16
Pɔli fò mujuu
1 Ayiwa, nʼa da wù ceboroshɔ Febe kaa jo yi mu jo sipyisaama wu ɲɛ wii. Sankere wo egilizi wu kapyebye wa wu ɲɛ wii. Wu ba nɔ wà yi yíri, 2 yʼi wu co ɲɔ xuuni wù Kafɔɔ wo kariɲɛɛgɛ ki wuu na! Nʼa daa fɛɛ ya yaa ni baraga kemu ni ge, yi kee taha wu na! Wu mago ba yere yaaga bɛɛri na, yi wu tɛgɛ wu kee ta! Bani wʼa cebooloo niɲɛhɛmɛɛ tɛgɛ, wʼa nɛyɛ pyaa ki bɛ tɛgɛ.
3 Yi Pirisili ni wu poo Akilasi shaari! Nɛ kapyebyeɲii
pu wa pii Yesu Kirisa wo kariɲɛɛgɛ ki funŋɔ ni.
4 Pee pʼa nɛ shɔ, fo jɛɛrɛ la kaa ya fɔ puyɛ pyaa
munahaa di gori li ni. Nɛ yɛ nigin ya ta pu shaari wɛ,
ga shi wusama wo egilizii pu bɛɛri pʼa pu shaari.
5 Nʼa daa fɛɛ piimu bɛɛri pʼa puyɛ pinnɛɛ pee yíri ge,
yi pee bɛɛri shaari!
Yi na taanɲii Epayinɛti bɛ shaari! Wee wʼa pye
shɛnshiimɛ na sɔɔ Kirisa na Azi fiige ki ni.
6 Yi Mariyama bɛ shaari, wee wemu wʼa labye
niɲɛhɛmɛ pye yi mu ge.
7 Yi Andoronikusi ni Zhuniyasi yɛ shaari! Pee ɲɛ na
shi shɛɛn, na nɔhɔ pye na kaso pyeɲii bɛ sanha.
Pu bɛ kaa ya cɛ fo xuuni tudunmɔɔ pu tɛ ni,
pu da nɔhɔ dà bɛ Kirisa na nɛ ɲaha na.
8 Yi Anpiliyasi shaari, nɛ taanɲii wu ɲɛ wii
Kafɔɔ wo kariɲɛɛgɛ ki funŋɔ ni.
9 Yi Urubɛn shaari, wee ɲɛ wù labyeɲii Kirisa wo
kariɲɛɛgɛ ki ni. Yi na taanɲii Sitasisi shaari!
10 Yi Apɛlɛsi shaari, wee nɔhɔ ya wolo xuuni
Kirisa mɛgɛ ki wuu na, ga, a wu mɛsaaŋa ta.
Yi Aritobuli puga shɛɛn pu shaari!
11 Yi Hɛrɔdiyɔn shaari, na shi shɛn we.
Narisisi puga shɛɛn piimu pu ɲɛ Kafɔɔ wo kariɲɛɛgɛ
ki ni ge, yi pee bɛ shaari!
12 Yi Tirifɛnɛ ni Tirifozi shaari, pee cèe shuun we,
pee ya puyɛ pɔ Kafɔɔ wo labye wu na.
Yi wù ceboroshɔ wù taanɲii Pɛrisidi bɛ shaari,
wee bɛ ya la pye xuuni Kafɔɔ mu.
13 Yi Urufusi shaari, Kafɔɔ ya wemu ɲaha bulo ge.
Yi wu nu wu bɛ shaari,
wee wemu nɛ bɛ ya wii na nu ge.
14 Yi wù fò kan Asɛnkirite ni Filegɔn ni Hɛrimɛsi ni
Patorobasi ni Hɛrimasi mu! Wù cebooloo piimu
bɛ pu wa pu yíri ge, yi wù fò kan pee bɛ mu!
15 Yi wù fò kan Filologi ni Zhuli mu, ni Nɛrɛ ni wu
ceboroshɔ, ni Olɛnpe. Nʼa daa fɛɛ piimu bɛɛri
pu wa pu yíri ge, yi pee bɛ shaari.
16 Yʼa yiyɛ shaari ni fɛfɛɛrɛ taanɲɛɛgɛ fò ni!
Kirisa wo egilizii pu bɛɛri ya yi shaari.
Yɛrɛ lemu Pɔli ya pye ge
17 Ayiwa na cebooloo, kalaa wemu yee ya ta wèe mu ge, piimu pʼa wee she, na ganha na nʼa daa fɛɛ pu waagi, na pu ɲuyɔ kyɛɛgi ge, na yi ɲɛɛri jo yʼa yiyɛ kasɛri pee na. Yi sii laraga yaha pu mu! 18 Bani pee sipyii pii ɲɛ wù Kafɔɔ Kirisa wo kapyebyii wɛ, ga pu yacɛrɛɛ taɲiŋɛ pu ma zhaa. Sipyii piimu pu ɲɛ pu ya nʼa daa wu keree cɛ xuuni-i ge, pʼa ganha na ɲɔtanga jomɔ ni kafila lɛlɛɛgɛɛ taga na pee faanna. 19 Ga yee kunni, yee ya Kilɛ ɲɔmɛɛ co cogana lemu na ge, sipyii pu bɛɛri wa lee cɛ. Lee wuu na nɛ funŋɔ taan xuuni yee shizhaa na. Na funŋɔ ki wa yʼi bye fungɔnyɔ fɛɛ, yi da kasaaŋaa pyi, yʼi bye fɛɛfɛɛ, kakuunɔ la shishiin ganha ba ɲaa yi nibyegee ki ni wɛ.
20 Ayiwa, jɛri funŋɔ ni ɲaɲiŋɛ fɔɔ Kilɛ wʼa da ba Shitaanni wo sefɛɛrɛ ti bɛɛri kyɛɛgi na yeege yi tɔɔyɔ ni. Wù Kafɔɔ Yesu Kirisa wu niimɛ kan yi mu!
21 Na kapyebyeɲii Timote ya yi shaari, ni na cebooloo Izirayɛli shɛɛn, pee piimu pu ɲɛ Lusisi, ni Zhasɔn, ni Sosipatɛri ge, pu bɛ ya yi shaari. 22 Ayiwa, Tɛritusi wemu wʼa we sɛmɛ we ka nɛ mu ge, wee bɛ ya yi shaari Kafɔɔ wo kariɲɛɛgɛ ki ni. 23 Na jatigina Gayusi ya yi shaari. Wee wu ɲɛ egilizi wu bɛɛri jatigi. Erasiti wemu wu ɲɛ Kulo li wariyahama wu ge, wee ni wù ceborona Karitusi ni, pee bɛ ya yi shaari. [ 24 Wù Kafɔɔ Yesu Kirisa wu niimɛ kan yi bɛɛri mu! Amiina.]
Pɔli ya Kilɛ sɔ
25 Kilɛ Jozaama pemu wo yɛrɛ nɛ pye Yesu Kirisa keree na ge, se wa Kilɛ ni wu baraga le yee ni pee shizhaa na. Lee kaŋmɔhɔnɔ le lʼa foro kpɛɛngɛ na. Li niŋmɔhɔŋɔ ki bye fo yee niɲɛhɛŋɛɛ. 26 Ga lee ya foro nimɛ kpɛɛngɛ na, Kilɛ tudunmɔɔ pu wo kafila nigama wu funŋɔ ni. Lee ya pye na saha ni Kilɛ kodayi wu wo ɲɔmɛɛ ni, kɔnhɔ shi wusama bɛɛri di Kilɛ wo Jozaama pu logo, pʼi dà Yesu na, pʼi wu ɲɔmɛɛ co.
27 Kilɛ yɛ nigin wu ɲɛ fungɔngɔ fɔɔ. Nɔɔrɔ wʼa dɛri wu mɛgɛ na tɛhɛnɛ ba Yesu Kirisa gbɔɔrɔ ni. Amiina.