Kashɛɛ
Yesu Kirisa wo Kashɛɛ lemu Yohana ya ɲa ge
Jɔgɔ wʼa we sɛmɛ we ka wɛ?
Yohana bɛ wu bye Yesu wo Tudunmɔɔ kɛ ni shuun wu ni. Wee wʼa we sɛmɛ we ka (Kashɛɛ 1:4,9), na wu yaha Patimɔsi suumɔ lɔhɔ niŋɛ takpiiŋɛ ki na. Li wa kanna Kilɛ wo Jozaama pu jo wuu na wʼa shɛ foro kee takpiiŋɛ ke na ba kasolemɛ ɲɛ wɛ.
Piimu mu we sɛmɛ we ya fɛnhɛ tun ge, pee ɲɛ Azi fiige ki egilizii gbarashuun we. Efese kulo li lʼa bye kee fiige ke wo kugbɔɔ le. Azi fiige ki niɲaa wogo mɛgɛ ki ɲɛ na Turuki.
We sɛmɛ we kakana ɲuŋɔ
Sɛmɛ wu kafila wʼa naha tii kashɛɛ la na: «Yesu Kirisa wo kashɛɛ lemu Yohana ya ɲa ge, Kilɛ ya lee shɛ wu na, kɔnhɔ keree kiimu kʼa yaa na pye jɛri funŋɔ ni ge, kee di shɛ wu kapyebyii pu na.» (Kashɛɛ 1:1). Pee jomɔ pe ya ɲaha tii lemu na ge, lee ɲɛ kanhagana lemu na pʼa nʼa daa fɛɛ pu kana ge. Kanhama pemu pʼa ma ge, Kilɛ bi nʼa daa fɛɛ pu gbegele pee kanhama pu wuu na, wu da pu logoo wari pʼi gori yaha ɲɔmɛɛ fɛɛrɛ ni nʼa daa wu funŋɔ ni.
Keree kiimu ki da ba bye Kilɛ fungɔngɔ na ge, wu mɛlɛkɛ wa wʼa tun wʼa pa Yohana lɔ kari fugba wu ni, na shɛ kee shɛ wu na (Kashɛɛ 4:1-2).
Sɛmɛ wu kafila ɲugbɔyɔ
Kashɛɛ 1 Yohana ya Yesu Kirisa ɲa wu nɔɔrɔ wu ni.
Kashɛɛ 2—3 Sɛmɛɛ pii pʼa tun egilizii gbarashuun wu mu ge.
Kashɛɛ 4:1—8:5 Fɛ tɛhɛɛ gbarashuun we.
Kashɛɛ 8:6—11:19 Maya gbarashuun we.
Kashɛɛ 12:1—15:8 Ɲaha shɛshɛɛrɛ gbarashuun we.
Kashɛɛ 16 Kilɛ loyire cɛɛgbuugoo gbarashuun we.
Kashɛɛ 17:1—20:15 Babilɔni ja ja keree.
Kashɛɛ 21:1—22:5 Fugba nivomɔ, ɲiŋɛ nivoŋɔ ni Zheruzalɛmu nivomɔ.
Kashɛɛ 22:6-21 Yesu ɲɔ jomɔ pu ɲɛ Kitabu wu taxɔgɔ ki ni na: «Li wii, nɛ na ba jɛri funŋɔ ni!» A nʼa daa fɛɛ pʼi wu ɲɔ shɔ na: «Amiina. Mu wu pa, wù Kafɔɔ Yesu!»
1
We Kitabu we kakana ɲuŋɔ
1 Yesu Kirisa wo kashɛɛ lemu Yohana ya ɲa ge, Kilɛ ya lee shɛ wu na, kɔnhɔ keree kiimu kʼa yaa na pye jɛri funŋɔ ni ge, kee di shɛ wu kapyebyii pu na. Wu mɛlɛkɛ wa Kilɛ ya tun wu kapyebye Yohana mu, kɔnhɔ pʼi kee keree ki cɛ. 2 Kilɛ ya jomɔ pemu jo, ni Yesu Kirisa ya can wemu shɛ Yohana na ge, yee bɛɛri wʼa paari. Bani wʼa pye yi bɛɛri sɛɛri. 3 Wemu wʼa sɔɔ na we kapaŋaa Kitabu we jomɔ kalaa sipyii mu ge, ni wemu wʼa wu jomɔ nuri, keree kii kʼa ka ge, na kee co ge, pee ɲɛ duba nagoo! Bani ki pyeduun wʼa tɛɛŋɛ.
Fò wemu wʼa kan egilizii gbarashuun wu mu ge
4 Nɛ Yohana wʼa we sɛmɛ we tun yee Azi fiige ki egilizii gbarashuun wu mu; jo Kilɛ wu niimɛ ni ɲaɲiŋɛ kan yi mu, wee wemu wu ɲɛ, ni wʼa bye, ni wu na ba ba ge! Munahaa gbarashuun wemu wu wa wu saanra koro li ɲaha tàan ge, kee ki li pye mu yi mu. 5 Yesu Kirisa bɛ wu li pye mu yi mu, wee wemu wu ɲɛ sɛɛri ɲɔmɛɛ fɔɔ ge, wee wu ɲɛ shɛnshiimɛ na fɛnhɛ ɲɛ na foro xu ni. Ɲiŋɛ ke saannaa wo Saan wu ɲɛ wii. Wèe kaa ya dan Yesu Kirisa ni, lee na wʼa wu shishan kan pʼa wo wèe wuu na, na wèe shɔ wù jurumu wu na, 6 na wèe pye Kilɛ wo saanra te wo sipyii ni saraya ɲaha shɔɔnrivɔɔ; kɔnhɔ wèe di bye wù To Kilɛ wu wo kapyeŋɛɛ pyevɛɛ. Nɔɔrɔ ni sefɛɛrɛ ti ɲɛ wu wuuro fo tɛhɛnɛ baa. Amiina.
7 Li wii, wu na ba ba ɲahaya yi na!
Sipyii bɛɛri na ba wu ɲa.
Ali piimu pʼa wu firi ge,
pee bɛ na ba wu ɲa.
Ɲiŋɛ ki shi wu bɛɛri na ba mɛhɛɛ suu wu wuu na.
Uun, lee kunni na ba bye! Amiina.
8 Kafɔɔ Kilɛ, Se Bɛɛri Fɔɔ ya jo: «Nɛ wu ɲɛ, Alifa ni Omega we, ɲɔkɔɔnrɔ te ni taxɔgɔ ke.» Wee wemu wu ɲɛ, ni wʼa bye, ni wu na ba ba ge.
Kilɛ ya kashɛɛ lemu shɛ Yohana na ge
9 Nɛ ɲɛ Yohana, yee ceborona. Yesu wo kariɲɛɛgɛ ki funŋɔ ni nɛ ni yee ya pinnɛ wu wo saanra ti na, na binnɛ kanhama ni loxulo bɛ na. Nɛ bi Kilɛ Kafila wu yɛrɛ pyi, na Yesu sɛɛri keree yu. A pʼi ba nɛ co lee wuu na, na shɛ nɛ yaha takpiiŋɛ ka na suumɔ lɔhɔ ki niŋɛ ni, kee mɛgɛ ɲɛ na Patimɔsi. 10 Kafɔɔ wo caŋa*Lee kɔri ɲɛ Dimazhi. ka na, a Kilɛ Munaa di jé nɛ ni. A nɛ mujuugbɔɔ la logo na kadugo yíri ba maga mɛɛ ɲɛ wɛ, 11 na: «Ma ɲii lʼa lemu ɲa ge, lee ka Kitabu wu ni ma tun egilizii gbarashuun wu wo nʼa daa fɛɛ pu mu: Efese, ni Simirini, ni Pɛrigamu, ni Tiyatiiri, ni Saridɛsi, ni Filadɛlifi, ni Lawodise.»
12 Mujuu le nɛ bi nuri ge, a nɛ ŋmahana ɲɛri na lee jovɔɔ wu wii. Ba nɛ wu ɲa wɛ, na sanni sokinnaa gbarashuun ɲa. 13 A nɛ yaaga ka ɲa pu tɛ ni kʼa bi foro sipya fɛni. Fadedɔɔngɔ ɲɛ wu na, sanni kirige dʼa pɔ wu dodoŋɔ na. 14 Wu ɲuzhiire di fiinŋɛ lagilagi ba dubya wele shiire ɲɛ wɛ, kelee ba zanha kagereye ɲɛ wɛ. Wu ɲìi di ɲɛ ba naɲiŋɛ ɲɛ wɛ. 15 Wu tɔɔyɔ ɲɛ ba daɲaa tɔɔrɔ ɲɛ wɛ, na ya temu ɲaaŋa fo ti na ɲí ge. Wu mujuu ɲɛ ba loɲɛhɛŋɛ fɔɔ ɲɛ wɛ. 16 Wɔrɔɔ gbarashuun ɲɛ wu kanige keŋɛ ni. Ɲɔyɔ shuun ŋmɔpara nidaan di foro wu ɲɔ ni. Wu ɲaha kʼi ɲɛ ba cafuna caŋa ɲɛ wɛ.
17 Ba nɛ wu ɲa wɛ, na do wu tɔɔyɔ ni ba gbo ɲɛ wɛ. A wu wu kanige keŋɛ taha nɛ na na jo: «Ma ganha bu fya wɛ, nɛ wu ɲɛ Nizhiimɛ we ni Kurogo wo we. 18 Nɛ ɲɛ ɲìi na, nɛ bi xu, li wii nʼa da gori yaha ɲìi na gbee. Xu ni Adɛsi kenikaangaa ki wa nɛ mu. 19 Keree kiimu mʼa ɲa ni kiimu ki wa wà ge, ni kiimu ki da ba bye ge, kee ka. 20 Wɔrɔɔ gbarashuun we mʼa ɲa nɛ kanige keŋɛ ki ni, ni sanni sokinnaa gbarashuun wu ge, kaŋmɔhɔnɔ lemu pee ya zhɛɛ ge, lee le: Wɔrɔɔ gbarashuun wu ɲɛ egilizii gbarashuun wu mɛlɛkɛɛ, sokinnaa gbarashuun wu ɲɛ egilizii gbarashuun we.