1 Amuto tabarabaragu, eau masagea veia amuto ge rovia veia egiteu la valalua la lotu oio e Masedonia, La Tahalo Uru eia suli legiteu la gilogo ale uru. 2 Egite ligi, e Satan eia tovo lalai vagari egiteu, eala moli egite kama gabutatalea, la tia giteu volu moli la sagegela, egite pou la savelela sesele, eala moli igoie egite la tahalo la mutelela sesele. 3 Mai la tilau vikapopo la uati etato rararagia veia ge sovea giteu e tabarabara gatou te Kraist oio e Iudea, tio, eau vei seselea mutou, egite Masedonia pou la savelela, eala moli egite pigi uru sesele la vaabila, koramuli la uati bakisi ale egite taholea. Egite kama gabutatala la savelela tegiteu, egite suli pepeho moli e tabarabara giteu te la tilau vikapopo la uati. Isa kama karasuku egiteu, 4 eala moli egite kaka gogogo amiteu veia amite ge masaga molia veia egite tai ge suli egiteu e tabarabara giteu, mai te la tilau vikapopo la uati. 5 Amite karutu tai ale egite sugu taro la mahulila tegiteu soio te La Uru, egite goio vulo halaba lou mai ele, eala moli egite goio sugu taro lou egiteu somai tamiteu la bilalaha tai veia la merera ale mave te La Tahalo Uru ale amite ge baha egiteu ovola, egite veia ge igo molia, kama ge tou. 6 Egite vagari moli mai ele, tio amite goio baha taro e Taitas somai tamutou veia ge kaka lalai tai amutou la uati, la vuhula eia pala soko la igogolu alele soio tamutou. Amite bahea mai ele veia eia ge vikaluvu sesele la igogolu tetalale veia ge vitapasi sesele la gilogo tamutou te la tilau vikapopo la uati. 7 Amutou la tahalo me la tavile la tautaulailo sesele, la merera me la mari tamutou eia taritigi pepeho moli. Amuto vagari tavu la igogolu te Kraist, me amuto vipuhi tigi tai amiteu la bilalaha tetala. Tio, oio volale, amite kaka gogogo amutou veia amuto ge vagari tai te la gilogo mai la piligi la uati ale ge suli egiteu e tabarabara mutou ale pou la savelela. 8 Ale eau kama sugu taro amutou ovola. Eau kaka moli amutou veia eau ge hiloa veia amutou la tahalo me la tavile sesele te Kraist mai egiteu e Masedonia, ka ouka? 9 Amuto rovitia veia la gilogo te Iesus Kraist, La Uru gatou, la gilogo tetala soio tamutou eia uru sesele. Eia pou la balavala sesele oata te Tamala, eala moli eia vibisi lou eia, eia gomai te la maututula, eia pou mai la morivava, veia ge suli amutou mai ele veia ge vauru amutou, veia ge vibalava sesele la kalulu mutou, veia amuto ge pou la balavala sesele.

10 Tio, la gabutatalala taku soio tamutou te la tilau vikapopo la uati, eia maie: Te la leavala ale kaluvuti ale amuto lolo vuti la savelela tegiteu oio e Iudea, la merera alele eia ubi pala muga la tia mutou e Korin, amuto raga tavu la visuli, egiteu la valalua te Kraist te la maututula isapolo, egite mulimuli sesele tamutou, amuto vimuga sesele te la tilau vikapopo la uati. 11 Taritigi veia amuto ge vagari tavu loua, amuto ge vikaluvu sesele la tilau vikapopo la uati ale amuto sokotia. La igogolu tamutou oio vola eia ge taritigi mai la vulovulo mutou ale pala, amuto isasasa ge pigi la uati, mai eme la uati uru, eme ge pigi la uati uru, mai eme tahola la uati ale bakisi moli, eme ge pigi moli ilua. 12 Mai la masasagala tamutou isasasa ge oio sesele ovola, La Uru eia ge lege sisigi moli la vaabila tamutou. Eia kama masaga veia isa ge vavala veia ge pigi la uati uru mai eia la uati ouka. Taritigi amuto isasasa ge vaabila soio tegiteu mai la uati moli bakisi ale amuto taholea. 13 Eau kama masaga veia egite la valalua te Kraist oio e Iudea ge mavulaha bulalahu, eala moli amutou ale suli egiteu ge vavala. Eau masaga molia veia etatou ale te Kraist ge visauru tomi moli. 14 Igoie, amuto pou la balavala, eala eia taritigi veia amuto ge suli egiteu ale te Kraist oio e Iudea. Mai mulimuli egite ge pou la balavala, me amuto ge pou la savelela, egite ge suli rivu lou amutou, ge koli la vulovulo mutou ale taritigi soio tegiteu. Eala, etato tomi ge visauru moli mai ele. 15 Mai la merera te La Buk Tabu Ale Pala te la tabari la ilali tegiteu e Israel eia visauru moli, la merera ale eia veia maie:

16 Eau vei tataho sesele La Tahalo Uru ale eia vitivura la gabutatalala te Taitas, eia gogo amutou e Korin mai sesele eau tai gogo amutou. 17 Eau tahia veia eia ge goio tamutou, eia sagege moli, eia masaga pepehoa. Mai eau kama ge tahia, soioge eia sekela ge vahiliti la gabutatalala alele veia eia ge hari lalai amutou. 18 La tahalo isasa ale taritigi pepeho sesele, eia ge vikapopo tai le Taitas soio tamutou. Eia e tabara gatou isasa ale la valalua la lotu tomi vaisale seselea veia eia bole la igogolu ale uru te la valolo ale taritigi te Kraist. 19 Egite hilovi la tahalo alele veia eia ge vikapopo le amiteu la bilalaha, ale amite ge vahari soio e Ierusalem la uati ale amite vitau kapopotia. La uati alele, amite baumulia veia ge vaisale La Uru oio vola veia ge veipalea tai mai ele veia amite masaga molia veia ge suli egiteu ale pou la savelela. 20 Amuto pigiti la uati uru, eia taritigi pepeho, eala moli amite masaga molia veia ge vibaumuli tataho ovola, egite soukama ge kaua miteu veia amite virurua. 21 Amite masagea veia ge vibaumuli tataho ovola, veia La Uru me amuto la valalua tai ge hiloa veia amite igo seselea, la iruru ouka.

22 E tabara gatou uru te Kraist tai ge vitilimuli le Taitas mira soio tamutou ele, eau bahea. Eia veipalatia te la vulovulola veia eia la tahalo te Kraist sesele. Igoie tai eia mai ale veipalatia veia eia gabu tikumu amutou e Korin tai veia amuto sau tola seseleti e Kraist. 23 E Taitas tai ele, eia e tabaragu sesele te la igogolu te Kraist kabili tamutou. Me egira taho lua tai ale eau veitia mutou ovola, egira la bilalaha sesele ale loio te la valalua me hatavivile tomi te Kraist omai e Masedonia. Egite hilovi seseleti egirua, la vulovulo girua ale taritigi eia veipala la vaisalela ale uru soata te Kraist. 24 Taritigi amuto ge baumuli tataho egiteu taho tolu e Taitas miteu ele. Mai la vibaumulila ale taritigi amuto ge igoa soio tegiteu, egite ge matagaga sesele te la vuhu la merera taku ale eau vei tataho amutou soio tegite. Mai ge mai ele, la valalua me hatavivile te Kraist te la maututula tomi ge rovia veia eia sesele moli ale eau veia amutou e Korin la valalua te Kraist ale taritigi.