1 Baata teing ookara nantoong tee Jiisuuꞌ tee eeꞌnara Kumponinge uripoꞌketa Pakoꞌpariꞌniiꞌ niiꞌ domamuri taremuriainooꞌkoo masikaꞌantavaamaing teing eeꞌning Kumponing baurukaaꞌ, eeꞌnoko baa tee naning tee Bauma piaavuainge teie teing baurukaaꞌ nariꞌ piaavuriainge. 2 Niiꞌke tee Kumponing piaavampima eeꞌnoko bakaang boto siompampima eeꞌ noruꞌampipeuꞌ, niiꞌke teing baurukaaꞌ nariꞌ piaavarampiri otong. 3 Aiꞌ tee Kumponing piaa tee miruꞌnooꞌ tee niiꞌke Kumponing bakaning boto siompampimatoaing. Eeꞌnoko teing bakaning boto teing poreꞌ deeaing niiꞌkoo. 4 Aiꞌ baata teing Kumponing baurukaaꞌ teing tee tee siong-koo makosinuka bakaang aarumo kompaamaung-koo, eeꞌnoko teing tee kansiꞌ bakaang aarumo tee puruꞌai otorong. Tee-koo eeꞌnung-koo Karistooꞌkoo baitomariri puruꞌampimaung tee kansiꞌ bakaang aarumo.

5 Baie aung kansiꞌ bakaang aarumo puruꞌupeuꞌ? Tee aaꞌ teie naninge deekoꞌ Jiisuuꞌ tee Kumponing Bauring masikaꞌantavuainge puruꞌkoo makosi.

6 Tee eeꞌnara Jiisuuꞌ tee Pakoꞌpariꞌniiꞌ Kumponing Bauring taaꞌniꞌantavari pouꞌnung, aaꞌnoko: auronge paning-eta kemuꞌkanaꞌ karoma taaꞌniꞌantavuuꞌ*Ooveai Maatiuꞌ 3:17; Luukeꞌ 9:35; Jooni 12:28 aaꞌnouꞌnooꞌkoo: ntong-koo minkiaruꞌ eeꞌnoko booꞌaapearama ereng tuuvuuꞌ. Nka ntong-koo minkiaruꞌnooꞌke naroꞌke deeaꞌ, teka ookenge aaꞌnouꞌnooꞌka ntong-koo minkiaruꞌnooꞌke eeꞌnoko ereng tuuvuuꞌnooꞌke teeꞌ nariꞌ auronge paning-eta karoma taaꞌniꞌantavuuꞌ. 7 Eeꞌnoko teie Tanuaang Meekunge teeꞌ nariꞌ masikaꞌantavui taaꞌniꞌantavumaunge,†Tanuaang Meekunge Jiisuuꞌ maantoꞌantavuuꞌ (Luukeꞌ 4:1), booꞌketa daaꞌantavuuꞌ (Roomaꞌ 8:11; Kara Okovuri Nkanuka 17:31), eeꞌnoko bakaning kara nkanuka taaꞌniꞌantananka avuruꞌ kara masikee-anta-koo (Kara Okovuri Nkanuka 4:29-31). eeꞌnara Tanuaang Meekung kara masikung okoꞌbosiꞌ deemparitaaꞌ. 8 Eeꞌ, teinge eeꞌninge beenaumoi siraꞌpaamaung aaꞌninge tee Tanuaang Meekung, tee aurong ntong-koo karouꞌnung, eeꞌnoko tee aurong ereng tuuvuuꞌnooꞌke karouꞌnung. Aing teing beenaumo biikaang noruꞌ narung eeꞌ oroꞌ minkuai otong Jiisuuꞌ tee Kumponing bauring. 9 Nantoonge kapooꞌ siraꞌpaako masikaꞌantavampimaung, teka Kumponing bakaang kara siraꞌ tee deto basinaꞌ masikaꞌanta-koo makosi, eeꞌnoko aung kapooꞌ ninge naurampimatomaung Kumponinge eeꞌnarai siraꞌpuuꞌnung Jiisuuꞌ Bauring tampuma. 10 Baa tee naning Kumponing Bauring masikaꞌantavumaunge tee eeꞌ noruꞌui otong bakaang domange, Jiisuuꞌ tee Kumponing Bauring Kumponinge naumuruꞌnaꞌ. Eeꞌnoko teie masikaꞌantavuaunge tee Kumponing tee daang minku tampumaung, aiꞌ teie tee daang-antavumaung masikaꞌantavuaruma tee kara Kumponinge siraꞌpuuꞌnung bauring-koong. 11 Eeꞌnoko tee kara Kumponinge siraꞌpuuꞌnung tee aung: Kumponinge tee niiꞌ domaang oparavaukaꞌnung amuruꞌ, eeꞌnoko tee domaang tee Bauring-koo otong. 12 Baa tee naning Bauring otoꞌevumaung tee-koo tee domaang otong, eeꞌnoko baa tee naning Bauring otoꞌevuaung tee-koo tee domaang otoaꞌ.

13 Aung tee ninge diiꞌkoo daariamang tee Kumponing Bauring bakaang miring masikaꞌantaverimaung-koo diiꞌke noruꞌeriiꞌnaang diiꞌ teing tee domaang oparavaung otoꞌderuring. 14 Eeꞌnoko niiꞌ eeꞌ noruꞌampima toꞌbiimariri oꞌnoring: Niiꞌke kapooꞌ eentavampiko bakaang pia siompampiri deekoꞌ teie tee taaramuriaing. 15 Eeꞌnoko niiꞌke eeꞌ noruꞌampira deekoꞌ, “Teie tee taaramurimaung tenang eentamariko,” niiꞌke tee napoꞌ eeꞌ noruꞌampiaing, “Niiꞌke masikaꞌ nkavampiaing teing eentavampimananka tee.” 16 Diiꞌkoo narunge baꞌmaikoꞌ tee orakaꞌnko koontoꞌ booꞌkoo makosinamuriiꞌ deeaung nkovuko oovura deekoꞌ teie tee kunsi-koo pakuvuaing, eeꞌnoko Kumponinge tee domampuai. Aung tee teing nantoong orakaꞌnko, koontoꞌ booꞌkoo makosinamuriiꞌ deeaung-nko nkoaavaining-koo nkoaravaing. Namuriiꞌ orakaꞌnko koontoꞌ booꞌkoo makosi masikaꞌ otomang, eeꞌnoko ninge aaꞌpampaꞌ temuriiꞌkoo kunsirariai. 17 Ookara amutemuriiꞌ nko-nkonanka koontoꞌ deeaing teing oreng, teka temuriiꞌkoo orakaꞌnko koontoꞌ booꞌkoo makosinamuriiꞌ deeaung-koo kunsirariiꞌnaang tampamang.

18 Niiꞌke tee noruꞌampiri oꞌnoring teie naninge Kumponing-koo pontoꞌniiꞌke tee orara aarumo danto nariꞌ nkovuaung teie Kumponing Bauringe tampaꞌ tarevuioꞌ. Eeꞌnoko teie Sietaniꞌke tee tee kompuaung. 19 Niiꞌ niiꞌka tee noruꞌmariri oꞌnoring, niiꞌ teing Kumponing Baurukaaꞌ, eeꞌnoko ootukunung kansiꞌkoo-nupoong teing tee naning orara bakaang iriꞌkoo kuung otorong. 20 Eeꞌnoko niiꞌke tee noruꞌampiri oꞌnoring teie Kumponing Bauringe tee tero poraiꞌnange noruꞌ amuruꞌ, niiꞌke tee Kumponing Masikung tasiꞌpampiiꞌnaang eeꞌnoko niiꞌ teing enang tee-koo masikung-koo kuung oꞌnorimaung Bauring-koo Jiisuuꞌ Karistooꞌkoo kuung oꞌnori, tee aung tee eeꞌnara Masikung Kumponing, domaang oparavaung okoraꞌ. 21 Diiꞌ eeꞌning toirekaaꞌ okiꞌnarekaꞌ teieta kumponinanka daang-koong-eta tontaꞌdariri otoriai. Eeꞌ, eeꞌnaꞌ.