2 Pyɛɛri
Pyɛɛri ya sɛmɛ shuun wo wemu ka ge
Jɔgɔ mu we sɛmɛ we dʼa tun wɛ?
Li wa kanna egilizi nigin wa mu Pyɛɛri ya we sɛmɛ we ka na tun wɛ, ga Kiricɛɛn pu bɛɛri mu wʼa wu tun (2 Pyɛɛri 1:1). Wʼa li shɛ na wee wo caŋa ɲii lʼa nɔ li taxɔgɔ ni (2 Pyɛɛri 1:12-14).
We sɛmɛ we kakana ɲuŋɔ
Pyɛɛri ya bi karamɔgɔlɔɔ kafinɛjuu pu wo kalaakuumɔ wu kaa logo, wemu pʼa bi gaan nʼa daa fɛɛ pu mu ge, lee wuu na wʼa we sɛmɛ we ka wu guri nʼa daa fɛɛ pu funyɔ to can wa shizhaa na, wʼa bi pu kalaa xɔ wemu ni ge. Lee yɛrɛ le ninumɔ Zhude bɛ ya pye (Zhude 5-16).
Sɛmɛ wu kafila ɲugbɔyɔ
2 Pyɛɛri 1 Kalaa wemu yʼa ta ge, yi pye ɲɔmɛhɛɛ fɛɛ wee kalaa wu shizhaa na.
2 Pyɛɛri 2 Funduuro temu wʼa pye karamɔgɔlɔɔ kafinɛjuu pu shizhaa na ge.
2 Pyɛɛri 3 Kirisa na guri ba nakaara baa.
1
Pyɛɛri fò mujuu
1 Nɛ Simɔ Pyɛɛri we wu ɲɛ Yesu Kirisa wo kapyebye, ni wu tudunmɔ ge, nɛ wʼa we sɛmɛ we tun yee mu, yee piimu pʼa see see nʼa daa wu ta ni wèe ni, wù Kilɛ ni wù Shɔvɔɔ Yesu Kirisa wo dii wu funŋɔ ni ge. 2 Kilɛ wu niimɛ ni ɲaɲiŋɛ kan ɲɛhɛ yi mu Kilɛ ni wù Kafɔɔ Yesu wo jɛ wu funŋɔ ni.
Kilɛ wʼa wù yiri na wù pa jé wu Ja wu saanra ti ni
3 Keree kiimu bɛɛri kʼa yaa ni wù ni wù ɲiifɛɛrɛ ti funŋɔ ni, wù bye Kilɛ ɲìi fyaara sipyii ge, Kilɛ ya kee bɛɛri kan wù mu wu sefɛɛrɛ ti funŋɔ ni. Wemu wʼa wèe yiri, na pa binnɛ ni wu ni wuyɛ pyaa wo nɔɔrɔ we ni wu saama pu na ge, wʼa wèe pye wèe ya weefɔɔ cɛ. 4 Tee sefɛɛrɛ te funŋɔ ni, Kilɛ ya ɲɔmɛhɛɛ lɔ wèe mu kiimu ya ɲɔ fo xuuni ge. Lee na, ɲɔmɛhɛɛ kiimu wʼa lɔ yee mu ge, yi bu kee ta yi na já voro ke koŋɔ ke ni, lakuuŋɔ ya kemu fɔnhɔ ge, na já pye ni zɔ nigin ni ni Kilɛ yɛ pyaa ni.
5 Lee wuu na yi la le yiyɛ ni xuuni, yʼi saama fara yi nʼa daa wu na, yʼi Kilɛ wo macɛŋɛ ki fara pee saama pu na. 6 Na já mayɛ na, yʼi lee fara Kilɛ wo macɛŋɛ ki na, yʼi lowaa fara na já mayɛ na wu na, yʼi Kilɛ ɲìi fyaara fara lowaa li na. 7 Na pye ɲire ni ni nʼa daa fɛɛ pu ni, yʼi lee fara Kilɛ ɲìi fyaara ti na. Yʼi taanɲɛɛgɛ fara nʼa daa fɛɛ pu wo ɲire ti na. 8 Kii keree kii bu da yi ni, na yi yaa xuuni, yi da bye saa fɛɛ ni kuduun baa fɛɛ wù Kafɔɔ Yesu Kirisa wo jɛ wu ni wɛ. 9 Ga kii keree kii bu wemu kuuŋɔ, weefɔɔ ya ɲaa xuuni wɛ, wʼa bye ba fyɛn ɲɛ wɛ. Kilɛ ya wu jurumu wemu je laha wu na, na wu pye fɛɛfɛɛ ge, wu funŋɔ na wɔ lee na.
10 Lee wuu na ceborogo, yi ɲaha ya bulo, na yi yiri lemu na ge, yi lee pye baraga kaa. Yi ba lee pyi, yi da ga guruŋɔ di do Kilɛ koo li ni bada wɛ. 11 Lee funŋɔ ni Kilɛ da saanra ti wo kuɲɔɔ li mugi xuuni yi mu, saanra temu da ga xhɔ wɛ. Tee ɲɛ wù Kafɔɔ ni wù Shɔvɔɔ Yesu Kirisa wuuro te.
12 Lee na, nɛ funŋɔ ki wa di da yi funŋɔ tun kii keree kii na tuun bɛɛri ni, ali na ta yʼa ki cɛ xɔ bɛ. Can jomɔ pe pʼa nɔ yee na ge, yee ya pye ɲɔmɛhɛɛ fɛɛ pu funŋɔ ni. 13 Ga na nɛ yaha ke ɲiŋɛ ke na, nɛ li ta lʼa saha nɛ wʼa yi funŋɔ tun ni kii keree kii ni, kɔnhɔ yʼi da ɲɛni. 14 Bani nɛ li cɛ jo nɛ foroduun wʼa nɔ xɔ ke koŋɔ puga ke ni; wù Kafɔɔ Yesu Kirisa wʼa na pye nʼa lee cɛ. 15 Ga nʼa da na se bɛɛri pye, kɔnhɔ na nigaraga na, yi funyɔ di da dun ni kii keree kii ni tuun bɛɛri ni.
Tudunmɔɔ pʼa Kirisa wo nɔɔrɔ wu ɲa
16 Wèe ya ta wù Kafɔɔ Yesu Kirisa wo fanha ke ni wu ba wu kaa jo yi mu ni shizhiinmɛ fɛɛ wo giraya ni wɛ. Ga wèe ya wu ɲa wù ɲìi ki na, wu ni wu nɔɔrɔ wu bɛɛri ni. 17 To Kilɛ nidɛɛngɛ ki ɲɛ wu fanha ke, ni wu nɔɔrɔ wu ni. Wʼa pɛɛŋɛ ni nɔɔrɔ taha Yesu Kirisa na, tuun wemu ni wʼa jo ge na: «Nɛ ɲidaan ja wu ɲɛ we, wu kaa ya dan nɛ ni fo xuuni.»*Macoo 3:17 18 Wèeyɛ pyaa ya lee mujuu le logo na yìri fugba we ni, tuun wemu ni wèe di bye ni Yesu ni fɛfɛɛrɛ boboŋɔ ki na ge.
19 Kee keree kii bɛɛri ya li shɛ wèe na na can wu ɲɛ Kilɛ tudunmɔɔ pu wo jomɔ pe. Yi bu fungɔngɔ ta pee na, lee na bye kasaana. Bani pee jomɔ pe ɲɛ ba sokinna ɲɛ wɛ, wemu ya kpɛɛngɛ yeege nibiige ni yani ɲiga ki pa mugi, ɲimuguɲɔ wɔrɔ li lʼa ɲí ɲí yi zɔlɔɔ pu na ge. 20 Yi fɛnhɛ li cɛ na sipya wa shishiin ya Kilɛ Kafila wu wo kapaŋaa ki jomɔ cɛni wuyɛ ni wɛ. 21 Bani sipya wa shishiin ya ta wʼa kapaŋaa jo ni wuyɛ pyaa fanha ni wɛ. Ga Kilɛ ya wu jomɔ pu kan sipyii mu ge, Fɛfɛɛrɛ Munaa fanha ni pʼa pu jo.