1 “Diiꞌ mmataraang eeꞌnoko mmarang Juꞌnupoong, taarameriaing nkaang kara penkemarama minkuamaꞌnaang otoing diiꞌkoo.” 2 Eeꞌnoko tenang teinge biikanaꞌ karoko taaravaara aaꞌnaꞌ dooroompariruꞌ teing.

3 Eeꞌnoko aaꞌpuuꞌ, “Ning tee Juꞌnung, Taasusie pontoꞌmaruꞌnung Silisia-koonooꞌke, teka anke Jerusalemaꞌke Kameliele-ankoi baremaruꞌ, niikakatauro-itaing boto toꞌbiiari otoinaꞌ nariꞌ;*Kameliele tee Juꞌnupoong-koo narung nau-anta aaꞌnaꞌ pankaing. Biikaang koompaaraꞌnavitu tampaꞌ taaravaakooꞌ. Ooveai Kara Okovuri Nkanuka 5:34. 4 Diiꞌ eꞌmung otorinaꞌ nariꞌ Kumponing iriꞌmoi siompama aaꞌnokoꞌ avung-koo Jiisuuꞌ sionavung-koo ning oꞌnoinavung-koo otorokoꞌning mankiꞌantavarama niiꞌning dupisiꞌantavarantuꞌ. Nantoong aaꞌning donkaang eeꞌnoko manikuꞌ daiꞌarama kiimata-koo siparankoꞌ. 5 Teie piristiꞌ pankainge eeꞌnoko ookarai Juꞌnupoong-kooning pankenanka-koo koompaaraꞌnavitue masikee-antamaapeuꞌ. Teing-eta eeꞌning-eta ninge karavoto˜ tauraꞌkooning nkavantuꞌ niiꞌmarang Juꞌnupoong-anko Damaskas otorokoꞌning-anko beꞌkoong. Eeꞌnoko Damaskas-aape nanantuꞌ teing Jiisuuꞌ sionavung-koo otorokoꞌning baramparamira aꞌ Jerusalemaꞌ kiimata-koo siparamaꞌnaang.”

6 “Eeꞌnoko nanama Damaskas dueꞌanko tenang duaakiꞌnang araka pankainge paning-eta tooꞌmuuꞌ ning. 7 Eeꞌnoko ning teꞌ doonko kansiꞌkoo duaꞌmaruꞌ eeꞌnoko aurong taaravantuꞌ aaꞌmuko ning, ‘Soolo ee, Soolo, dake aming-koo ning mankiꞌantamemaung?’ 8 Eeꞌnoko makuꞌama aaꞌpantuꞌ, ‘Daꞌ baa Ovoring?’ Eeꞌnoko teie aaꞌmuuꞌ ning, ‘Ning Jiisuuꞌ, Nasaretiꞌnung, tee eeꞌnara dake mankiꞌantamemaung.’

9 “Enang teing nantoonge niꞌninka nanampikoꞌninge araka ooauꞌ, eeꞌnoko aurong taaravauꞌ, teka miruꞌnooꞌ nkavaavaruuꞌ tee-koong kara ning karamukoꞌnung-koong. 10 Eeꞌnoko ninge aaꞌpantuꞌ, ‘Ninge aming nkoamaꞌnaang Ovoring?’ Eeꞌnoko Ovoringe aaꞌmuuꞌ ning, ‘Deto donkonira Damaskas tuntaravaing eeꞌnoko teka nauraavaꞌnaang daꞌ teing kapooꞌ dake nko-koo miruꞌniiꞌning.’

11 “Eeꞌnoko tenang ning oo-koo makotumparuko arakai kaputuꞌantamuioꞌ ning birenge komai nanuꞌantamauꞌ teinge nariꞌ nanampikoꞌninge bera Damaskas basi-antamauꞌ. 12 Temono-koo naning narung miring Ananaiasi otokoꞌ, tee eeꞌnara Kumponing-koo meeꞌduꞌpiari otokoꞌnung Moosesi-nung botoi minkuvui otoinaꞌ eeꞌnoko ookarai Juꞌnupoonge aaꞌnaꞌ tampara tampaakoꞌ tee. 13 Tee eeꞌnara ning-anko pora dueꞌ donkonura aaꞌmuuꞌ, ‘Mmaikoꞌ, Soolo, duta banteai enang.’ Eeꞌnoko tenang tee-koo batei-koo ning bantomira tee ooantuꞌ.

14 “Eeꞌnoko teie aaꞌmuuꞌ, ‘Teie Kumponing niikakatauro biikaange daꞌ miruꞌduuꞌnung bakaang pia tasiꞌpeeꞌnaang eeꞌnoko tee naning koontoꞌ Jiisuuꞌ dakaang dutai ooveeꞌnaang eeꞌnoko bakaang kara taaraveeꞌnaang bakaang karang-eta. 15 Aiꞌ daꞌ tee bakaang kara siraꞌ ookara nantoong-koo teing kapooꞌ taaraveiaining-koo eeꞌnoko ooveiaining-koo. 16 Aiaꞌ deto nentaravaꞌ donkonira ntong-koo minkie meekaꞌantararavai, eeꞌnoko dakaang orakaꞌ nkonanka kuiaravai bakaang miring tampeko.’ Eeꞌnoko teeꞌpuioꞌ teeꞌ meekaꞌantamarara Jerusalemaꞌaape toromaruꞌ.”

17 “Eeꞌnoko Jerusalemaꞌaape toromarara avakaꞌkoo dootuuꞌnava pankava-koo kunsimarama niiꞌnaung-koo˜ bereꞌmaruꞌ. 18 Eeꞌnoko Ovoringe aaꞌmuko ooantuꞌ, ‘Iriꞌnarung daaꞌdarara Jerusalemaꞌketa tenkeniai, aiꞌ aing amono-nupoonge tee taararaavarooꞌnaang dake ning siraꞌmeko anke.’

19 “Eeꞌnoko ninge aaꞌpantuꞌ, ‘A, tee aaꞌ tampaꞌ noruꞌmai otong, aiꞌ ninge teing pakuarama aaꞌnokoꞌnung ookara pava dootuuꞌnanka-koo daiꞌarama tavarankoꞌ teing-eta siivenkeꞌarima daꞌ Jiisuuꞌ masikaꞌantaraakoꞌning. 20 Eeꞌnoko teꞌmung tee Sitiveni daꞌ siraꞌdukoꞌnung dupisiꞌauꞌnaꞌmung ning teke dueꞌke donkonansi mononopaꞌnanka tee tavauꞌning biikaning tareansi tampaꞌ tampankoꞌ.’ 21 Teka Ovoringe aaꞌmuuꞌ, ‘Ninge aaꞌ botoramaang, tenkeniai isipoꞌaape Juꞌdeeaing-anko.’ ”

22 Teinge karingai barorompauꞌ tee Paulaꞌke teꞌ basinooꞌ kara minkuvuko, teka karoma Juꞌdeeaing-anko beainaare-koo basivuko deto bokiaama aaꞌpauꞌ, “Kansiꞌkoo domampari otoaukaꞌ!” 23 Eeꞌnoko teeꞌ peusiꞌkaama misimisiarima daꞌmong eeꞌ deto baiꞌauꞌ Paulaꞌaape. 24 Eeꞌnoko teeꞌ nkoariko tee piatooronuka biikaang boreꞌ botoaruꞌ piatooronuka biikanavaꞌkoo poꞌantavaaraiꞌnange muraꞌaama okoraꞌ besiꞌaavaꞌnaang tee kapooꞌ tee turampaama bokiaakoꞌnung. 25 Teka tenang moꞌming-koo biꞌaara muraꞌaavaꞌnaang beetoꞌaako Paulaꞌke nauvuuꞌ tee narung daakuꞌ piatooronuka tanata teke donkonui otokoꞌnung, aaꞌpuuꞌ, “Ning tee Roomaꞌnung, eeꞌnoko niikaang botoi tauraꞌduriaung Roomaꞌnupoong tamung muraꞌkoo kapooꞌ orara mmeꞌ ooveriaꞌ.”

26 Tenang teie piatooronuka daakuꞌ tanatanarai teeꞌ taaravura tee piatooronuka biikaang boreꞌanko bera aaꞌpuuꞌ tee, “Aung naning dake arekeeꞌ nkoveeꞌnaang, aiꞌ aung tee Roomaꞌnupoong-koong.” 27 Teeꞌkoo teie piatooronuka biikaang boreꞌke pora aaꞌpuuꞌ tee Paulaꞌ, “Naumeai, daꞌ ee tee Roomaꞌnupoong-koong?” Eeꞌnoko teie aaꞌpuuꞌ, “Eeꞌ.” 28 Eeꞌnoko teie piatooronuka biikaang boreꞌke makuꞌuma aaꞌpuuꞌ, “Ninge mmauꞌ mooniꞌke mooꞌantuꞌ teeꞌ naning Roomaꞌnung deemaraaꞌnaang.” Paulaꞌke aaꞌpuuꞌ, “Nka ninge mooꞌampaꞌ, ning Roomaꞌnung paramauꞌnooꞌketa.” 29 Teketa tee teing muraꞌaama okoraꞌ besiꞌaavaꞌnaang mauꞌaakoꞌning namuꞌke dunkaꞌpariruꞌ tee-ankoita. Eeꞌnoko tee piatooronuka-koong boreꞌ avorouꞌ tee Paulaꞌ Roomaꞌnung tasiꞌpura eeꞌnoko boto totoꞌpui daiꞌuuꞌnaꞌ tasiꞌparara.

30 Teketa daunaꞌmung teie boreꞌke Juꞌnupoonge tuumpiauꞌnooꞌkoo okoraꞌ masipoꞌ noruꞌkoo piavora, Paulaꞌ sing-antavura botoaruꞌ teing piristiꞌkoo ovontung eeꞌnoko ookara koompaaraꞌnavitu kuneꞌeeaꞌnaang. Eeꞌnoko teie Paulaꞌ doonko beꞌantavura teing-koo uroꞌkanooꞌ donkong-antavuuꞌ.