18
Baabilon Ka Raksaat Faanong
1 Lamuraana amun saan angkanaan, ga raamin aza aangelo xa kabal wat la lia. Naan ka rauxin a burburaaiang dikdik ma a marmari daxaiang sina xa wilaak a pira vaakdul. 2 Aais 21:9, Jer 51:8, Vaat 14:8, Aais 13:21, Jer 50:39Ma xa raraf dikdik malasing kari,
“Adi bina laba Baabilon ka raksaat faanong!
Ka raksaat faanong!
Taning ka balas a bina zin amun sapalaau,
a non mazali zin amun sapalaau di mitikaai
ma amun maani ina xa mitikaai ma di maska raksaat pana.
3 Aais 23:17, Jer 51:7Ka raksaat mase wanaze amun lemlem aubina vaakdul di ra imin a waain dikdik iwana a matmalabuk taksaat sina iwana milivinang a rapti rawarak,
ma wanaze amun kalxaal ila pira angkari di ra giu a matmalabuk taksaat pana milivinang naan,
ma wanaze aubina dit faangur la pira angkari di raxumbaaxut panaze naan ka rat pulwul amun lulugaan laba xa varas marazaat ina a maraana naandi xa laaup marazaat.”
4 Aais 48:20, Jer 50:8, 51:6,45Ga langarin aza ling axazak ka wat la lia xa piaat malasing kari,
“Nim aubina zurugu, naaguna waan siaana
xuna tuaa naaguna paasaxo varaxai wana naan pana amun matmalabuk taksaat sina
ma xuna tuaa zaait naaguna xazanin amun maravanang laba varaxai wana naan.
5 Var 18:20-21, Jer 51:9Avuna amun matmalabuk taksaat sina xa ruaas faanong la lia,
ma Nakmai xa naxaam faulin amun matmalabuk sina iwana kipang amun lus.
6 Saam 137:8, Jer 50:29Amun matmalabuk taksaat naa giu wana nim, naaguna vaulin sina,
amun saan taksaat na giu wana nim, naaguna xis faulin pana naan faarua.
Ma a win naa vaimin nim pana ma naagu zuruk a raksaatang pana,
naaguna vitor sfaar vaarua ma naaguna vaimin naan pana.
7 Aais 47:7-9Naan ka valaup naan nanga wana adi marmari daxaiang ma xa lis amun lulugaan laba ina a maraana naandi xa laaup marazaat sina nanga,
malasing ma wana a lan angbani naaguna lis adi vaamaazikang laba ma a maskaluzang laba zina.
Ka dador langga lamaskana malasing kari,
‘Nia a ravin kalxaal, ma ga iziar wana akin siziarang sin a ravin kalxaal.
Nia xawit a raksiziar ma xawit nat faraxas gana maskalus.’
8 Naan a vuvuna xanaan amun maravanang laba angkari:
a maatang ma a maskaluzang laba ma a zong,
kana balas sina lamaskana a raan azaxai.
Dina vaif vakdul mase naan pana a xaiaf
avuna a Piran Nakmai, ina xa klis a ravin angkanaan, naan a maradikdikang.
9 Izi 26:16-17Amun kalxaal ila pira angkari ina di gigiu a matmalabuk taksaat pana milivinang a ravin angkanaan ma ina dit fatawaraxin amun lulugaan laba zina, araan naandi di raamin a buaana xaiaf iwana vaivang naan, dina maskalus ma dina raangis. 10 Dina rur lawalaau ziaana, avuna di maraaut pana adi vaamaazikang laba naa zuruk. Ma dina piaat malasing kari,
‘Kaaskurun, kaaskurun, adi bina laba Baabilon!
Gu ra rauxin a dikdikang laba,
singsaxai lamaskana a notaan ka xalxaalif be,
nua gu raksaat faanong.’
11 Izi 27:31,36Aubina ila pira angkari ina dit faangur, dina raangis ma dina maskalus pana naan panaze xawit ka taxazak kana wul amun saan naadit faangurin kaarik. 12 Izi 27:12-13,22Amun saan naadit faangurin ka malasing kari: a goul ma siliwa ma azanon faat ka marmari daxa mase ma amun katura zaang, ma amun marapi daxa xa xuf, ma amun marapi xa raubung, ma amun marapi xa siliga, ma amun marapi memek, ma amun iaai xa milalas mikuf ma atavur amun saan di giu wana amun livana elefan, ma amun iaai a maraana naandi xa uzaa marazaat laaxur ma brons ma aain ma a vaat ka laaup di vakilaan a maabal, 13 ma a sinamon ma azanon saan kat famikuf a vanganang, ma a laas ina dit faif ma xat milalas mikuf, ma a bulut iwana a nan iaai di vakilaan a mar, ma a bulut a iaai di vakilaan frengkinsens, ma a waain ma wel iwana olif ma flaaua ma wit, ma amun bulumagau ma amun sipsip ma amun os ma amun kaaris ma amun iaana kilaaiang ma azanon aubina.”
14 A ling axazak angkanaan ka piaat kaarik malasing kari, “Amun saan gu sasaxot famarazaat, di vaanong. Amun lulugaan daxa zunum ma amun saan ka marmari daxa zunum, di vaanong saait siaanum, ma guna wen taamin kaarik naandi. 15 Izi 27:31,36Aubina ina dit faangurin amun saan angkanaan ma di raxumbaaxut pana, dina rur lawalaau ziaana avuna dina maraaut pana adi vaamaazikang laba naa zuruk. Dina maskalus ma dina raangis, 16 ma dina xupkup malasing kari,
‘Kaaskurun, kaaskurun, adi bina laba!
Gu rat mamaaus pana amun marapi daxa, amun marapi xa raubung ma xa memek,
ma di rat famamaus nua wana a goul ma azanon faat ka marmari daxa mase ma amun katura zaang.
17 Aais 23:14, Izi 27:26-30Lamaskana a notaan ka xalxaalif be di kawin mase amun lulugaan daxa zunum ka varas.’
Ma naandi di xup amun sip, ma naandi dit kawas paan pana sip ma naandi dit faamuzas pana sip, ma dit suruk kaakaai wana amun saan inana raas, di rur lawalaau ziaana. 18 Izi 27:32Araan di raamin a buan iwana a xaiaf ka vaif naan dina xupkup malasing kari, ‘Azera bina laba xa malasing adi bina laba angkari xa rauxin aiza laba?’ 19 Izi 27:30-34Dina vatangin a maskaluzang sin naandi wana xawurang amun paata naandi wana paauf ma dina raangis maaluf ma dina xupkup malasing kari,
‘Kaaskurun, kaaskurun, adi bina laba!
Naandi ina dit suruk kaakaai wana amun sip,
di raxumbaaxut pana amun lulugaan laba zina!
Lamaskana a notaan ka xalxaalif be amun saan faakdul angbani di kawin mase.’ ”
20 Lus 32:43, Jer 51:48A ling axazak angkanaan ka piaat kaarik malasing kari,
“Nim ila lia ma nim aubina ninis sin Iesu ma amun aaposal ma amun profet,
naaguna dokdok pana naan,
panaze Nakmai xa klis naan pana amun matmalabuk taksaat sina wana nim.”
21 Jer 51:63-64, Izi 26:21Ma aza aangelo xa maradikdik ka zuruk adi vaat laba malasing a vaat laba iwana maiozang a wit ma naa psin kula maskana raas ma xa piaat naako,
“A bina laba Baabilon,
dina psin mangaring naan malasing adi vaat angkari,
ma xawit taxazak kana raamin kaarik naan.
ma a linga amun raavuru, ma a linga amun saan kuna ranganang,
kawit taxazak kana langarin kaarik inaan sunum.
Ma aubina dit gigiu atavur amun faamuzazang pana mita naandi,
xawit taxazak kana raamin kaarik inaan sunum.
Ma a linga adi vaat laba iwana maiozang a wit,
kawit taxazak kana langarin kaarik inaan sunum.
23 Kana wen tauxin kaarik ta maravas iwana laam kana ililap la bina zunum.
Kawit kaarik taxazak kana langarin ta linga vaananamang iwana vaamaxuzang inaan sunum.
Aubina zunum dit faangur, naandi aubina di rauxin aiza laba la pira angkari.
Gu valos falmur amun lemlem aubina vaakdul wana a taaring sunum.
24 Jer 51:49A daraai amun profet ma aubina ninis sin Iesu ma naandi vaakdul ina di ra zop famaat naandi la pira angkari,
xa iziar wana nua.”
18:2 Aais 21:9, Jer 51:8, Vaat 14:8, Aais 13:21, Jer 50:39
18:3 Aais 23:17, Jer 51:7
18:4 Aais 48:20, Jer 50:8, 51:6,45
18:5 Var 18:20-21, Jer 51:9
18:6 Saam 137:8, Jer 50:29
18:7 Aais 47:7-9
18:9 Izi 26:16-17
18:11 Izi 27:31,36
18:12 Izi 27:12-13,22
18:15 Izi 27:31,36
18:17 Aais 23:14, Izi 27:26-30
18:18 Izi 27:32
18:19 Izi 27:30-34
18:20 Lus 32:43, Jer 51:48
18:21 Jer 51:63-64, Izi 26:21
18:22 Izi 26:13, Aais 24:8
18:22 Jer 7:34, 25:10
18:24 Jer 51:49