25
Txu¹ti³nãu³xa² ĩ³tih³nxe³nẽ³jau³su²
Jã¹nxa¹jau³su² a²nũ²a² a²ẽ¹na² sa²hau³ko³te²nũ³a² ĩ³yau¹ũ³hi² a²ẽ¹na² sa²hau³ko³txa³te²nũ³a² ĩ³yau¹ũ³hi² nxe³nx2ta¹tu¹wi¹. A²nxe³te²na² wãin²te²nãu³xa² yã¹nxe³ti³hĩ̱³nx2na³li¹. A²nxe³te²nãu³xai²na² in³txa² kwẽn¹tai²na² txu¹ha² so¹te³lhxã³ jah¹la² wahx3nxain¹nũ²nhai¹. Wi¹lxon³kxi²jau³nũ³a² ĩ³ye³kxi²te³lhxã³ wahx3nxain¹nũ²nhai¹. Nxe³sxã³ ka³nxa³hi²ha²kxai³ lã³pi³ãu²tẽ³na² tẽ³sxã³ a³li³ain¹ka³tu̱³ wahx3nxain¹nũ²nhai¹. A²nxe²te²wãin²te²nãu³xa² a²wã³kxi³kxai³ ha¹li¹ ha¹li¹ ka³na³ki¹ a³la³kxi²yai¹nha²kxai³ a²wã³kxi³kxai³ ha¹li¹ ha¹li¹ ka³na³ki¹ a³la³kxi²ye³yhai¹nxa³ha²kxai³ nxe³te²wãin²te²nãu³su² nũ²nhai¹. A²nxe³sxã³ a³la³kxi²ye²yhai¹nxa³te² wãin²te²nãu³xa² o²lyau³xa² taut3ton³jau³xa² sa²so¹ai¹nxa³ha²kxai³ lã³pi³ãu²tẽ³na² so¹lxi³ sa²so¹ha²kxai³ nxain¹nũ²nhai¹. Nxe³yãn¹ta¹ a³la³kxi²ye²yhain¹te² wãin²te²nãu³xa² lã³pi³ãu²tẽ³na² sa²so¹ha²kxai³ o²lyau³xẽ¹na² ãh¹ sa²so¹ai¹nha²kxai³ nxain¹nũ²nhai¹. Jã¹nxe³jut3su² in³txai²na² txu¹ha² so¹nh³jah¹la² wa³su³txi³ wa̱³li²nxa³ha²kxai³ wãin²te²nãu³xai²na² wah³nxa² hxi²tha³nhai¹nha²kxai³ ãu³xi² ã³si³wxe³ain¹nũ²nhai¹.
Nxa²ha¹te¹ ka³nxah³ta² wi³ta³lon³sxã³ ĩ³kaix1tain¹jau³su² ain³kxain¹nũ²nhai¹. Ain³kxain¹te³nah¹lxi¹: “In³txa² wẽ³sãi¹ah³lai²na² wxã²na³ni¹. óne³khauh²kxi¹jah³lxi³hẽ¹ni¹.” Nxe³nũ²nhai¹.
Nxe² ain³kxi²nyhu¹te³na¹ wãin²te²nãu³xa² a²yxo²ha³kxa¹ ĩ³sa²yxau³nũ²la² a²lã³pi³ãu²khai³xai³tã² wxa²hau³kot3sxã³ tẽ³sxã³ ai³ain¹nũ²nhai¹. Nxe³tãu³a¹ a³la³kxi²ye²yhai¹nxa³te² wãin²te²nãu³xai²na² a²yxo²wãn³txi³kxai³lu¹: a³la³kxi²ye²yhain¹te² wãin²te²nãu³xai²na² ĩ³ye³kxi²nyhain¹te³nah¹lxi¹: “Nxe³jah³lxi³si¹nxi¹. Wxa²ol²yau³xa² wã²nhũh¹syah¹lxi³sĩ¹ni¹. Lã³pi³ãu²tẽ³na² tẽ³sĩ¹na¹kxa² ĩ³yũ¹la³kxi²sa²sĩn¹na²ni¹.” Nxe³nyhain¹nũ²nhai¹.
Nxa²ha¹te¹ a³la³kxi²ye²yhain¹te² wãin²te²nãu³xa² sa²kxai³lu² ĩ³wa²lũ³xi²nyhain¹te³nah¹lxi¹: “Kwa²nhi¹nxi¹. Hxi²kan¹sa²sĩ¹nxa³nhi¹. O²lyau³xa² whãi²na¹ hxa³nẽ³kxa²ya̱n³txi³su² nũh¹xai³yah³lxin¹sxã³ o²lyau³xa² so¹kxi²nyhu¹kxi³thĩ³na² ai³sxã³ tah²yau³xa² so¹kxi¹jah³lxi³hẽ¹ni¹.”
10 Nxe³nũ²la² a³la³kxi²ye²yhai¹nxa³te² wãin²te²nãu³xai²na² o²lyau³xa² ãh¹so¹kxi²te³lhxã³ a³li³ain¹tãu³a² in³txai²li² wa̱³li²nũ²nhai¹. Wa̱³li²sxã³ wah³nxe³te²wãin²te²nãu³xa² ĩ³yain³kxi²te³lhxã³ ã³wi¹hya³hain¹nũ²nhai¹. ówih¹nũ²la² hã²wxãn³txa³ wi²wxã³je³nãu³wa³kxa² ha³nãu³hi²ha²kxai³ sxih²yxo²a² ũh³yxo²ĩ¹nũ²la² yain³kxi²nyhain¹nũ²nhai¹.
11 Hã²wxãn³txa³ a³la³kxi²ye²yhai¹nxa³te² wãin²te²nãu³xa² ã³wa̱³lain¹nũ²la² ĩ³yxo²to¹to¹tain¹te³nah¹lxi¹: “Sa²yxo²than²kxi²sa²sĩ¹nhẽ³li¹.” Nxain¹nũ²nhai¹.
12 Nxa²ha¹te¹ in³txai²li² ĩ³wa²lũ³xi²te³nah¹lxi¹: “Nxe³sa²nxi¹. Ya²la³tu̱³ ã³ye³wxe³nxa²lxi³nxa³nhi¹. Hxi²kan¹sa²nxa³nhi¹.” Nxe³nũ²nhai¹.
13 Jã¹nxa¹jau³su² ye³ten³nha²sxã³ wahx3nxe³jah³lxi³hẽ¹li¹. Ha³lo²a² wa̱³li²na¹ti³wa³kxa² ko̱³yhah¹lxa³lxi¹.
A²sa³wi³ha³lxa² ha¹li¹ ka³na³ko¹ta³lxin³te²nãu³xa² ĩ³yau¹ũ³jau³su²
14 Te²yã¹nxũn³jau³su² ĩ³ye³kxi¹nx2ta¹tu¹wi¹. Wi¹kãi³kxi²sain¹te²su² te²na² a²yo³ha² wi¹lũ³yho³hai¹na¹kxi³nũ³su² ĩ³yau¹ũ³nx2ta¹tu¹wi¹. Nxe³kxa²yã¹nxe² hĩ̱³nx2na³li¹. Nxe³te³nah¹lxi¹, in³txi³su² yen³kxi³nh²jah¹la² ha³lo²a² u²la²nãn¹ko³xa² ai³te³lhxã³ nxũ²nhai¹. Nxe³sxã³ a²sa³wi³ha³lxa² ĩ³kaix1sxã³ a²yen³kxi³khai³xa² wã²nhũh¹xai³ain¹nũ²nhai¹. 15 A²wi¹lhĩ¹nãn¹ta² sa³wi³sa² ũ³yho³hi²ki³ki³a² ki³ha¹li¹ ki³ha¹li¹ ka³na³ki¹ nxe² ka³lxa²ki³a² wã²nhũh¹nũ²nhai¹. óta³lo³hẽ¹te² sa³wi³sa² ki³ha¹li¹ wã²nhũ¹ha²kxai³ ne³ki³son³te² sa³wi³sa² ki³ka³na³ki² wã²nhũ¹ha²kxai³ nxain¹sxã³ ũ³yho³hi²nyhu¹ki³a² hxi²ka¹nain¹kxa² yã¹nxe² a²yen³kxi³khai³xa² wã²nhũ²xai³ain¹nũ²nhai¹. Nxe³ka³tu̱³ u²lxai³nũ²nhai¹. 16 Nxe²ai³tãu³a² a²wi¹lhĩ¹nãn¹ta² a²sa³wi³sa² yen³kxa² ũ³yho³hi²ki³a² ki³ha¹li¹ ki³ha¹li¹ ka³na³ki¹ so¹kxi²jah¹lai²na² sa²kxai³lu² ki³ai²na² tẽ³sxã³ wain³txi³ wa³kon³kxi²ha²kxai³ ki³lã̱³xa² ãh¹ki³ha¹li¹ ki³ha¹li¹ ka³na³ki¹ ãh¹so¹kxi²nũ²nhai¹. 17 Te²yã¹nxe³jut3su² ã³ta³lo³hẽ¹te² sa³wi³sa² ũ³yho³hi²ki³a² ki³ha¹li¹ so¹kxi²jah¹lai²na² sa²kxai³lu² ki³ai²na² tẽ³sxã³ wain³txi³ wa³kon³kxi²ha²kxai³ ki³lã̱³xa² ãh¹ki³ha¹li¹ ãh¹so¹kxi²nũ²nhai¹. 18 Nxe³yãn¹ta¹ ne³ki³son³te²a² ũ³yho³hi²ki³a² ki³ka³na³ka³nat3sxã³ so¹kxi²jah¹lai²na² sa²kxai³lu² ta³ki¹ai²na² tẽ³sxã³ a³li³nũ²nhai¹. Ha³lo²a² ai³nũ²la² kxĩh³nxa² wxa²xu³sxã³ ũ³yho³hi²ki³ai²na² wã²nhũ¹hain¹ki³ain²ti³ ũ³whĩ̱¹kxi²nũ²nhai¹.
19 Hã²wxãn³txa³ ye³ka³lxa¹txi³ a³lan²ton³tãu³a² yen³kxa² a²wa³kxẽn³yah³la² ĩ³xi²nũ²nhai¹. Ĩ³xi²ka³tu̱³ a²yen³kxa² ĩ³hau³kot3si¹jau³su² a²sa³wi³ha³lxa² ĩ³kaix1tũ²nhai¹. 20 Nxe³te³na¹ a²wi¹lhĩ¹nãn¹ta² sa³wi³sa² ũ³yho³hi²ki³a² ki³ha¹li¹ ki³ha¹li¹ ka³na³ki¹ so¹kxi²jah¹lai²na² sa²kxai³lu² ki³lã̱³xa² so¹kxi²ki³ain²ti³ hxi²tẽ³nha²sxã³ ĩ³ye³kxi²te³nah¹lxi¹: “Txa²sũ̱³nãi³. Ũ³yho³hi²ki³a² ki³ha¹li¹ ki³ha¹li¹ ka³na³ki¹ ũ³hũ¹san¹tai¹ti²tu³wi¹. Nxe³yãn¹ta¹ ki³lã̱³xa² ãh¹lxi³sxã³ ki³ha¹li¹ ki³ha¹li¹ ka³na³ki¹ ãh¹so¹kxi²na¹hẽ³li¹. Ĩ²txa²hẽ³li¹.” Nxe³nũ²nhai¹.
21 Nxa²ha¹te¹ a²wa³kxẽn³yah³la² ĩ³wa²lũ³xi²te³nah¹lxi¹: “Wi¹na³li¹. Yen³kxa² jũ¹nxe² ũ³hũ¹nxa²ha¹kxai³tã² wi¹wi¹nxe² wa³kon³kxi²sa²te²sin¹tai¹. Nxe³ha²kxai³ yen³kxa² kãi²li³sxã³ ũ³hũ¹sa³wxe³nxa²ha¹tu¹wi¹, sa²hau³kot3si¹nxa²ha¹jau³su¹. Wi¹lo²la³kxi²xai³ki̱³tu¹wi¹.” Nxe³nũ²nhai¹.
22 Te²yã¹nxe³sxã³ ã³ta³lo³hẽ²te² sa³wi³sa² ũ³yho³hi²ki³a² ki³ha¹li¹ so¹kxi²jah¹lai²na² sa²kxai³lu² ki³lã̱³xa² so¹kxi²ki³ain²ti³ hxi²tẽ³nha²sxã³ ĩ³ye³kxi²te³nah¹lxi¹: “Txa²sũ̱³nãi³. Ũ³yho³hi²ki³a² ki³ha¹li¹ ũ³hũ¹san¹tai¹ti²tu³wi¹. Nxe³na¹ta¹ ki³lã̱³xa² ãh¹lxi³sxã³ ki³ha¹li¹ ãh¹so¹kxi²na¹hẽ³li¹. Ĩ²txa²hẽ³li¹.” Nxe³nũ²nhai¹.
23 Nxa²ha¹te¹ a²wa³kxẽn³yah³la² ĩ³wa²lũ³xi²te³nah¹lxi¹: “Wi¹na³li¹. Yen³kxa² jũ¹nxe² ũ³hũ¹nxa²ha¹kxai³tã² wi¹wi¹nxe² wa³kon³kxi²sa²te²sin¹tai¹. Nxe³sa¹nha²kxai³ yen³kxa² kãin² ũh³hũ¹sa³wxe³nxa²ha¹tu¹wi¹, sa²hau³kot3sih¹nxa²ha¹jau³su¹. Wi¹lo²la³kxi²xai³ki̱³tu¹wi¹.” Nxe³nũ²nhai¹.
24 Te²yã¹nxe³sxã³ ne³ki³san³te² sa³wi³sa² ũ³yho³hi²ki³a² ki³ka³na³ka³nat3sxã³ so¹kxi²jah¹lai²na² sa²kxai³lu² wai³nxa³jau³su² ĩ³ye³kxi²te³nah¹lxi¹: “Txa²sũ̱³nãi³. Hxi²kxã̱u³jah¹lo²si¹lxi¹. Yain³txa² wa³kon³nxã³kxan²ti³ hãi¹sxã³ wa³kon³kxi²nxain¹kxa² yen³kxa² sa²so¹nha²kxai³ yain³txa³ki³a² ũh³wĩ̱¹xan³kxan²ti³ yain³txa² ũ³whĩ̱¹kxi²nxain¹kxa² yain³txa² sa²so¹nha²kxai³ nxe³te²si¹lxi¹. Wxa²yen³kxa² kãi²non³nha²kxai³ wxa²sa³wi³ha³lxai²na² yen³kxa² kãi²no³txa³ha²kxai³ nxe³te²si¹lxi¹. 25 Nxĩ¹nha²kxai³ yu̱h³lxi³nxa²ha¹hẽ¹li¹. Nxa²ha¹ha²kxai³ a³li³a¹nũ²la² kxĩh³nxẽ¹na² wxa²yen³kxa² ũ³whĩ̱¹kxi²na¹hẽ³li¹. Nxe³sxã³ wxa²yen³kxai²na² ti¹na² yũ³ye¹nx2na³li¹.” Nxe³nũ²nhai¹.
26 Nxa²ha¹te¹ a²wa³kxẽn³yah³lai²na² wãn³txi³kxai³lu¹: “Ko̱³nxe³thin¹khai¹nxi¹lxi¹. Ĩ³lxa³thin¹ti³he¹nx2nxa³lxi¹. Yain³txa² wa³kon³nxa³kxan²ti³ hãi¹sxã³ sa²so¹na¹ha²kxai³ yain³txa³ki³a² ũh³wĩ̱¹nxa³kxan²ti³ yain³txa² sa²so¹na¹ha²kxai³ nxe³na¹jut3su² ĩ²san¹ji¹wi¹? 27 Nxĩ¹nha²kxai³ ĩh¹nxe³kxa²ya̱n³ti³ta̱³ txa²yen³kxa² tẽ³sxã³ a²nũ²a² ũ³yho³hi²ki³a² o²la³kxain¹tũ̱³ka̱³txa² kwa² ũ³hũ¹ai¹nxã³thai¹li¹? Nxĩn¹ke³la³te²kxai³ hã²wxãn³txa³ ĩ³xi²na¹tãu³a² txa²yen³kxai²na² ka³lxa¹ton³kxi³nũ³su² ũ³hũ¹xi²sa²hĩ̱³nxa¹lxi¹. 28 Jã¹nxa¹jau³su² nxa²ha¹te¹ txa²sa²wi³ha³lxi³ ã̱³lxah³lxin¹te² ĩ³nxai²na² nxe³jah³lxi³hẽ¹li¹. Ki³ka³na³ka³nat3sxã³ tẽ³ain¹kxa² sa²so¹kxi²txai¹nhẽ³li¹. Sa²so¹kxi²sxã³ jah¹la² ki³a² hxi²ka² hxan³sxã³ ki³ai²na² hxi²tẽ³nha²jah¹la² ũ³hũ¹txai¹nhẽ³li¹. 29 Nxe³sxã³ a²nũ²a² yen³kxi³nh²te²na² ãh¹ kãi²non³sxã³ yen³kxa² ũ³hũ¹nyhain¹tu¹wi¹. Nxe³sxã³ yen³kxih³khai¹nxe³tu¹wi¹. Yxãn¹ta¹ a²nũ²a² yen³kxi³txa²jah¹la² yen³kxa² jũ¹nxe² yũ³kxan²ti³ sa²so¹xi²hxa³txain¹tu¹wi¹. 30 Jã¹nxe³sxã³ jah¹lai²na² ĩ³la³thi¹nxa³jah¹lai²na² sa²kxai³lu² tẽ³sxã³ ha³lo²a² ka³nxah³ha²lu²on³ju³ta² ũ³sa²tã³ũ¹tain¹yah³lxi³hẽ¹li¹. A²nxe³tãu³a² ye³khãuh³lxa³thin¹ju³tan¹te²kxa³ya̱³lhu² kãin² ĩ³nã̱³nha²kxai³ kãin² wxi²ka³ta³ta³tha²kxai³ nxe³tu¹wi¹.” A²wa³kxẽn³yah³la² nxe³nũ²nhai¹.
A²nũ²a²nãu³xa² kãi³ain¹kxa²yo³ha² ĩ³yĩ¹li²jau³su²
31 Nxa²ha¹te¹ yan¹nãu³a¹ Txa²wã¹sũ̱³na² A²hxi²kan¹ta² Si³yxau³tãu³lot3sa²tu¹wi¹. Nxe³sa²hĩ¹na¹ a³ka³nxi²sxã³ wa̱³li²na¹tu¹wi¹. Nxa¹kxai²nãn²tu̱³ oh³xan¹ta² nũ̱³ka̱³txa² tẽ³lĩ³xi²na¹tu¹wi¹. 32 Jã¹nxe³tãu³a¹ a²nũ²a² nũ̱³ka̱³txi³nãu³xai²na² a²yxo²ha³kxa¹ ã³yã³ki³nũn²kxi²sain¹tu¹wi¹. Nxe³te³na¹ ha³na³ka³lxi³ sa³wxe² ha³na³ka³lxi³ sa³wxe² ai¹na¹tu¹wi¹. 33 Nxe³te³na¹ a²nũ²a²nãu³xai²na² yxo²ĩ²sain¹te²nãu³xa² wã²nxa³kxa² so¹sxã³ txa²wi¹lha²tãu³a² ũh³wxe³ai¹na¹ha²kxai³ a²wã³kon³tũ̱³ka̱³txa² txa²wã̱³tãu³a² ũh³wxe³ai¹na¹ha²kxai³ nxe³ai¹na¹tu¹wi¹. 34 Nxa¹kxai²nãn²tu̱³ txa²wi¹lha²tãu³a² sa³wxe³te²nãu³xa² ĩ³ye³kxi²na¹tu¹wi¹. Nxe³na¹te³nah¹lxi¹: “Wxã³jah³lxi³hẽ¹li¹. Txa²wĩ³na² ĩ³wi¹lxon³kxi¹nx2ti³tu¹wi¹. A²wi¹lhĩ¹nu¹tai²kxai³ ha³lo²a² tah²ko³xa² ĩ³ye³hau³ko³ta¹hxai²ti³ai¹ti²tu³wi¹. Hĩ¹na² ko³xain²txi³ ũ³hũ¹nx2ti³tu¹wi¹. 35 Nxe³sxã³ kxã³nxai³tã² heh³sa³hẽ¹li¹. Yxãn¹ta¹ yain³txa² ũ³hũ¹sah¹lxin¹tai¹ti²tu³wi¹. Ya̱³lxu²sa³ha²kxai³ ĩ³na²kxi³jau³xa² ũ³hũ¹sah¹lxin¹tai¹ti²tu³wi¹. Txa²ya̱n³ta³ yũ³sa²nxa³ha²kxai³ sxi²ha² ũ³hũ¹sah¹lxin¹tai¹ti²tu³wi¹. 36 Wã²la² txa²sa³ha²kxai³ wã²la² ũ³hũ¹sah¹lxin¹tai¹ti²tu³wi¹. Ĩ³ton³sa³ha²kxai³ wxã³sĩ²sah¹lxin¹tai¹ti²tu³wi¹. Sxi²ha² kan²thĩ³na² ũ³tĩ¹kxi²sai¹nha²kxai³ wxã³sĩ²sah¹lxin¹tai¹ti²tu³wi¹.” Nxe³na¹jau³su². Nxe²e³kxai¹na¹tu¹wi¹.
37 Nxa²ha¹te¹ wi¹lhin¹te²nãu³xa² ĩ³wa²lũ³xi²sain¹tu¹wi¹. Nxe³sain¹te³nah¹lxi¹: “Txa²hxi²kan¹ta² Si³yxau³kah³lãi³. Ĩh¹nxe³hĩ¹nai³tã² nxe² ĩ²nxa²sĩ¹na¹lhai¹li¹? Heh³nxa²ha²kxai³ yain³txa² ũ³hũ¹nxa²sĩ¹na¹lhai¹li¹? Ya̱³lxu²nxa²ha²kxai³ ĩ³na²kxi³jau³xa² ũ³hũ¹nxa²sĩ¹na¹lhai¹li¹? 38 Wxa²ya̱³la² yũ²nxã²nxa³ha²kxai³ sxi²ha² ũ³hũ¹nxa²sĩn¹na¹lhai¹li¹? Wã²la² txa²nxa²ha²kxai³ wã²la² ũ³hũ¹nxa²sĩn¹na¹lhai¹li¹? 39 Ĩ³ton³nxa²ha²kxai³ wxã³sĩ²nxa²sĩn¹na¹lhai¹li¹? Sxi²ha² kan²thĩ³na² ũ³tĩ¹kxi¹nxain¹sĩ¹nha²kxai³ wxã³sĩ²nxa²sĩn¹na¹lhai¹li¹? Ĩh¹nxe³hĩ¹nai³tã² nxe²kãi³ũh¹nxa²sĩn¹na¹lhai¹li¹?” Nxe³sain¹tu¹wi¹.
40 Nxa²ha¹te¹ ĩ³ye³kxai¹na¹tu¹wi¹. Nxai¹na¹te³nah¹lxi¹: “Wãn³txi³su² ĩ³ye³kxi¹nx2ta¹wi¹. Txa²sa³wi³ha³lxi³nãu³xa² kãi²nxa³kxan²ti³ wi¹kãi³ũ¹yhah³lxin¹kxai²nãn²tu̱³ wi¹kãi³ũh¹sah³lxi³nũ³nhĩ̱³nxa¹lxi¹.”
41 Nxe³nũ²la² a²wã̱³tãu³a² sa²wxe³si¹hai¹na¹te²nãu³xa² yxo²ĩ²sai¹nxa³te²nãu³xa² ĩ³ye³kxai¹na¹tu¹wi¹. Ĩ³ye³kxai¹na¹te³nah¹lxi¹: “ówaix3sah¹lxi³hẽ¹li¹. Ko̱³nxe³thin¹yah³lxi¹lxi¹. Ha³lo²ai²li² ha³nxe²a² i̱³ju³ta² ã²la² ãu¹la³kxi³ko³xai²na² a²ta³a²nãu³xa² ũ³sa²tã³kxi²si¹ju³ta³nũ³a² ũ³sa²tã³nx2tain¹tu¹wi¹. 42 Kxãn³nxai³tã² heh³sa³ha²kxai³ hai³txi³ yain³txi³la³ ũ³hũ¹sah¹lxan³nxãn³tai¹ti²tu³wi¹. Ya̱³lxu²sa³ha²kxai³ ĩ³na²kxi²jau³xa² ũ³hũ¹sah¹lxan³nxãn³tai¹ti²tu³wi¹. 43 Txa²ya̱n³ta³ yũ³sa²nxa³kxe³su² wxa²sxi²ha² ũ³hũ¹sah¹lxan³tai¹ti²tu³wi¹. Wã²la² txa²sa²ha²kxai³ wã²la² ũ³hũ¹sah¹lxan³tai¹ti²tu³wi¹. Ĩ³ton³ta̱³nxa² sxi²ha² kan²thĩ³na² ũ³tĩ¹kxi²sain¹ta̱³nxa² nxe³ha²kxai³ wxã³sĩ²sah²lxan³tai¹ti²tu³wi¹.” Nxai¹na¹jau³su² nxe² e³kxai¹na¹tu¹wi¹.
44 Nxa²ha¹te¹ a²wã̱³tãu³a² sa²wxe³ai¹na¹tu̱³ka̱³txa² ĩ³wa²lũ³xi²sain¹tu¹wi¹. Nxe³sain¹te³nah¹lxi¹: “Txa²hxi²kan¹jah¹lãi³. Ĩh¹nxe³hĩ¹nai³tã² heh³nxa²ha²kxai³ ya̱³lxu¹nxa²ha²kxai³ a²ya̱n³ta² yũ³nxã²nxa³ha²kxai³ wã²la² txa²nxa²ha²kxai³ ĩ³ton³nxa²ha²kxai³ sxi²ha² kan²thĩ³na² ũ³tĩ¹kxi²nxai¹nha²kxai³ nxe³nxa²ju³tai²na² ĩ²nxa²sĩ¹na¹kxan²ti³ wi¹kãi³ũh¹nxa²sĩn¹nxa³lhai¹li¹?” Nxain¹jau³su² nxe² e³kxi²sain¹tu¹wi¹.
45 Nxa²ha¹te¹ ĩ³wa²lũ³xai¹na¹tu¹wi¹. Nxe³ai¹na¹te³nah¹lxi¹: “Wãn³txi³su² ĩ³ye³kxi¹nx2ta¹wi¹. Txa²sa³wi³ha³lxi³nãu³a² wi¹kãi³ũh¹nx2tai¹nxa³kxai²nãn²tu̱³ wi¹kãi³ũh¹sah²lxan³tai¹ti²tu³wi¹.” Nxai¹na¹jau³su² nxe² e³kxai¹na¹tu¹wi¹.
46 A²nxe³te²nãu³xai²na² sa²kxai³lu² ha³lo²a² ha³nxe² i̱³sa²tẽ³ju³ta² khãuh³lxa³ti³sa²tẽ³nhain¹tu¹wi¹. Nxe³yãn¹ta¹ wi¹lhin¹te²nãu³xai²na² sa²kxai³lu² ka³te̱³na² wi¹tãu³a¹ wi¹lhin¹sxã³ yxau²sa²tẽ³ain¹tu¹wi¹. Je³su²jah³lai²na² wãn³txa² ta¹hxai²hẽ¹la².