1 Aung karavoto˜ tee ninge Paulaꞌke daariamaang, Jiisuuꞌ Karistooꞌkoong kara-okomui-nkai Kumponinge bamuioꞌ, eeꞌnoko tee Timoti niiꞌmaikoꞌ nariꞌ, diiꞌaape Kumponing bakaning-aape teke Koorin-navuntuꞌkoo dootuuꞌdarimaing-aape, napoꞌ teing ookara Kumponing bakaning meekupoong Akaiaꞌnamensiꞌkooning diiꞌanko otoromaing. 2 Biraanke eeꞌnoko mooa diiꞌkoo otoaing Kumponing Niuma-itaing eeꞌnoko teieta Ovoring Jiisuuꞌ Karistooꞌ.

3 Kumponing tee Ovoring Jiisuuꞌ Karistooꞌ Bauma tee bakei niiꞌke deto biraankeampiri otoꞌkoo makosi, tee piaa eeꞌnoko domang kuaaꞌanta-koo okoraꞌ. 4 Teie niiꞌ dunsirunsi˜antamurimaung teing-koo niikaning arikananka-koo niiꞌke napoꞌ teing arikung-poꞌnupoong dunsirunsi-antavarampiiꞌnaang teeꞌ nariꞌ niiꞌ Kumponinge dunsirunsi-antamurimanaꞌ. 5 Niiꞌ teing Karistooꞌ ninka nariꞌ arikung deepoꞌ kuneꞌampimaing deemariri tee napoꞌ teeꞌ nariꞌ Karistooꞌ ninka aaꞌnaꞌ domang kuaaꞌantai maantoꞌmurima niiꞌning-koo pareꞌampikooꞌ. 6 Eeꞌ, kapooꞌke mankiꞌantamuriko tee makosi, diiꞌ Koorin-nupoong domang unaarori domantariainaꞌ teeꞌ. Eeꞌnoko tenang niiꞌke domang kuaaꞌmorimanang diiꞌ napoꞌ domang kuaaꞌdorikooꞌ, eeꞌnoko puring nkaverikooꞌ ookara batei-koo teing mankiꞌnanka puruꞌkoong niiꞌke nariꞌ mantompampimaing. 7 Diiꞌ eꞌmaniriainaꞌ masikaꞌ noruꞌdarampiri otong, aiꞌ teeꞌ arikung kuneꞌampiko domang kuaaꞌantamurimanaꞌ Kumponinge napoꞌ diiꞌ domang kuaaꞌantaruriainge.

8 Ee mmaikoriꞌ, arikung Eesia-nameensiꞌkoo kuneꞌampiruꞌnung-koo papaararariarooꞌnaang naurarampimang. Niiꞌ teing aaꞌnaꞌ masikaꞌ arikunge pakusiꞌmurioꞌ domamariaukaꞌning-pinaꞌ noruꞌmariruꞌning. 9 Bakei booꞌkoo bamuruꞌning-pinaꞌ noruꞌmariruꞌ, teka teie Kumponinge tee arikung niiꞌkoo tauraꞌpuuꞌnung niiꞌ tee narung-koo baitomariiꞌnaang booꞌnuka domang-antavurimaung-koo, eeꞌnoko niikaang puring-koo biꞌmariaꞌ. 10 Eeꞌ, teie Kumponinge kapooꞌ niiꞌ dupisiꞌkoong-pinaꞌ oroꞌketa domang-antamuruꞌnunge teeꞌ nariꞌ taremuri otong. Teeꞌkoo teeꞌ nariꞌ tee-koo arooꞌmarimaung daanto nariꞌ mooꞌmurimatoaing-koo. 11 Diiꞌke teie kunsi-koo nariꞌ pakumereriaing, aiꞌ diiꞌke mmauꞌke pakumereriko deekoꞌ tee nantoong mmauꞌke Kumponing-koo tampaꞌ tampaavaing tenang Kumponinge niiꞌ pakumuriko.

12 Niiꞌ tee dotumarimaung domang kiiroraaꞌmariri eeꞌkoo: aiꞌ niiꞌke tee aarumo koontoꞌ narung nkoampimaung Kumponing piavomanaꞌ ookara nantoong eeꞌnoko diiꞌkoo meuꞌke, niiꞌnung kapooꞌ makempampiaꞌ, eeꞌnoko teeꞌ oroꞌnooꞌkoo kansiꞌ bakaang matau siompampiaꞌ, Kumponing bakaang piaae kakeꞌii-antamuriko bakaang aarumo siompampikooꞌ.*Niiꞌning daang-koong nau-antanuka porora Paulaꞌ pooreꞌaako mmauꞌke Koorin-nupoonge sipaara siompaarikoꞌ. Paulaꞌke taaravuraiꞌnange onou paariarara napoꞌ beeroꞌuriaꞌ, teka Taitas teing koong-anta-koo botovuuꞌ. 13 Ookara kapooꞌ ninge daarirerompimaing teing makensiꞌning deeaꞌ, deeruerima tasiꞌperipeuꞌ. 14 Diiꞌkoo niiꞌninge niiꞌ tampaꞌ tasiꞌmereri otoinaꞌ tasiꞌmeriiꞌnaang ookarai piamomaang.†Teing-koo mmauꞌ Taitas tampaꞌ taaravaara bereꞌariko niiꞌning mmeꞌ kontevoroi otorokoꞌ. Eeꞌnoko niikaang miring meenaꞌantaveriai teeꞌ niiꞌke diikaang miring meenaꞌantavampiainaꞌ teꞌmung Ovoring Jiisuuꞌ poainaꞌmung.

15 Diiꞌke ning masikaꞌantamerimaung noruꞌansi ning diiꞌankoi tutung meeꞌnaang tammaruꞌ eeꞌnoko toromarama napoꞌ beeroꞌdampiri kemuꞌkanaꞌ paku-antarampiiꞌnaang. 16 Aꞌnooꞌ tee ninge tenang Masedoniaꞌ mema diiꞌ oorampiri beꞌkoo noruꞌantuꞌ eeꞌnoko Masedoniaꞌketa napoꞌ diiꞌanko meko pakumeriko Judiaꞌaape meeꞌnaang. 17 Teketa maromaruꞌnaꞌ diiꞌanko mearuko tamung akapeuꞌmarama minkuantuꞌnung-pinaꞌ noruꞌmeriaukaꞌ, aiꞌ ning akapeuꞌmarama maromaravaung naning kansiꞌkoong bakanaꞌ tosiroꞌmarama. 18 Kumponing masikung minku deemparako niikaang kara teeꞌke diiꞌkoo niiꞌ tosiroꞌmariaꞌ. 19 Aiꞌ tee Kumponing Bauring Jiisuuꞌ Karistooꞌ tee Pakoꞌpariꞌniiꞌ niiꞌke diiꞌkoo daankiampimaung, aaꞌninge Sivenus, Timoti eeꞌnoko ning tee tosiroꞌkoong deeaꞌ, teka tee-koo kuunge ookara batei-koo tee niiꞌ masikung narung minku-koo makosinuka. 20 Aiꞌ ookara maraka-antananka Kumponinge deining Jiisuuꞌkoo kuunge teing masikaꞌparavainanka. Teeꞌkoo Kumponing daangampampima Jiisuuꞌkoo kuunge aaꞌpampimaung, “Eeꞌ, masikung, nkoaravaing!” 21 Enang tee Kumponing narunge ookeng diiꞌ eeꞌnoko niiꞌ imaꞌantamurimaung Karistooꞌkoo. 22 Bera pakoꞌpariꞌmurima bakaning deeng-anta-koong taaꞌniꞌanta tee bakaang Tanuaang Meekung niikaang domang-koo sipuuꞌ tee koreꞌnang tasiꞌanta tee-koo biraanke damaꞌ ooampiaing-koong.

23 Enang tee masikaꞌanta-koo Kumponing bakaang miring tampamang aaꞌpama: Ning tee diiꞌ orakaꞌ mantong-antarampiꞌneeng-koo diiꞌanko teꞌ Koorin napoꞌ toromaravaꞌ. 24 Tenang ning mora tee diikaang baito booniꞌanta-koo piamoaꞌ diikaang baito-koo tampaꞌ donkoniri otoriko, teka ninge doturotu-aape-nameng-koo deekoꞌ pakurampiiꞌnaang.