Ibulu
Ibulu am ekŋengat zapat meluwaŋ kumindadaŋaŋ.
Zapat meluwaŋ kapi kwiyaŋ penaŋ kuye ke sosok ku zemsokbembeŋaŋ. Pâlaŋ zapat meluwaŋ kukuŋaŋ sambe ikŋaŋgat kwitnaŋ kumti, “Neŋ kuya,” e ŋep manzemkawaŋbein. Âpme Ibulu kapiyet zet esemtaŋ keboŋ ŋen ku tazin. Kogogapmti an nânâŋin temaŋ Kawawaŋgalen zetgat nânâ mulup mamiwan kwiyaŋ kup keyet zet mulup ikŋakŋen mamip. Ekŋen nâmkiŋpepeŋinmak kukŋaŋgat mambien ekŋenaŋ Pâlaŋ kup zewien. Yaŋgut Lutayaŋ maŋgeengatnaŋ takwalip ekŋenaŋ kwiyaŋ kup keyet zemusulalak zet omba mamip. Pâlaŋ ku kup zewien e yaŋaŋ kapigogapmti zet ke zenzeŋaŋ. Egalen zapat meluwaŋen ekbegen egaŋ kuye set katnaŋ kwep mâti kukuŋaŋ nemboŋ yekgapmti zenzeŋaŋ. Zapat meluwaŋ kapi kwitnaŋ Ibulu kukuŋaŋ eneyet Zuda am ekŋengalen zelin Ibulu.
Ibulu an ma imbi kwiyaŋ zapat meluwaŋ kapi kuyeyaŋ am nâmkiŋpepeŋinmak ekŋen sindem omba penaŋ nâmkiŋpepeŋinaŋgapmti tatimeyepm zemgwatnaŋ zet ma nâmkiŋpepeŋin katikŋaŋ beme tatatgat nâmti zet kapi kuye. Zuda am ekŋenaŋ Kawawaŋgat sesewatpesâti sâpe sâpe sepem ikŋak ikŋak mambumkwetemien kemak Zisasiyaŋ an sâpe sâpe bumbu mulup mti sekŋaŋ sâpe buye keyaŋ mobotnaŋ bein zemti zapat meluwaŋ kapi kuye. Sâpe sâpe bumbu mulup mkwakwatnaŋ keyet penaŋ ilak Zisasmagen sokbeye keyepmti tâtâ alakŋaŋ ekmagen mimiŋaŋ ke ku eleŋgeŋgeyelen nâmti zapat meluwaŋ kapi kuye.
Zet ŋotekŋaŋ temaŋ kapigogaŋ Ibulu zapat meluwaŋ keŋan talip:
1:1-5 Kawawaŋ alak pi set ikŋak ŋen aikzin Nemuŋaŋ Zisasiyaŋ set ke bein
1:6–7:28 Kilaisiyaŋ tâtâ itnaŋaŋgalen mulup an sebemindein
8–10 Ningalen sâpe sâpe bumbu an Zisas egaŋ sâpe sâpe buye keyaŋ sâpe sâpe bumkwakwatnaŋ ke sebemindein
11–12 Nâmkiŋpepeen ewe gwaŋ gwaŋ kumtatagalen indakumtetitiŋaŋ delaŋ zenzeŋaŋ
13 Zet zemdelaŋ zenze zet
1
Zisasiyaŋ golaŋ zenze an itnaŋaŋ mamkwabienmak ensel ekŋen sebemindein
1-2 Kawawaŋ egaŋ golaŋ zenze an zemindeme ekŋenaŋ yeŋsokŋine ikŋaŋgat mundumann kan sepemaŋ ikŋak ikŋak ma zet setnaŋ yaŋaŋ ikŋak ikŋak mandiindom kwatnepemelak alak tatnuwen kapiyetnaŋ Zisasiyaŋ kosâpmnen kan keyet Kawawaŋaŋ ikŋaŋgat yaŋaŋ mkawaŋbeme delaŋ zenzeŋaŋ ikŋaŋgat Nemuŋaŋ penaŋ zempeme toti zet tadiindoin. Kawawaŋaŋ Nemuŋaŋ keyaŋ kwitnaŋ kwitnaŋ sambe keyet toŋaŋ bemti mamayet ombempeye. Eneyet egelaŋ ilisakwep mamti kwitnaŋ kwitnaŋ sambe ke mbun. 3 Kasupgat saŋga soŋgaŋaŋ mamekozin sepem kegogak Kawawaŋgat yaŋaŋ penaŋ Nemuŋaŋaŋ mamsokbemkawaŋbein. Nemuŋaŋ ek yaŋaŋ ikŋak yek; egegat yaŋit kwep. Zet dembusekŋaŋ windeŋaŋmak zeme keyaŋ kwitnaŋ kwitnaŋ sambe kapi bandim mpeme matazin. Egaŋ ningalen bekanaŋ zulutndemti gwaen mogeyaŋ Amobotnaŋ Temaŋ egat betnaŋ penaset mundum windeŋaŋbeŋ keyet totazin.
Kawawaŋgat Nemuŋaŋ ensel ekŋen aŋgosomindemti mobotnaŋ tazin
4 Âpme Zisasiyaŋ ensel ekŋen sebemindemti motazin. Kogok mti ensel ekŋengalen kwit zet buŋam timtotindemti egaŋ kwizet buŋam temaŋ timti matazin. 5 Kawawaŋaŋ Nemuŋaŋgat nâmti zet kapigok zeye,
“Geŋ nâgât Nemun penaŋ; nit alak Bip Nemun belup.” (Sam 2:7)
Ma ŋen kapigok zeye,
“Neŋ gâgât Bipdi bemti mambap ma geŋ nâgât Nemun bemti mambanik.” (2 Samuel 7:12-14)
Ensel ekŋengat Kawawaŋaŋ zet kegok ŋen ku zeye. 6 Yaŋgut egaŋ Nemuŋaŋ kwewetaŋ ke msalen ewe peme tobe kan keyet zet pigok zeye,
“Kawawaŋgalen ensel ekŋenaŋ ek pedondom samti sesewatpewep.” (Sam 96:7-9)
7 Kawawaŋaŋ enselŋene ekŋengat kapigok zeye,
“Tâgâmak taŋamaŋ nâlen zet nâmti zetn mamâlupnok ensel ekŋen nâlen mulup angapmti zetn maŋgawepup.” (Sam 104:4)
8 Kawawaŋaŋ Nemuŋaŋgat gulak kapigok zeye,
“Kawawaŋ, geŋ Amobotnaŋ mundumdi katikpepepiŋ tatat kaliŋaŋ tapmeti mambanik. Ma Amobotnaŋ mamandi teŋ keyaŋ amobotnaŋgalen toŋge ke nemboŋ beme am indamusuwewet dolakŋaŋ penaŋ mbanik. 9 Geŋ mama mimi teŋ keyet tikŋaŋ manânik ma mama mimi bekanaŋ keyet kasa mamnik. Kogogapmti neŋ gâgât nâmtikŋaŋ mti geŋ Amobotnaŋ tatagat ombemgemti kelakŋaŋ zulutgeap keyet nâmti oloŋen palen mambanik. Ke ensel ekŋen sebemindemti Amobotnaŋ tatagat ombemgemti kelakŋaŋ zulutgeap.” (Sam 45:6-7)
10 Kawawaŋaŋ ŋen ewe kapigok zeye,
“Amobotnaŋ, geŋ yaŋbembeŋan msat palen kwitnaŋ kwitnaŋ mbanan ma kululuŋengalen kwitnaŋ kwitnaŋ betdaŋ munduminan bemindemebenanaŋ tapmelip. 11 Seŋgum melakandu keboŋ teŋgenaŋ mambeinok msat ma kululuŋ teŋgenaŋ bemti asekbalup. Geŋgulak mama kanzizit mamambanik. 12 Kegok beme geŋ amnaŋ saŋgum taŋganaŋ mamuŋguŋpeme mewen kegok geŋ kululuŋ ma msat muŋguŋ timane mowembe. Geŋgulak sepem mambanan kegogak ewe mambanik. Ma an penaŋ bembepiŋ mamti mamambanik.” (Sam 102:25-27)
13-14 Ensel ekŋen tâgâ etaŋ mme ekŋenaŋ Kawawaŋgalen mulup etaŋ mamip. Kawawaŋaŋ ekŋen zemindeme meti am ekŋen ikŋaŋ gilik zemindatitiyet manâin ekŋen ke maindamukulem mamimindeip. Kegok mammnaŋgut Kawawaŋaŋ ensel ŋengat kapigok ku dunduye,
“Kot betn penaset tapmane neŋ kasandine ekŋen kandaŋdanen mulaloŋ indema selaŋ indim kapisik indemane topmâpme tabanik.” (Sam 110:1)