Tutu ña kēta kuenda ñivi Hebreu
1
Ndioo, tāchi ra ma ra se'e ra ña na katitu'un ra ma tu'un yu'u ra nuu ma ñivi
1 Tandi'i ma kuiya yā'a taji'na, Ndioo kā'an ra chi'in ma ndian kūu ñivio, ndian chīyo taji'na kua'a' va'a cha'a' chi'in kua'a' nuu tu'un, ta tāchi ra ma ndra kà'an chi'in tu'un yu'u ra ña na katitu'un ndra yi nuu na takan. 2 Va ma vitin, ma nuu ndi'inia ma kuiya, tāchi Ndioo ma ra Se'e ra Jesuu nuu yo, ña na ka'an ra chi'in tu'un yu'u Ndioo nuu yo, vati Ndioo chā'a ra ndisaa kuii ma tundeeni ra nuu ra, ta juuni kūta'an ra chi'in ra ora jātuvi ra ma ñuñivi chi'in andivi. 3 Vati Jesuu indukuni tàcha ra takua tàcha Racha'nu Ndioo, ra ìyo andivi. Ta ma xina'ñu ra, indukuni kùu yi takua kùu ma Ndioo. Ta Jesuu chi'in tu'un ra, nuu nda'a' ra ìyo tandi'i ma nakuyi ìyo ñuñivi, ti ya'aga ndatu ma ña kà'an ra. Ta ora cha yā'a ña jānandoo juuni maa ra ma kuatio, chūnandi ra ma andivi, iti' chiyo kua'a ma Ndioo nuu chà'nda ra tiñu.
Ma Jesuu ra Se'e Ndioo, ka'nuga ma tiñu jà'a ra kua ma tiñu ña jà'a ma tati va'a ña jà'a tiñu nuu Ndioo
4 Yakan va ka'nuga kùu ma sivi ra Se'e Ndioo, kua ma tati va'a ña jà'a tiñu nuu Ndioo. Vati ma Ndioo jā'a ña nī'i ra iin tiñu nduva'a kuii ka'nuga kua ma ña nī'i ma tati jà'a tiñu nuu ra. 5 Vati ma Ndioo tükuii nī ka'an ra te'en chi'in ma nï'iin ma tati va'a jà'a tiñu nuu ra:
Yo'o kùu ma se'i,
Ta vitin yu'u kùu ma ra chā'a tundeeni̱ nuu̱n.
Ta juuni töve nī ka'an ra te'en chi'in nï'iin tati va'a ña jà'a tiñu nuu ra:
Yu'u kùu iin Tatá maa ra,
ta rakan, kuendai vitin kùu ra iin ra Se'i.
6 Va ma inga tuku cha'a' ña jàna'a Ndioo ma ra Se'e nunuu ra nuu ñu'u' ñuñivi i'ya, kà'an ra te'en:
Ndyo'o tati jà'a tiñu nui, na jaka'nu ndo ma ra Se'i.
Kā'an ra chi'in na.
7 Ndioo kà'an ra te'en cha'a' ma tati va'a ña jà'a tiñu nuu ra:
Jà'i ña na kuu ma tati va'a jà'a tiñu nui takua kùu ma tati chàkin,
ta na kuu na takua kùu ma ñu'ú ndàkonditi ndia.
8 Ndioo kà'an ra nuu ma ra Se'e ra Jesuu te'en ndia:
Yo'o Racha'nu Ndioo, ma yutun vatun ndà'un,
jàna'a yi ña chi'in tu'un ndaa ni ka'ndaun tiñu endeeni.
9 Vati maun kùuniun nde'un ma ña va'a ta xaaniun nde'un ma ña töve va'a,
yakan va yu'u ra kùu Ndiooun, kāchi̱n ñu̱n,
ta ya'aga chìtu ma animaun ña chìsiun jā'i kua ma ndian ndàkata'an chi'un,
kā'an Ndioo chi'in Se'e ra.
10 Ta juuni kà'an ra te'en ndia:
Yo'o Racha'nu, ma ora kīcha'a ma ñuñivi, maun jā'a ña tūvi yi,
ta juuni chi'in nda'a' maun kùu yi ña tūvi ma andivi jā'un ndia.
11 Tandi'i ma ña tūvi niku ni naa yi,
va maun ni koo endeeni.
Tandi'i ma ña tūvi,
ni kucha'nu yi takua ndòcha'nu ma ja'ma ña chàku'un yo.
12 Ta ni tika'nu̱n ma ñuñivi takua jà'a yo chi'in iin ja'ma ora chìkuta'nu yi,
ta juuni ni nasamaun yi takua jà'a yo ora sàma yo ma ja'ma chàku'un yo.
Va maun, iini ra kùu̱n ña töve sàmaun,
ta nï'iin cha'a' na töve ni naun ndia.
Takan kā'an Ndioo chi'in Se'e ra.
13 Nï'iin cha'a' na töve nī ka'an ma Ndioo te'en chi'in ma ndian kùu tati va'a jà'a tiñu kuenda ra:
Kunandi iti' chiyo kua'i nda kati ku'vai tandi'i ma ndian kànita'an chi'un nuu̱n,
ikan na kuu na takua kùu ma nuu chòjondi cha'un,
ta ikan na kuu ka'ndaun tiñu nuu na,
kā'an ra.
14 Vati ndisaa ma ndian kùu tati va'a, ndian jà'a tiñu nuu Ndioo, juuni kùu na ndian tāchi Ndioo, ña na tindee na ma ndian ni ni'i ña na kakú jà'a ma tundeeni ra.