ɵlɵ gba ngámá, ma ne ɵkɵ ade,
ma adʉ́ galikpe bhʉ́ talia de.›
8 Kaka-a, ndʉ okpekpeke da ’ngʉ́ ɨnde aꞌo lɨe pɨ anɨ-e agó galikpe atɨ́ pɨ́ anɨ
lɨ koli ’kpɨ́ bini ndʉndʉ hana.
Okpekpeke da ’ngʉ́ ango-o ngae ɨnde: nakpi ka okpála, talia di ne gʉmʉ,
lɨ djua tsia tsúlu di anɨ hana má kpɵkɵbhɵ!
Padhá de, anga Ngámá Ebhe ɨnde akodho ’ngʉ́ gba anɨ-e, ne kpála na angu.»
9 Abhomʉ-o, ongbengbe ongámásɨ na doto ɨnde-e amene zabhe bhʉ́ dabɨlɨ bini ne anɨ. U akpi ndjɨlɨ ne anɨ lɨ bhiti tɨa gba anɨ-o. Lɨ u aú ngúwa djua atsúlu anɨ-e lɨe, u kú ’gbá, u tsia lópolo di lɨo ngʉ́ anɨ. 10 U alʉ́lʉ de anɨ tsutsu ka nakpe lɨkabhu ɨnde abhaka anɨ-o. U tsia pá me:
«A ko lɨkabhu na ngbéngbé pɨ mʉ, Babilona!
Mʉ ne ’ngbé gʉdhʉ, mʉ la di ne angu.
La-a, Ebhe akodho ’ngʉ́ gba mʉ-o bha bhʉ́ saa bini padhá!»
11 Obhʉlʉ natsɨndjɨ ’he di ngaku ’gbá, uo di bhʉ́ talia lɨ ’ngʉ́ gba anɨ-o. Padhá de, anga kpála bini ngakala matá ehe gba uo-o ade. 12 Abana ɨ dʉ di-e olo, ne oaladja, ne oteme na mase ne omayaka, kpála bini ngakakala ade. Abana ɨ dʉ obongo na kpéke mase, ne ombembe obongo na zɨzɨ, ne obongo ɨnde u abho e lɨ dele gba okɵkɵ́, kpála bini ngakakala ade. Abana ɨ dʉ ndʉ djua ondula na babadha sese hana, abana ɨ dʉ ndʉ djua oehe ɨnde u abho e lɨ ’te ’ya hana di ne obhe u abho e lɨ ondula na mase hana, ne obhe u abho e lɨ teme, kpála bini ngakakala ade. Abana ɨ dʉ di-e ndʉ djua kalase hana, kpála bini ngakakala ade. 13 Abana ɨ dʉ oehe ne okpálá koko ɨnde u aleleke se bɨlɨ abhʉ́ ’tɨ ne e, ne mila di ne omʉngotsi koko, ne bandele, kpála bini ngakakala ade. Abana ɨ dʉ pandɨ, ne emʉ, ne fufú, kpála bini ngakakala ade. Abana ɨ dʉ obagala, ne okandɵlɵ, ne opunda, ne okpulukpulu, kpála bini ngakakala ade. Abana ɨ dʉ ’lá kpála-kʉtɨ, kpála bini ngakala sʉsʉka ade.
14 Obhʉlʉ natsɨndjɨ ’he bhomʉ-o apa pɨ gʉdhʉ bhomʉ-o me:
«Ndʉ oehe ɨnde mo okʉkʉnda e hana andjia gba mʉ andjia!
Ndʉ otɨa gba mʉ di ne obabadha ’he gba mʉ-o
andjia ka mʉ andjia,
u ú matá gba mʉ belegʉ de bini!»
15 Obhʉlʉ natsɨndjɨ ’he ɨnde akpo lɨ tɨa na gʉdhʉ ango-o alʉ́lʉ de anɨ tsutsu ka nakpe lɨkabhu ɨnde abhaka anɨ-o. U adʉ́ aku ’gba, u tsia lópolo di lɨo ngʉ́ anɨ. 16 U adʉ́ apa me:
«A ko lɨkabhu na ngbéngbé pɨ yi,
okpála na ’ngbé gʉdhʉ-o!
Yi adyɨ lɨ kʉte yi babadha bongo ɨnde na kpéke mase.
Yi atsia adyɨ di lɨ yi obongo na mase naali ɨnde na mbembe má ngua,
ɨnde lɨ e ne zɨzɨ.
Yi adyɨ di omagege na olo bhʉ́ dabɨlɨ bini ne oteme na kpéke mase di ne omayaka.
17 Ndʉ ’he bhomʉ-o hana angɨ́ta bha lɨ saa bini má kpɨkɨlɨ!»
Abhomʉ-o, ndʉ obhʉlʉ nadjele zabʉ hana, bhʉ́ dabɨlɨ bini ne okpála ɨnde u abɨ o, okpála nadhʉkʉ pɨ́ ’ngbé ’ngu bhʉ́ dabɨlɨ bini ne obhʉlʉ nagɨlɨ tɨa pɨ́ ’ngbé ’ngu-o alʉlʉ mbo tsutsu. 18 U atsia adʉ asʉsʉla ka nau ngúwa adʉ aze ka natsi ka gʉdhʉ-o me: «A akpo ’ndjɨ e lɨ ’ngbé gʉdhʉ ɨnde-e ne bhedho?» 19 U adʉ aba embɨ bhʉ́ ’ndjɨ o, u adʉ aku ’gbá, u atsia adʉ alopolo lɨo me:
«A ko lɨkabhu na ngbéngbé pɨ yi, okpála na ’ngbé gʉdhʉ-o!
Bhiti tɨa gba yi-e ngae ɨnde lɨ okpála ɨnde ngamene kulu pɨ́ ’ngbé ’ngu-o
akpo ka e ko.
La-a, ndʉ ’he bhomʉ-o hana andjia bha lɨ saa bini má kpɨkɨlɨ!»
20 Ngayi okpála ɨnde abhʉ́lá-a, yi kpi ndjɨlɨ lɨ nakpi ka gʉdhʉ ango-o!
Ngayi omaha Ebhe, ne yi obhʉlʉ titima gba Ebhe, di ne yi opolofeta , yi kpi ndjɨlɨ!
Padhá de, anga Ebhe akodho ’ngʉ́ gba anɨ-e ka siti ’ngʉ́ ɨnde anɨ amene e lɨ yi ko!
21 Abhomʉ-o, andjelu bini na angu aha teme bini maka ’ngbé teme nadyɨ ngano, anɨ atsia atʉmba bhʉ́ ’ngbé ’ngu ne napa me:
«U atʉ́mba bhadi ngbé gʉdhʉ na Babilona ne kpéke me,
kpála bini ú matá galikpe anɨ de.
22 Obhʉlʉ nabhɨ dʉmʉ bhɨ́ matá galikpe agba mʉ de.
Obhʉlʉ naꞌu totɨ ꞌú matá galikpe agba mʉ de.
Obhʉlʉ nali ’tsi lí matá galikpe agba mʉ de.
Obhʉlʉ ɨkalana dʉ́ matá di agba mʉ de.
Okpála dyɨ́ di matá ngano agba mʉ de.
23 Zɨ tala dʉ́ matá di agba mʉ de.
U djé matá di ’li okpála ɨnde aha lɨo agba mʉ de.
Padhá de, anga obhʉlʉ natsɨndjɨ ’he ɨnde adʉ bhʉ́ gʉdhʉ gba yi-e,
adʉ ongbengbe kpála na doto.
Obhʉlʉ kobha gba yi-e apite ndʉ okpála hana.
24 Okpála na Babilona abhili opolofeta,
ne okpála gba Ebhe di ne ndʉ okpála hana ɨnde u abhili o pɨ́la doto-o.»